Home Cultura Recordando Sr. Watty Vos riba 80 aña di su natalicio

Recordando Sr. Watty Vos riba 80 aña di su natalicio

49
0
SHARE
- Advertisement -

Fundacion na memoria di sr. E.J.(Watty) Vos:

“Mi sa unda mi ta bai, pero hamas lo mi lubida for di unda mi a bini”

Watty Vos (1937- 2001)

Nacemento y estudio

80 aña pasa, pa ser exacto 16 di augustus 1937, na Weststraat 16 den Rancho e bario di piscadornan di Playa, a mira lus di dia sr. Edgar Joaquin Vos mihor conosi como Watty. Su persona tabata e di cuatro for di cinco jui di e pareha Salomon y Genoveva Vos-Tromp. Como studiante Watty a bai St. Dominicus College na cual scol el a hanja su MULO- diploma, tambe e tabata tin diploma di adjunct- commies y abogado.

 

Deporte

Watty tabata un ex internacional di Aruba y Antillas Hulandes den e ramo di futbol. Como miembro di seleccion di futbol di Antillas a logra na Cuba medaya di plata despues di Costa Rica. Na Puerto Rico durante di e weganan Centro Americano y di Caribe representando Antillas e seleccion a logra medalla di plata despues di Mexico. Watty a defende tanto Aruba como Antillas na Suriname, Salvador, Costa Rica y Jamaica. Na Aruba Watty a defende su isla contra equiponan di Brasil (Bangu, Fluminense), Bolivia, Peru, Ecuador, Colombia, Venezuela, Inglatera (Arsenal). Watty a semper a milita den e club local Aruba Jrs.

 

Musica, social y sindicalismo

Watty tambe a sa di gosa di fama como musico durante e temporada como integrante den e conjunto Los Duques cual conjunto a sa di gosa di un popularidad enorme na Aruba cual a pone tambe cu nan worde contrata pa e inauguracion di Aruba Caribbean Hotel. Watty tabata fungi como drummer, cantante y manager. Watty tabata vicepresidente di Jaycees di Antillas Hulandes y miembro di directiva di Toastmasters di Aruba den cual organizacion ela forma su mes e.o. como orador publico. Watty ta fundador di e prome directiva y di Centro di Barrio di Playa Pabao na unda cu porcierto próximo aña lo celebra 30 aña di existencia. Watty tabata presidente di sindicato di empleadonan di gobierno di Aruba.

 

Empleado publico y abogado

Watty pa varios aña a cubri e posicion di sub- hefe di e departamento di Domeinbeheer. Su persona a fungi activamente como abogado durante e periodo 1989 pa 1994 trahando hunto cu e oficina Gonzalez, Zielinski y Gibbs, aunque cu ya desde 1970 ela worde acepta como miembro di Bali y ela huramenta como tal.

 

Politica

Watty ta co- fundador di partido MEP, fundador di partido RUBA, cual despues na 1982 a uni forza cu partido AVP, partido cu Watty a keda miembro te cu su fecha di fayecimiento. Watty a haci su debut den politica na anja 1971 ora cu su persona hunto cu sr. Betico Croes (q.e.p.d.), sr. Daniel Leo (q.e.p.d.) y sr. Efrem de Kort a funda partido MEP. Desde su debut den politica y te na eleccion di 1997 cual porcierto tabata e ultimo eleccion cu Watty a participa, semper ela worde escogi cu votonan preferencial.

Durante su carera den politica Watty a ocupa e siguiente puestonan; 1971- 1973 miembro di eilandsraad, december 1973- december 1975 minister di husticia y vice premier di Antillas Hulandes den gabinete Evertsz, mei 1976- februari 1977 diputado y alaves miembro di eilandsraad, 1977- 1985 miembro di eilandsraad, 1 januari 1986- februari 1989 minister di husticia di Aruba den gabinete Eman I, februari 1989- september 1994 miembro di Staten, 1 september 1994- 6 januari 2001 minister di husticia y obras publico di Aruba den gabinetenan Eman II y III.

 

Algun di e tanto projectonan sea personal of a forma parti di nan

16 di augustus 1975 despues di hopi contratempo Watty a sali victorioso, y a inaugura scol di polis na Aruba, cual porcierto desde 16 di augustus 2002 ta carga e nomber Instituto Policial E.J. (Watty) Vos. Na september 1975 Watty tabata lider di e delegacion di Reino cu a delibera cu Venezuela e frontera maritimo entre Reino Hulandes y Venezuela. Tambe su persona como e unico politico di oposicion (R.U.B.A.) a forma parti di e delegacion Arubano consistiendo di gobierno insular di Aruba, sindicato y comercio y lidera pa sr. Betico Croes (q.e.p.d.), cu a biaha pa Hulanda despues di e sucesonan di augustus scur na 1977.

 

Tambe Watty tabata miembro di e comision di Reino cu tabata atende cu e relacionnan estatal dentro di reino Hulandes, esta e intereilandelijk topoverleg, Antilliaansspoor. Como tambe miembro di e delegacion Arubano na e dos conferencianan di mesa rondo na Den Haag, Hulanda, na 1981 y 1983. Na unda cu a fiha e futuro structura estatal di Aruba, cual resultado final tabata e status aparte.

 

Condecoracion y reconosimento

Casi 30 aña Watty a sirbi e isla aki como politico, y sin lubida su aporte for di hoben caba riba e terreno di futbol, musica, social y sindicato. Tanto den politica como den e cuerpo ehecutivo y legislativo tanto di Antillas Hulandes como esun di Aruba, varios ta e posicionnan clave cu Watty a sabi di eherce cabalmente, pa cualnan tambe varios ta e condecoracionan cu e la ricibi tanto for di Casa Real Hulandes como for di gobierno Venezolano. Watty ta un di e tres Arubanonan cu a wordo condecora como Commandeur in de orde van Oranje Nassau, e condecoracion di mas halto cu Casa Real Hulandes por otorga na un cuidadano. Na nivel internacional Watty ta e primer Arubano cu a wordo elegi como presidente di un organisacion internacional, Caribbean Financial Task Force (C.F.A.T.F.) Aki na Aruba gobierno a honrele cu e scol di polis na su nomber, cual porcierto Watty a funda na 1975 y e ringweg 3 cu ta carga e nomber Avenida E.J. (Watty) Vos, cual caminda porcierto den futuro cercano lo corre for di crusada di aeropuerto Reina Beatrix te cu e crusada na altura di Fatum na Punta Brabo.

 

 

 

 

 

 

 

 

 

 

 

- Advertisement -

DUNA COMENTARIO

Please enter your comment!
Please enter your name here