Home Politica Analisis di resultado pa Partido POR

Analisis di resultado pa Partido POR

954
1
SHARE
- Advertisement -

ORANJESTAD   (AAN): Otmar Oduber a haya 4008 voto na 2013, Andin Bikker a logra 3047 mientras cu Marisol Lopez tabata bon pa 1642 voto cu hunto a suma 8697 voto den nan tres. Cu e pensamento ey den mente, nan a pensa di uni pa asina ranca sali cu un partido cu lo ta bon pa 4 pa 5 asiento. Nan no a conta cu pueblo lo castiga nan tur tres y baha nan votonan di 8697 te na 3391 voto, cu ta representa un caida di 61%.

E resultadonan individual a sali diasabra anochi, den cual Otmar Oduber a baha di 4008 pa 1808 voto, un caida di 54.9%. Andin Bikker a baha di 3047 pa 1086 voto, un caida di 64.3%, mientras cu Marisol Lopez-Tromp a baha di 1642 pa 497 voto, cu ta representa un caida di 69.7%.

Ta bisto aki cu e top tres di e partido, cu mester a carga e votonan pa e partido por a sali solido, a wordo castiga di parti votadonan cu menos di mita di e votonan obteni 4 aña pasa. Ta mustra claramente cu pueblo no a aprecia e bulamento di cura, of a tene na cuenta e forma di hiba politica di Oduber, banda di e silencio hermetico di Bikker y Lopez.

Pa Otmar Oduber, e resultado aki ta hibe 8 aña patras, pasobra ta na 2009 e tabatin un sorto di cantidad di voto asina. El a start su carera den AVP na 1997 cu 555 voto, sigui na 2001 pa 313 voto, na 2005 cu 918 voto, na 2009 pa 1647 voto, mientras cu na 2013 el a crece te na 4008 voto pa awor na 2017, cu su mesun partido awor como lider ta cay te na 1808 voto.

El a cay for di e di dos votegetter di Aruba te cu el a sali for di e Top 10 di politiconan cu mas voto riba nos isla. Entre e partidonan cu representacion den Parlamento, e ta e lider cu MENOS voto individual.

Criticonan ta sigura cu Andin Bikker a comete e eror di su bida aki dor di a uni cu POR. E aña aki lo tabata su chens pa crece politicamente, como un berdadero alternativa pa votadonan di AVP y MEP. Sinembargo, el a opta pa laga su partido cay y a uni cu Otmar Oduber cu e mes a catalog’e pa diferente nomber den pasado.

E union aki a cost’e su votonan y su oportunidad di crece politicamente. Pa Andin Bikker e resultado aki ta esun pio den henter su carera politico den PDR, cu a inicia na 2005 cu 1262, sigui na 2009 cu 1621 y na 2013 cu 3047, pa cay bek awor te na 1086 na 2017. Ta momento pa e sinta analisa e resultado aki bon y realisa su eror.

Marisol Lopez tampoco a “score” cu e bulamento di cura di AVP pa POR. E dama a start su carera politico cu AVP, pero como cu e no a haya e number desea, el a bula mesora pa MEP unda el a saca 1538 voto den su prome salida na aña 1997. El a crece mas ainda na 2001 y yega te na 4709 ora cu MEP a drenta Gobierno pa prome bes nan so cu 12 asiento.

Na aña 2005 el a cay poco te na 4392. Pero di eynan problemanan interno den partido y caida di MEP a conduci cu na 2009 el a baha te na 2880 voto. El a bira independiente di MEP, a uni na AVP pa eleccion di 2013 y a logra 1642 voto, mustrando un caida grandi compara cu su votonan tempo di MEP.

Awor cu el a pasa pa su di tres partido politico, esta POR, su votonan a baha di 1642 te na 497 voto riba su nomber. Hecho ta cu el a campaña masha poco tambe y no tabata visibel mes den e campaña completo.

Den e demas candidatonan riba e lista di POR, ta nota cu Alan Howell ta e di 4 votgetter cu 461 voto, sigui pa Joslin Croes cu 238 voto y Kenny Montero cu 130 voto. Figuranan “popular” manera Gregory Miliard a logra saca no mas cu 66 voto y Edjean Semeleer a haya 58 voto so di sosten. E candidato cu MENOS voto riba POR ta Ignacio “Rolando” de la Cruz cu solamente 16 voto.

Asina mes, e realidad politico ta dicta cu POR ta e yabi di e siguiente coalicion cu su 2 asientonan. Sea AVP ta sinta cu nan of MEP, pero sin POR no tin Gobierno. Partido AVP a sali bisa di antemano cu NO ta traha cu POR pa un lista largo di motibo, lagando e unico opcion pa MEP.

Apesar cu algun luna pasa e mesun MEP a entrega un keho penal contra Otmar Oduber na Ministerio Publico, acusand’e di varios asunto ilicito, pa cual e pregunta ta surgi si e lo ta “Ministeriabel” den un siguiente Gobierno.

- Advertisement -

1 COMMENT

  1. Andin Bikker como minister di husticia pa e proximo gobierno. E ta mil bes mihor cu Dowers cu a laga masha hopi di desea.Tambe mester haci investigacion di O.M., WEB hedging , Citgo Aruba ,green corridor,lineal park,Leoncita y su tereno gate, Benny Sevinger etc.,etc. Mi ta pone mi mes disponibel pa cu e departamento di husticia Mericano pa cuminsa investiga e WEB hedging, Citgo deal . e contract di hospital como coordinador gratis pa enhuisia tur esnan cu ta corupto y pone nan tras di trali y tambe paga danjo y perhuisio na e pueblo di Aruba.

DUNA COMENTARIO

Please enter your comment!
Please enter your name here