Home Salud Desde 2008 e ta alertando Gobernantenan riba e crecimento drastico di Problemanan...

Desde 2008 e ta alertando Gobernantenan riba e crecimento drastico di Problemanan Mental

44
0
SHARE
- Advertisement -

Neuro-Psychologo Dr. Dimitri Di Carlo (PPA):

ORANJESTAD (AAN): Segun Dr. Dimitri Di Carlo di PPA, algun luna pasa Aruba a ser sacodi atrobe cu un noticia tristo, unda un pashent di PAAZ cu problemanan mental a asesina un agente policial na Boegoeroei.

Ta ser bisa cu e persona lo no a tuma su “remedi” y esaki a causa cu el a “flip” y bati e agente policial cu un bloki te mate. Aruba henter ta den shock. Kico a pone e persona aki comete un acto asina? Esaki no ta prome caso. Hopi di nos por corda na April 2008 unda un pashent di PAAZ, Sr. Eugene J. Lampe a comete un masacre matando tres persona, su mama, su tata y su ruman. Esaki a bay den historia como e “Macuarima Massacre”.

Recientemente mi a lesa riba Facebook di un hoben di apenas 15 aña kende supuestamente tabata huma marihuana y terorrisa su mama. Falta di atenshon y gia familiar? Falta di amor parental? Cualke sea cu ta e contesta, su comportacion abera no ta un motibo pa e worde interna den PAAZ pa tratamento.

Loke hopi hende no sa ta, cu a para bira cu “problemanan di comportashon” ta worde categorisa como problemanan mental cu ta rekeri tratamento psychiatrico, aunke esaki no ta e caso. Asina bo tende di un caso di comportacion abera, bo ta tende cu e persona a worde interna despues den PAAZ. Una vez un hende drenta PAAZ nunca mas e lo sali mescos. Su cerebro a ser contamina y toxica cu chimiconan peligroso. Mediconan, Polis, Recherche y hasta Trahadornan Social lo laga interna un persona cu “a flip” den PAAZ. Pakico? Nan ta worde interna pa problemanan cu por a worde resolvi si e pashent a recibi coaching, counseling of therapia empatico embes di un “chemical cocktail” den PAAZ.

Na momento cu un persona sinti su mes down y sin animo e ta bay su dokter di cas y ta conta e dokter con e ta sinti. E dokter, sin ningun experiencia clinico den problemanan mental, ta receta un of mas neuroleptica den forma di Antidepresiva, Sedativa, Stabilisante y Anti-anciedad. Dokternan di cas ta poniendo tata, mama, yiu y hasta hende biew riba un of mas medicamento. Tata ta usa Viagra, Truxal of Alprazolam (Sedativa), mama ta usa Anafranil (Antidepresiva) of  Abilify (Stabilizador) y e yiu ta halto riba Ritalin. Esaki ainda ta un “understatement”! E situacion ta hopi mas critico!

Tin demasiado hende ta tumando un of mas medicamento chimico tur dia pa un “desorden emocional”. Con por ta posibel cu nos tin asina tanto hende cu problemanan mental of desordennan emotional den nos sociedad? E aspectonan principal den nos sociedad cu ta  hunga un rol den esaki ta pobreza, desesperacion, conflicto familiar, perdida di trabao, falta di auto-estima, inseguridad pa cu futuro, etc. Pero con nos a yega asina lew di tin tanto hende cu desturbionan mental riba un isla asina chikito? Paisnan unda tin probresa real no tin tanto casonan di problemanan mental manera nos tin aki na Aruba.

Loke mi a bin ta ripara desde 2008 ta cu dokternan di cas ta e causantenan principal di e crecemento di problemanan mental riba nos isla. Di con? door di recepta neuroleptica pa desturbionan emocional sin conduci ningun tipo di test, sin tin conocimento di e mente di hende y sin sa nada di psychologia clinico. Na 2008 caba mi a puntra si por ta posibel cu e uso di psychopharmaca tabata e causa tras di e Macuarima Massacre. Tur mi research a hiba na tal direccion. No solamente esey, ta Sr. Eugene Lampe mes a declara den corte, den presencia di psychiater di PAAZ, cu e medicamentonan cu e tabata tuma a pone bira agresivo, a pone tende stem, y bira despues asina desespera y comete acto asina. Den corte e’la acusa su psychiater(!) di a dune demasiado medicamento y a pidi huez pa investiga e psychiater. Huez a nenga su peticion y nunca mas ningun hende a pensa mas riba e asunto!

