Home Cultura Den Centro di Bario Brasil dia 1 di October lo celebra Dia...

Den Centro di Bario Brasil dia 1 di October lo celebra Dia Internacional di Hende Grandi

43
0
SHARE
- Advertisement -

Radio Telethon pa documenta Dande combina cu Feria Folklorico Arubano:

ORANJESTAD (AAN) – Diadomingo otro siman, dia 1 di October cu ta wordo celebra e Dia Internacional di Hende Grandi, na honor di nos baluarte cultural sr. Vicente Ras, ken dia 27 di e luna aki ta cumpli su 87 aña di edad, y ken ta e unico cantado di “Dande di Tambu” na Aruba, lo tin un Radio Telethon pa documenta Dande, combina cu un Feria Folklorico Arubano.

E evento ta gratuito. E transmision lo tuma lugar for di Centro di Bario Brasil entre 10 or di mainta y 8’or di anochi.

E Radio-Telethon ta pa recauda fondo pa por realiza un documental cinematografico di nos tradicion di Dande.

E evento lo wordo transmiti via Tele Aruba, Radio Power FM, Radio Latina y Top 95. Lo tin entrevista cu Vicente Ras, gruponan di baile y gruponan tipico, ademas cu diferente organizacion cu ta traha na bienestar di nos hendenan grandi.

Den e feria folklorico lo tin presentacion di gruponan tipico di Aruba, entre otro: Sodo y Cuero, Grupo Famia Uni, Grupo Tipico Alegre Cadushi Largo Aruba (TACLA) y Grupo Tipico Pegasaya.

Tambe tin participacion di e gruponan di baile: Rosea Cultural y Betty Werleman y su tambu.

Ademas lo tin exposicion di trahenan tipico di Aruba y di instrumentonan di gruponan tipico, bendemento di cuminda crioyo manera sopi, bonchi cora cu funchi y frekedel cu pan bati; benemento di mata di Aruba manera Aloe y yerb’ i hole. Lo tin weganan di antes pa mucha, y pa hende grandi tin competencia di djul. Ademas, un torneo di domino.

Dia Internacional di Hende Grandi lo wordo celebra tambe cu exposicion di organizacion y instancianan trahando na bienestar di nos grandinan, manera Fundacion Cs Marie, Funari, Departamento di Asunto Social, SABA, OPPA y e gruponan social pa hende grandi, UNESCO y Cede Aruba.

- Advertisement -

DUNA COMENTARIO

Please enter your comment!
Please enter your name here