Home General STA: Sindicatonan y pueblo hopi indigna cu Paul Croes den prison...

STA: Sindicatonan y pueblo hopi indigna cu Paul Croes den prison ta sigui ta minister

901
0
SHARE
- Advertisement -

ORANJESTAD (AAN) — Presidente di STA, señor Diego de Cuba, despues di a wordo yama pa diferente miembro encuanto e caso di sr. Paul Croes, a splica cu hopi trahado publico ta spera cu dia algo asina pasa un di nan, nan keda cu nan trabou y salario, mescos cu a pasa cu e minister.
E sindicalista a acentua cu esaki ta cosnan cu ta indigna no solamente e sindicatonan, pero henter e pueblo di Aruba, pasobra e cabayero aki ainda su caso no ta full cera.

Pero un bes cu el a wordo aresta, y si nan a prolonga e aresto cu 8 dia, cual aresto por wordo prolonga te cu 116 dia, algo cu hopi hende no sa ta sosode.

Loke ta pasa, aworaki, ta cu Prome Minister ta declara cu e persona aki ta keda minister. Con bo por ta un minister hinca den un prison y cu pago riba dje?
“ Ta ki ehempel abo como prome minister ta dunando na e pueblo. Ki ehempel como prome minister ta dunando na e hubentud di Aruba y na tur e comunidad en general? Diego de Cuba ta puntra.

Si ta un ambtenaar mester a haci algo asina aki, e lo ta riba schorsing sin pago y hera nan a kite for di trabao caba. Akinan ta caminda cu nos sistema ta fayando barbaramente. Staten tambe ta culpabel di esaki.

“Si por mira un ehempel, kico por pasa na Hulanda, e meneer aki lo a wordo saca masha dia caba na mal ordo for di e posicion cu e tabata den dje.
Akinan por mira cu e bagamunderianan ta continua”, segun de Cuba.
Hopi hende no ta compronde e embergadura di e problema, e baina cu e homber aki a echa, De Cuba a señala. Posiblemente cu tin hende cu lo bay wanta castigo pe, y cu na final lo bay sali liber. Pero e, ta duda cu e lo sali liber, pasobra na final di dia, ta el a firma e ontheffingnan. Firmando un ontheffing, bo ta kitando trabao di personanan na Aruba.

“Esey no ta e mas tristo. E mas tristo den e caso aki ta por ehempel cu tin companianan grandi, cual de Cuba ta sigur di esey, su compichinan ta sinta riba un batata cayente, pasobra nan no sa si nan tambe lo bay den touw. E companianan grandi aki ta bin cerca dje y ta bisa cu tin 20 hende ta busca di afo, ta duna 10 mil florin, ta firma ontheffing y eynan ta haya 200 mil bao di mesa” e lider sindical a subraya.

Den locual ta pasando cu trecemento di hende di afo mester bin un cambio pasobra ta door di esaki no tin hende local cu ta haya trabao, segun Diego de Cuba.

E ta indica cu e negociante ta bisa e hende di afo cu e salario minimo ta mas of menos 1700, pero door cu nan tin cu paga permiso, etc., lo kita 500 tur luna for di e persona, pa un periodo di 3 aña, cual ta nifica cu lo keda cu 1200 den su man.
“Si mester entrega un keho of tende nomber di un sindicato, ta bek riba avion pa su pais. E ora e hendenan aki, cual aki ta caminda cu sindicato ta indigna, ta keda traha 3 aña boca cera, ta busca cualkier trabao zwart pa haci riba mercado, sea ta chapi, of haci limpi na cas di hende, pa nan por sobrevivi. Pero e hendenan aki ta keda boca cera. E homber grandi ta abusa un biaha mas di e pober trahadonan” De Cuba a subraya.

Esaki ta locual cu de Cuba, como sindicalista ta condena severamente. El a echa su baina, ta su cuenta, pero e parti laboral a sufri un golpi hopi duro.
“Si ta papiando di 2000 ontheffing, a kita 2000 trabao for di e comunidad Arubano. Esaki ta djis pa e enrikece su mes. E cos aki ta condenabel. Aworaki ta haya cu un prome minister, a sabiendas di loke ta pasando, ta keda bisa cu e persona ta keda cu su posicion como minister y e ta keda ricibi pago, estado den prison.

“Por a mira cuanto caso tabata tin di ambtenaar cu a perde trabao cu nan a echa baina y awor aki, abo como minister tin di haya un trato preferencial? Abo ta keda na final di cuenta responsabel pasobra abo como minister no por firma un documento zomaar, e sindicalista” a expresa.

 

Mester bin varios cambio den nos leynan y vooral den e ley di conducta tambe di ministernan, segun presidente di STA, Diego de Cuba. Tin hopi cos cu a bay for di sla. No por ta asina cu cos asina aki ta pasa y ta haya bo cu un prome minister of un Gobierno ta keda riba un freewheel, manera nada no a pasa. E bagamunderianan ta sigui. Ta cosnan cu segun e sindicalista, den e proximo Gobernacion, no ta importa ken sinta. “Pero e mester bin un cambio radical den e sistema aki pasobra esaki no por. E ta dañino pa e pais. E ta perhudica nos economia tambe. Loke ta pasa ta, cu ta haya cu un situacion cu como Arubiano, ta bay busca trabao y e mesun hende eynan cu a busca 20 hende di afo, ta bisa cu por duna trabao, pero ta pone riba e slip, cu bo ta gana 1700 florin, pero ta 1200 so bo por wordo paga. No por paga 1200. Minimum loon ta 1711. E 20 hendenan aki ta traha pa 1200, kiermen a daña e prijs riba mercado atrobe y ta fomentando cheaplabor. Abo como Gobierno mes ta fomentando cheaplabor, ta unda nos ta bay?. Mester a sinta cu Paul Croes for di April 2016 riba ketenaansprakelijkheid pa loke ta companianan di construccion. Un biramento, un coremento y awe e ta tras di tralie y sindicato a keda sin papia riba e asunto aki”, De Cuba cuestiona.

El a expresa tambe cu Mediador di Gobierno a keda encarga cu e pida aki pa bolbe sinta hunto. “Pero awor aki, nos ta na final di Augustus 2017 y nada no a pasa. Tin leynan cu ta wordo implementa, tin leynan cu ta existi, pero no tin control riba nan. Si tin cu bin leynan pa cambia e sistema aki y pa proteha e clase trahado di Aruba, sigur mester bin un cambio radical den e codigo di conducta di e minister y parlamentarionan, pasobra nos no por sigui asina aki”, e presidente di STA, sr. Diego de Cuba a conclui.

 

- Advertisement -

DUNA COMENTARIO

Please enter your comment!
Please enter your name here