Home Enseñanza Storianan di entusiasmo cerca esunnan cu a drenta ‘GED Program’ pa por...

Storianan di entusiasmo cerca esunnan cu a drenta ‘GED Program’ pa por caba scol

13
0
SHARE
- Advertisement -

ORANJESTAD(AAN)—: Ministerio di Enseñansa hunto cu International School of Aruba a introduci e programa GED, un iniciativa pa brinda un oportunidad pa esnan cu ainda no a logra un diploma na nivel di Enseñansa Secundario, of pa esnan cu a caba un nivel di Enseñansa cu no ta suficiente pa sigui studia na nivel superior, of asta ta personanan cu ta trahando caba pero ta desea di sigui crece na nan compania. Minister di Enseñansa, Michelle Hooyboer-Winklaar ta sostene e programa aki completamente, pasobra na final e studiante lo haci un diploma ekivalente na HAVO.

Reyvick Piña ta un di e personanan cu lo beneficia di e programa aki y ta pensa cu e programa GED lo yud’e pa tin un miho futuro. Nunca el a haya un diploma di scol pero e kier crea un miho futuro pa su mes den e areanan di trabao cu e tin experiencia caba den dje cual ta turismo y horeca.

E motibo pakico e no a caba scol, EPB Horeca, ta pasobra algun maestro a bully su persona. “Mi tabatin juffrouw di scol cu a bisa mi cu nunca lo mi logra nada y cu mi lo ta un persona cu e lo mira banda di caminda ta pidi florin. Mi tabatin un juffrouw cu a yega di dal mi un canti’man. Ora mi a bay geef door na e director, nan a kita mi for di scol pasobra mi a bisa un palabra vulgar despues cu e juffrouw a dal mi”. Reyvick Piña a indica cu a kit’e di scol cu 16 aña y ora el a bay inscribi otro aña, nan a bis’e cu e ta mucho grandi y e no por a bay scol den dia mas.

Segun Reyvick, e mester a bay inscribi na Horeca anochi. E unico opcion tabata bay Avond MAVO. Eynan a mand’e eerste MAVO unda a bay bon pero a bis’e cu no tabatin luga pa mand’e na un klas mas avansa. Otro hoben cu a bin di scol di dia pa anochi si a haya luga den tweede MAVO y esey a kibra su motivacion di sigui bay scol ya cu no tin control riba kico ta pasando, el a expresa. Awo e ta den programa GED cu su ruman homber, kende a pasa den mesun situacion y kende a motiv’e pa bay scol bek. Reyvick Piña ta contento cu e programa GED, pasobra e lo kier sigui studia afo.

Chris Piña, ruman di Reyvick, a sigui bisa cu prome cu e programa di GED e tabata bayendo Colegio dos aña pasa, pero el a dicidi di drop-out pasobra e no a sinti su mes confortabel na scol. Pa loke ta e rekisitonan pa drenta, el a bisa cu esaki a bay facil. El a wordo entrevista di biaha y el a haya e-mail basta lihe cu a acept’e. E programa aki ta na idioma Ingles y esey e ta haya tremendo pasobra e ta miho den Ingles compara cu Hulandes, a expresa.

“Mi plannan aworaki ta pa bay studia afo. Por ta Canada cu ta un di mi prome escogencianan,  Chris Piña a indica.

Banda di esaki, Stanson Tromp, cu tabata den brug klas na Maria College  tabata bayendo bon. Su ruman homber a bay Colegio y semper el a mira su ruman como role-model. Esey a pone den un situacion unda e tabata mira cu su ruman a bay Colegio y el a bay MAVO. El a traha duro y el a logra bay Colegio unda el a realisa cu el a haci un fout. Su prome cifra di Wiskunde tabata un 2.7 y ta e ora ey cu el a ripara cu mester a bay traha mas duro ainda. Sinembargo, cu hopi trabao el a bay over pa HAVO-3.

Den HAVO-4 el a keda sinta. Aunke su actitud tabata positivo, el a dicidi di bay AVOND/HAVO. E prome aña debi na problemanan personal no por a caba scol. E di dos aña, el a logra bay over, pero tabatin dos vak cu e tabatin problema cun’e cu ta Spaans y Economie.

Ya caba e tabatin e programa di GED den su mente y esaki tabata e solucion perfecto pe, a bisa. E ta gusta cu e ta na idioma Ingles y “te awo e no a ni cuminsa y ya caba mi ta stim’e”, Stanson a manifesta. E tabata traha na Parke Nacional Arikok como un ranger destaca, pero e tabata haya fastioso cu e no tin un diploma como backup. Nelson Mandela a bisa cu un diploma ta fundeshi di e exito, el a indica. P’esey el a pensa cu pa e por beneficia Parke Nacional y naturaleza di Aruba, cu ta mas eficiente pa e haya e diploma aki. Su meta y su motivacion ta pa sigui cu e programa y haya su diploma. “Dia cu mi a haya notificacion cu a acepta mi den e programa, tabata un di e dianan mas feliz di mi bida”, Stanson Tromp a finalisa bisando.

 

 

 

- Advertisement -

DUNA COMENTARIO

Please enter your comment!
Please enter your name here