Home Turismo Coordinador di Aruba Reef Care Project 2017 ta cla pa e reto...

Coordinador di Aruba Reef Care Project 2017 ta cla pa e reto y kier envolve mas hoben

57
0
SHARE
- Advertisement -

ORANJESTAD   (AAN): Diadomingo prome di October ta bay tuma lugar e di 23 edicion di Aruba Reef Care Project, organiza pa Aruba Reef Care Foundation (ARCF).

E sitionan cu lo bay cubri ta entre otro tras di Faro California, Arashi, Boca Catalina, Malmok, Hadicurari, e beachnan dilanti di e hotelnan na Palm Beach, Eagle Beach, Surf Side, Mangel Halto, Baby Beach, Santana di Cacho, Grape Field, Boca Grandi, area rond di Neptali Henriquez Park pa cas di Gobernador y tambe den e area di Bushiri Beach Resort.

Neptali Henriquez Park ta atrobe e centro di operación. For di aki lo coordina e accion y tambe lo ta e punto central pa acumula e datonan.

E acto ceremonial di clausura y gradicimento na boluntarionan tambe lo tuma lugar na e sitio mes,  Diadomingo atardi dia 1 di October proximo.

Durante un conferencia di prensa, project coordinator di  ARCF pa 2017 Veronica Perez a hiba palabra.

E hoben alumno di Colegio Arubano di 16 aña a splica cu e ta un boluntario pa 10 aña caba.

Segun e hoben, su rol ta pa enfoca riba sponsorship, cu ta inclui e asina yama ‘lunch boxes’ y cahanan di refresco for di entre otro e hotelnan riba nos isla.

“Te ainda nos tin 675 lunch box y 40 caha di refresco, mientras cu mi ta purba haya tambe for di e hotelnan ‘dinner for two’ of ‘weekend stays’ pa rifa pa e boluntarionan”.

Esaki segun e coordinador di e proyecto, kende a sigui bisa cu apesar cu cos a cuminza un tiki lento, e ta bay logra su meta.

DIARIO a puntra e hoben, con e ta wak e hubentud su actitud y pensamentonan pa loke ta limpieza di nos beach y costanan, cu ta e meta principal di e Reef Care Project.

Segun juffrouw Veronica, tin hopi hoben cu kier yuda cu un proyecto asina, pero mester tene cuenta tambe cu e hecho cu varios di nan ta ocupa entre otro cu deporte, cu ta pone cu nan lo tin menos tempo pa aporta.

“Mi ta kere si cu hopi kier yuda, pero tin biaha nan no por of nan no sa con”.

“Pesey mi ta sugeri pa mas school cuminza yuda trece mas concientizacion ainda riba e importancia di tene nos isla limpi”.

Esaki segun e coordinador di proyecto, kende a sigui bisa cu mester bin por ehempel mas presentacion na schoolnan, pa e muchanan cuminza tuma accion tambe.

“Mi ta wak cu un grupo di mucha di Colegio Arubano a cuminza hasi trabao di boluntario y mi kier pa mas otro mucha tambe bin yuda”, segun Veronica.

Durante e conferencia di prensa, presidente di Aruba Reef Care Foundation Castro Perez a haci un apelacion na henter comunidad pa conhuntamente manifesta nan compromiso cu medio ambiente pa yuda mantene nos beach y lama limpi.

El a indica tambe cu e operadornan di watersport a compromete nan mes pa yuda cu e operacion den awa. Organizadornan ta invita tur grupo ambiental, clubnan social, scoutnan, schoolnan y tambe boluntarionan pa contribui na e campaña.

Esnan cu kier participa por tuma contacto cu nan operador di deporte aquatico faborito of tuma contacto cu ARCP na 586-0820/ 564-4485 of 740-0797/ y puntra pa Castro Perez of Veronica Perez.

Tur participante, ademas di e satisfaccion di haci Aruba limpi, ta ricibi un t-shirt pa un donación di AWG. 5.00, lunch box, soft drinks y durante e celebracion final Diadomingo 1 di October na Neptali Henriquez Park, lo ricibi un certificado di aprecio y por participa na rifa pa diferente premio atractivo.

- Advertisement -

DUNA COMENTARIO

Please enter your comment!
Please enter your name here