Home Gobierno Prome Minister Eman motiva pa sigui cu mini canchanan deportivo rond Aruba

Prome Minister Eman motiva pa sigui cu mini canchanan deportivo rond Aruba

8
0
SHARE
- Advertisement -

ORANJESTAD – Cada biaha por mira con un parti di e vision di Prome Minister Mike Eman ta yega cerca e pueblo. Tur tin di haber pa yega na un miho calidad di bida, algo cu ta bay mas leu cu solamente mehoracion di entrada of vivienda. E ta encera tambe canchanan deportivo, cu yerba artificial, den barionan rond Aruba,  pa tanto mucha, hoben, adulto como esnan mas grandi.

Pa Prome Minister Mike Eman ta un orguyo grandi pa mira con e vision cu su partido AVP a pone pa pueblo di Aruba cada biaha, cu cada proyecto, cu cada obra ta bira realidad. Un di e metanan poni ta pa hiba mini canchanan deportivo den bario, pa e muchanan por disfruta den un forma sano. E proyecto aki di Prome Minister Mike Eman a wordo brasa door di Comite Olimpico Arubano y awor 6 di e canchanan aki por wordo construi rond di Aruba.

Despues cu algun siman atras e mandatario a bishita e sitio na Dakota ora cu a pone e fundeshi pa e pilarnan di e mini cancha, y e siman aki e fundeshi di e piso tabata cla, a cuminsa pone e yerba artificial door di e compania concerni. Dakota ta e prome di e seisnan pa logra finalisa su proyecto di Mini-Turf y cu orguyo e mandatario a duna un man den e ultimo trabounan pa pone e yerba artificial.

“Centro di Bario Dakota ta un di e areanan cu nos a scoge hunto cu COA. Esaki ta basa riba un area unda por combina e uzo door di scolnan, un centro di bario y ekipo deportivo. E criteria aki a uza pa scoge e 6 sitionan unda cu ta pone e canchanan aki.”

E otro areanan unda cu a pone fundeshi caba tabata na veldnan di Arsenal; La Fama y Estudiantes. Prome Minister Eman a splica cu Gobierno a constata cu construccion di e cancha deportivo na Madiki a resulta den un exito completo y ta wordo hopi uza door di hobennan. No solamente esun di Madiki, pero tambe esun na Bushiri y Centro di Bario Brazil ta un exito completo.

Gobierno ta contento pasobra esaki ta haci cu tin mas mucha practicando deporte bou supervision. “E proyectonan aki nos kier sigui cu nan den tur bario y e prome exitonan aki ta duna nos e motivacion pa bisa cu esaki ta e paso y prioridad corecto pa nos sigui den e direcicon aki,” Prome Minister Eman a bisa.

 

- Advertisement -

DUNA COMENTARIO

Please enter your comment!
Please enter your name here