Home Hudicial Castigo di prison pa grupo cu a haci cantidad di asalto arma...

Castigo di prison pa grupo cu a haci cantidad di asalto arma riba grupo di hende di edad

321
1
SHARE
- Advertisement -

Mientras cu e dos muchanan mester wordo interna obligatorio den un institucion

ORANJESTAD – Hues no a sigui completamente e exigencianan pisa di Fiscal contra e grupo di hoben y muchanan cu tabata terorisa San Nicolas caminda a haci un cantidad di asalto arma riba hendenan di edad. Dos di e muchanan lo mester wordo interna obligatorio den un institucion mientras cu e otro dos mester sinta castigo di prison.

E sospechosonan K.P.(26), B.(17), G.(17), H.H.(19) a presenta den Corte pa scucha nan sentencia.

Na comienso di luna tratamento di e caso a tuma lugar caminda Fiscal a bay hopi detaya den e casonan pa mustra e seriedad di esakinan.

** 9 Januari 2017, un pareha di edad a haci denuncia di asalto arma na nan cas. E dama taxista a yega cas algo despues di 1’or di marduga y a wordo maltrata na cabez pa e asaltantenan. Su casa cu a sali pafor pa yuda su señora, tambe a wordo maltrata y menaza cu arma di candela. E asaltantenan a ranca e señora su tas y core bay. Investigacion ta mustra cu esnan cu a haci esaki ta: K.P., H.H. y G. y B. Segun Fiscal, cu e hoben G. a bisa cu bou influencia XTC. Tanto G. como B. tabata arma. Den Corte H. y G. a bisa cu B. no tabata envolvi. Fiscal a bisa cu e no ta tene cuenta cu esaki pasobra nan no a declara como testigo. Fiscal a bisa Hues cu e no ta kere declaracion di nan. Fiscal ta kere cu B. lo a menaza cu morto y pesey nan ta busca manera pa lagu’e afor. Fiscal ta haya cu no ta importante kende tabatin arma, tur cuater ta responsabel di asalto arma na cas di famia. K.P. a facilita e armanan y despues a haya nan bek.

** 4 Januari 2017. Un dama di edad y su casa a denuncia cu 3’or di marduga nan a wordo asalta den nan cas. E dama a keda maltrata na cabez. El a bisa cu e asaltantenan cu arma tabata exigi placa y oro. E homber a bisa cu den camber dos a presenta y ora a menaza cu arma, el a gara e arma. E homber a wordo golpea na cabez cu su baston di cana. Door di esaki el a sufri 3 diente kibra y sla serio na cabez. Fiscal a sigui bisa cu K.P. a mustra e cas unda H. y B. a haci e asalto. H. a admiti cu hunto cu K.P. y B. a haci e asalto. El a bisa cu ta K.P. a bin cu e plan y ta K.P. y B. a drenta e cas y ambos tabata arma. Den Corte H. ta bisa cu e hunto cu K.P. a haci e asalto y B. no ta envolvi. Fiscal no ta kere esaki. Fiscal ta nan tres culpable di asalto arma cu violencia.

** 6 Januari 2017 pa 12.30 di anochi a asalta un homber di edad den cas. Tres asaltante a presenta di cual dos tabata arma y a forza e homber. K.P., G. y B. a haci esaki. G. a bisa cu hunto cu K.P. y B. a bay haci asalto. Nan tres a bay den e camber unda e homber tabata drumi. B. lo a maltrata e homber di edad. Fiscal ta haya cu nan tres ta culpable di asalto arma cu violencia.

HOMBER TA FAYECE

** 9 Januari 2017 pa 12’or di anochi, un homber di 91 aña a bira victima di asalto arma den su cas. El a bisa cu e hendenan a drenta e cas arma y exigi placa. Nan a coy su cartera cu 2200 florin, cu ta su placa di pensioen, y bay cun’e. K.P., H. y B. a haci e asalto arma. P. y B. tabata arma. Fiscal ta haya tur tres culpable di asalto arma. Ta asina cu despues e homber a bira hopi malo y mester a wordo interna den hospital. Lamentablemente el a fayece. Fiscal ta tuma nan na malo cu a laga e homber di edad sufri asina.