Estudionan conduci pa e National Institute for Mental Health na Merca ta conclui cu antidepresiva tin potencialnan di actonan suicidal y di matansa. E documento scientifico ta bisa cu tur pscyhopharmaca (Prozac, Zoloft, Paxil, Luvox, Thorazine, Romeron, etc.) ta produci contra-efectonan peligroso pa salud di hende, manera anciedad, agression, delirio, hysteria, paranoia, etc., y si e medicamentonan aki worde mescla cu otro substancianan manera alcohol, neuroleptica, lithium, sleeping pills, painkillers, y otro trankilisantenan, nan por bira hopi peligroso hasta mortal.

Desde cu antidepresiva a reemplsa sedativa, tin mas comportacionan destructivo, agression y violencia. Hopi hende ta keha di comportacionnan violento despues di a usa antidepresiva. Segun e Food & Drug Administration (FDA) tin mas di 9 miyon mucha y hobennan cu ta adicto na antidepresiva, manera Zoloft, Paxil, Effexor, Luvox y Celexa y desde cu Prozac a subi mercado Mericano na 1988, tabatin 46 casonan di masacrenan na schoolnan involucrando 48 hoben y adulto. Desde esaki FDA a cuminsa un campaña pa alarma e sociedad di e peligronan potencial di antidepresiva. Mas di 90% di e actonan di violencia cu a sosode na un school americano tin un droga psychiatrico como motibo.

Desde 2008 mi a cuminsa alerta e pueblo y hala atenshon di nos Gobernantenan di MEP y despues AVP, cu dokternan di cas ta recetando mucho neuroleptica y ta venenando e cerebro di hende y creando un epidemia silencioso: problemanan mental y destubionan emocional den pueblo. Bastante anciano ta worde venena cu diferente tipo di chimico, hasta muhernan na estado ta worde intoxica cu antidepresiva. Pashentnan cu Altzheimer ta ser usa como objeto pa experimenta cu neuroleptica. Dokternan tin un pildo pa cada dificit di emocion. Ningun hende ta scapa! Usando e dokternan di cas (no tur!), e companianan cu ta bende remedi ta haciendo un negoshi cu salud mental di nos pais. Aunke dokternan di cas no sa nada di problemanan mental of desordennan emocional di hende, nan ta preskirbi “neuroleptica” of “trankilisante” enbez di referi e pashent prome pa un psychologo y laga e psychologo saca afor si e pashent mester di therapia of un psychiater!

Politiconan mester cuminsa informa nan mes riba enfermedadnan mental y desordennan emocional, ya cu esakinan ta un menaza pa un sociedad. Un sociedad cu no ta den su sano huicio, ta un menaza pa e futuro di un pais. PPA ta boga pa un estudio dynamico ser haci pa evalua e calidad y categoria di nos cuido di salud mental na Aruba. Un sociedad cu tanto enfermedad mental y desordennan emocional no ta pro-ductivo ni pro-activo. Pesey nos di PPA ta boga pa un mihor cuido y trato di pashentnan cu desorden mental/emocional. Mester bay controla pakico dokternan di cas ta receta psychopharmaca asina liher embez di referi e pashent pa un psychologo prome.

Tur cos ta cuminsa cerca e dokter di cas! Tambe lo mester evalua e calidad di servicio y e manera cu pashentnan ta ser trata den PAAZ. Aki PPA ta boga pa un “Ombudsman” den Mental Health: pa controla e organo di salud mental y pa proteha e derecho di e pashent y garantisa cu e derochonan di e pashent no worde viola. Tambe pa controla si e trato cu e pashent ta recibi ta conforme cu leynan international y posibilidadnan di cuido di salud mental. PPA lo bay crea un clinica special unda e pashentnan cu desordenan mental por recibi un tratamento “holistico” y “diversifica”, unda e pashent ta central, unda e lo worde trata cu carinjo y cu hopi atenshon! Un clinica unda nan ta worde trata cu amor, mas humano y mas honesto. PPA lo bay LEVEL-UP nos systema di salud mental publico y zorg pa crea un sociedad cu hendenan stabil, kendenan ta balansa emocionalmente.

 

- Advertisement -

DUNA COMENTARIO

Please enter your comment!
Please enter your name here