Home Politica Booshi Wever di PPA/UPP sorprendi cu 13.000 votador ainda ta indeciso

Booshi Wever di PPA/UPP sorprendi cu 13.000 votador ainda ta indeciso

30
0
SHARE
- Advertisement -

ORANJESTAD (AAN): Segun drs. Booshi Wever di PPA/UPP, un encuesta patrocina pa comercio local a conclui cu 18% di e electorado te ainda no sa pa kende nan lo bay vota.

Esaki nifica cu casi 13 mil votador ainda ta indeciso y 13 mil votador ta bon pa 4 asiento.  No ta nada straño cu ainda tin un grupo grandi ta cana rond cu e dilema pa scohe e partido cu nan lo bay deposita nan voto.

Na prome lugar e votador consciente ta comprende cu e siguiente gobernacion lo bay tin un tarea importante pa restablece confianza back den nos democracia,  trece back e orguyo di por a logra nos Status Aparte y cuminsa e caminda dificil pa mehora nos situacion socio-economico. E 4 asientonan aki lo por ta instrumental pa determina ki tipo di gobernacion Aruba lo bay haya despues di 22 di september 2017.

Na di dos lugar pasobra a worde hiba un campaña riba un nivel cuestionabel. Apesar di e situacion precario di nos finanzas publico, a prefera di hiba un politica di polarisacion, division, agresion verbal, atakenan personal y mas importante ainda a prefera di hiba un politica di segregacion.

Aruba ta un isla di apenas 180 km2 y nos isla ta sobrepobla. Segun e ultimo calculo di censo tin alrededor di 110 mil persona inscribi y ainda, segun nos por a comprende, lo por tin rond di 10 mil ilegal ta biba aki. Semper Aruba a yama bonbini na esnan cu den pasado a bin  pa yuda desaroya nos economia.

Mayoria a establece nan mes definitivamente riba nos Isla, a forma nan hogar y a integra nan mes completamente. Despues di nos Status Aparte Aruba a conoce un periodo di crecemento economico acelera. Aruba tabata ser considera y tabata worde promovi den exterior como un paraiso na unda tur hende lo por haya trabao y di tur sorto di forma personanan a trata di drenta nos Isla sea legal, pero principalmente ilegal.

Na 2008 mundo henter y tambe Aruba a worde azota pa un recesion economico y pa colmo Valero tambe a dicidi di cera su portanan. E situacion socio-economico a empeora no solamente na Aruba, pero tambe den e paisnan bisiña loke a impulsa pa mas hende trata di drenta nos Isla en busca di un mihor futuro.

E elecion na 2009 a worde domina pa un paar di topiconan. Na prome lugar e situacion financiero-economico preocupante sigui pa e introducion di e BBO y e supuesto politica di favoritismo di “friends and family”. Sinembargo e topico cu a hala mas atencion tabata e maneho estricto pa duna permiso cu a carga e nomber di “Swiss model”. Hasta e propio partido di e minister encarga cu Dimas, esta MEP, a duna di conoce cu e partido a perde eleccion pa motibo di e maneho estricto di Booshi Wever.

Nos ta 8 aña mas leu y kico nos a constata? Na prome lugar un maneho financiero eroneo a hiba nos Isla na rand di bancarota. Nos mester a permiti pa nos autonomia y dignidad worde atacha cu introduccion di un supervision financiero dicta directamente door di Hulanda. Na di dos lugar e gobierno a dicidi di hiba un “open door policy”.

A stop di controla nos awanan territorial loke a hiba na un aumento di personanan  ilegal, pero tambe a conduci na un maneho basa riba “ambtelijk corruptie” y “mensenhandel”. Gobernantenan y nan compinchi a abusa di e situacion precario di e ilegal y cuminsa haci negoshi lucrativo sin escrupulo. Di e manera aki nan a bin ta actua na un manera inhumano.

Pero e abuso no a caba ey. Politiconan abiertamente a cuminsa dirigi nan mes na e poblacion latino riba nos Isla den e campaña actual, primintiendo cielo riba tera. Eman y Sevinger publicamente ta duna di conoce  cu nan lo agilisa e tramite pa haya permiso. A hasta priminti cu den 3 aña lo por haya paspoort hulandes.

E partido mas grandi di oposicion sin embargo a bay un stap mas leu. Sr. Glenbert Croes a priminti cu lo bin cu un amnestia general y lo permiti “gezinsherenigng” hasta cu e welonan tambe lo worde permiti pa bin establese nan mes aki. Y pa colmo priminti tambe cu ora di otorga un permiso nobo riba esunnan cu haya amnestia, esaki lo ser duna pa 4 aña den un solo tiro. Con populista bo por ta?

E campaña populista aki no solamente ta promove segregacion, pero lo resulta den un aumento di gasto enorme pa nos finanzas publico. Lo drenta por lo menos 40 mil persona extra na nos pais di locual un grupo grandi lo ta hobennan cu lo mester sigui un educacion formal, pues mas school.

Tambe e “welonan” lo mester haya cobertura medico di AZV y tur esaki sin a aporta un solo debchi den e fondo aki, sin papia cu nos tur sa cu e abuelonan aki casi sigur lo tin cualkier enfermedad cronico.  Lo mester construi mas cas pa por acapara e famianan cu mester bin establese nan mes aki y lo bay tin mas auto di e total di 70 mil cu tin caba riba nos Isla.

Y por ultimo lo keda manda placa pa famianan cu a keda na nan pais natal, pues e fluho di devisas lo keda vigente. Y tur esaki pa permiso di trabao na hendenan cu ta gana sueldo minimo. Pues aparte cu ya caba tin un pobreza grandi aki na Aruba, e partidonan populista aki kier importa pobreza tambe.

Ta esey ta loke nos pueblo ta premira pa e siguiente gobernacion? Mas gasto mientras tanto cu nos hobennan no tin trabao, nos schoolanan ta yen, nos studiantenan den exterior y aki no ta haya oportunidad pa drenta nos mercado laboral y sobretodo e magnitud di pobreza cu ta existi aki y cu te ainda ta worde ignora door di politiconan populista. Interes personal y partidista atrobe ta prevalese y no e interes general di esnan cu ta biba riba nos Isla.

Dia 22 ta un dia decisivo, sea bo ta voto pa scapa e pais aki y su pueblo of bo ta vota pa  mas desaster pa nos pueblo. Sea  conciente.

- Advertisement -

DUNA COMENTARIO

Please enter your comment!
Please enter your name here