Home Deporte Cabay nan di Corsow a yega Aruba pa Interpaso 2017

Cabay nan di Corsow a yega Aruba pa Interpaso 2017

46
0
SHARE
- Advertisement -

ORANJESTAD (AAN): Dialuna anochi 7 cabay di Corsow a yega Aruba via barco pa participa na Interpaso. E cabay nan a sali dialuna mainta for di Corsow ariba e barco Don Andres y despues di e viahe di algun ora a yega Aruba. E 7 cabay nan ta trata di cabay nan Paso Fino, procedente di diferente rancho na Corsow. E cabay nan lo competi diabierna y diasabra, y ademas diferente jinete y amazona di Corsow lo competi riba e cabay nan aki diadomingo.

Ta despues di varios aña cu a logra cu Corsow ta trece ehemplar pa competi na un feria di Aruba, y e cabay nan aki lo hasi e competencia mas interesante sin duda. Ta trata di 3 yegua, Princesa de Caucus y La Bella de Venari cual lo competi den 78-100 luna y Salome, cu lo competi den mayor de 100.

Den e machonan tin Odiseo de Alto Vista, un cabay cu a wordo cria door di famia Merryweather na Colombia, a bin Aruba y despues a wordo bendi pa Corsow.

Hunto cu Governador de Venari, e dos ehemplar nan aki lo bay contra e grandinan di Aruba den e categoria di mayor de 100 meses.

Tambe tin El Rey de Jordano, cu lo competi den e categoria di 49 pa 60 luna contra 3 otro potro di Aruba. Un ehemplar interesante ta Tartarin, cu lo sali contra Magico, un cabay cu bon presentacion den pasado. 

Lo mester remarca cu Tartarin ta bin di e mesun criadero y ta mitar ruman di e conocido Tartarina, un yegua cu a titula multiple biaha Gran Campeona na Aruba.

E cabay nan lo ta hospeda na diferente rancho na Aruba. Un danki grandi ta bay na Rancho Monte Azul cu a yuda den e transporte di e cabay nan di waf pa e diferente ranchonan y tambe ta hospeda 6 di e cabay nan. Danki tambe na Villa Floralina pa hospeda e otro cabay di Corsow. Y un danki na Don Andres, Veterinaire Dienst Curacao y Aruba cu hunto a hasi e biaha aki posibel.

- Advertisement -

DUNA COMENTARIO

Please enter your comment!
Please enter your name here