** 17 Januari 2017 pa 12’or di anochi, un dama di edad ta spierta door di menaza di homber cu un arma na su cama. E dama a bisa cu en total tabatin 3 di cual 2 tabata arma. Ora el a purba lanta, un a push’e pa e keda den cama. Nan a bay cu joyas y placa. P., H. y G. a admiti y cu B. tambe ta envolvi. Nan tabata sa cu e dama tabata biba su so ya cu su casa a fayece.

** 18 Januari 2017, un homber di 48 aña a haci denuncia cu 3 homber bin riba dje na cu cas y exigi placa. El a bisa nan cu e no tin placa. Un a hasta puntra si e ta taxista y el a bisa cu no y cu e bisiña ta taxista. Nan a cana bay. H. a bisa cu P. y B. a haci’e. P. y B. tabata arma.

** 23 Januari 2017, un homber di 70 aña a wordo asalta ora e tabata canando bay cas. Nan a dal’e cu algo na cabez y bay cu su tas. Door cu auto a pasa, e asaltantenan a core bay. P. y H. a haci esaki. E victima a bisa cu el a scucha dos tiro.

Ta asina cu despues di investigacion a haya P. cu un arma di candela cu bala na su cas.

EXIGI CASTIGO

Fiscal a mustra cu K.P. a haci 6 asalto arma y un intento, H. a haci 5 asalto, G. 3 asalto y B. 6 asalto. El a bisa cu e ta tene cuenta cu a menaza cu minimo 1 arma di candela. A haci asalto den casnan caminda hendenan di edad ta biba. A usa violencia innecesario. E homber di edad a fayece no mucho despues di e asalto. Un otro victima a keda hospitalisa cu sla serio na cabez. Tur e victimanan a pasa e susto di nan bida y a kere cu nan lo muri. Na opinion di Fiscal, en total ta 7 asalto arma den un luna di tempo.

Fiscal a tuma K.P.(26) na malo cu el a bay cu hobennan cu ta 10 aña mas jong cun’e pa haci asaltonan.

E hoben B. ta menor di edad. Fiscal a mustra cu B. ta un ehempel con comunidad a laga e mucha cay. Sinembargo e mester ta responsabel pa su actonan. Psycologo a mustra cu e ta menos responsabel. Fiscal ta teme cu si no haci nada cu B. e lo bira un criminal peligroso. E ta haya cu mester actua pa trece B. bek riba e caminda drechi. G. tambe ta menor di edad. Tambe tin indicacion cu mester guia den un institucion na Hulanda. G. a admiti y ta para responsabel pa su actonan.

Fiscal a exigi 16 aña di prison pa K.P., 8 aña di prison pa H.H. y cu obligatoriamente G. y B. mester wordo interna den un institucion sea na Curacao of Hulanda.

SENTENCIA

Hues a dicta sentencia caminda e ta haya e grupo aki culpable. Sinembargo Hues no a sigui Fiscal completo den su exigencia.

Hues a condena K.P. na 8 aña di prison, kitando e tempo cu e ta sera. Pa H.H., Hues a bay di acuerdo cu peticion di abogado mr. Faarup pa aplica e ley hubenil y a condena H.H. na 2 aña di prison di cual 3 luna ta condicional cu un tempo di prueba di 2 aña. Pa loke ta e dos menor di edad esta G. y B., Hues a aproba e exigencia di Fiscal pa obligatoriamente nan wordo interna den un institucion sea na Curacao of Hulanda.

Mirando e diferencia grandi den castigo di prison pa K.P. y H.H., e pregunta ta si Ministerio Publico lo bay apela. Manera ta conoci, den un periodo di 2 siman e apelacion mester keda entrega. Tempo lo mustra si e caso aki ta bay Corte Superior of no.

- Advertisement -

1 COMMENT

  1. Abogado Mr. FAARUP ley Hubenil mester wordo poni den un exepcion den e casonan aki.

    E acto di e criminalnan aki ta hopi serio.
    Otro cos pueblo di Aruba mester exihi pa pone nomber completo y potret di esnan cu haci actonan negativo contra pueblo. E ley chombom mester cambia cu pa esei. Criminalnan ta ser proteha mas cu e victimanan.

    Danki pa e espacio.
    USA

DUNA COMENTARIO

Please enter your comment!
Please enter your name here