E tempo cu Aruba tabata mas cerca di Hulanda cu nunca

    397
    0
    SHARE
    - Advertisement -

    (Saca cu permiso, for di manuscrito di e buki “Color di biento”, di Juby Naar)

    Na 1953 Februari cu Hulanda a psa den su perido mas difícil cu locual a conoci  awe como De Grote Overstroming, Aruba a yuda inmensamente. E manera cu Aruba a movilisa p ayuda tabata masha admirable y den conversacionnan mi a mustra esnan cu a scucha cu esaki ta locual mi kier mira aki p ayuda St. Maarten. Hopi di nan nunca a tende di e sucedido na Hulanda pesey mi ta publike aki manera publike den e buki di mi.

    (E fotonan aki ta di Internet di site Grote Overstroming 1953)”

    “E publicacion aki ta ser haci den e edicion aki ya cu fin di otro luna lo ta 55 aña despues cu Hulanda a conoce “De grote overstroming” e asina yama “Watersnood 1953” y pa nos corda con e situación tabata na Aruba despues di a tende di esaki y con Aruba a actua.

     

    *** Mi ta corda con mi mama tabata na yoramento, y bisiñanan tabata papia di e desgracia grandi, e sucedido horibel cu a tuma lugar na Hulanda ni mucho dia despues cu m’ a cumpli 10 aña di edad. M’ a mira mi mama ta empakete pañanan cu m’ a haya pa mi cumpleaño como regalo, tambe pañanan di mi rumannan, –tur locual e por a haya di su mes y di mi tata–, y nan tabata bay den caha bon mara pa pickup of truck pasa busca.

    Pakico skirbi e historia aki? Pasobra papiando cu cantidad di hende, mi a ripara cu no ta conoci na Aruba awe, kico Aruba a pasa aden tempo di e desaster mas grandi na Hulanda, y cu ta solamente na scol muchanan ta siña den historia di Hulanda, cu Hulanda a conoce e tragedia di 1953. Muchanan di ultimo 30 pa 40 aña a siña algo masha chiquito y nada mas. Di Aruba nan no sa mes kico a pasa y mayornan y abuelanan mes ta corda masha poco, pesey mi a cuminza move riba e periodo aki.

    Mi ta conta di locual mi por a corda como mucha, y pa trece e storia mas completo pa Aruba no lubida, m’ a sinta dianan largo den Biblioteca Nacional di Aruba pa saca for di corantnan locual mi no tabata tin, pa laga e storia aki keda na bida cerca nos hendenan cu a pasa den e periodo ey y pa e generacionnan cu no ta na altura di e parti bunita di historia di nos isla y con nos a move pa yuda nos prohimonan.

    OVERSTROMING

    Tabata na cuminsamento di februari 1953 cu Hulanda a conoce un di su tragedianan mas grandi, despues cu un tormento di bientonan cu forza di orcan a azota Hulanda, Inglatera y parti di Alemania.

    Dijknan a kibra na Hulanda y esey nos a bin conoce despues como “De Grote Overstroming”.

    E desaster aki, cu gran parti di Hulanda bao di awa, a trece Aruba mas cerca di Hulanda cu nunca. No solamente Aruba, pero tambe e otro islanan hulandes den region di Caribe.  Tabata casi 2 aña despues, cu a firma e Statuut, esta dia 15 di december 1954.

    Lama a habraca e dijknan y gran parti di Hulanda tabata bao di awa.

    Net e tempo ey riba e islanan aki e topico politico tabata e separacion cu Aruba tabata busca for di loke tabata ser considera “e gara di Corsou”.

    Cola Debrot, cu tabata na Inglatera y cu mester a tene un charla riba derecho di autodeterminacion, a cambia e charla pa un mensahe pa islanan  Hulandes den Caribe. El a pone nos na altura di kico ta pasando na Hulanda y pa cuminza pone man na obra.

    Na Aruba unda e mensahe a yega bon cla,  no a dura mucho cu Bestuurscollege a nombra un Comision di desaster cu Gezaghebber Kwartsz como president y cu entre otro den dje Jos v.d. Schoot, Alida Lampe, Ernesto Petronia, Michael Kuiperi y varios otro personahe. For di e comision aki a sali diferente sub comision riba nos isla y ademas di esey, tur organisacion, club y instancia a cuminsa move pa yuda Hulanda. Movilizacion a cuminza na Aruba.

    Via radio Curom (Awe Z-86) , di Corsou, tabata scucha transmisionnan dia aden dia afo di desaroyo na Hulanda y dia pa dia e noticianan tabata bira mas tristo debi na e cenenares di hende cu a perde nan bida y e decenas di mil hende cu a perde nan propiedad y tur locual nan tabata posee.

    E movilisacion na Aruba a cuminza duna su fruto y por bisa cu ta cada persona riba Aruba a biba cu Hulanda for di e prome momento. Tur conversacion tabata draai rond di e desaster na Hulanda unda hopi hende tabata tin familia y tambe tabata tin studiantenan.

     

    DI STAMPIA PA CINTA ORANJE

     

    Mi ta corda con a cuminza cu benta di stampia special na scolnan, pero apart di esaki stampia tabata wordo bendi tambe na casnan. Ta casi tur hende cu tabata por, a cumpra stampianan. E recaudacion tabata pa bai den e fondo pa “Yuda Hulanda”. Cada mucha tabata sinti su mes orguyoso di tin e stampianan aki y den hopi cas di familia nan tabata pronk riba bukinan, na glas di cashinan, na porta y bentana di cas pa tur hende mira, na bentana y windshield di auto.

    Den gobierno, ambtenaarnan a yega asina leu cu nan a combini pa firma documento pa kita cierto suma di nan salario. Tur a duna sin keha pasobra nan sa unda e placa ta bay y un ambtenaar e tempo ey tabata un figura honroso, admira y respeta.

    Miembronan di Eilandsraad a dicidi di haci mescos y e decision tabata cu nan lo  no cobra nan presentiegeld y a entrega esaki den fondo pa Hulanda dunando asina e bon ehemplo di gobernantenan.

    Clubnan deportivo y social, y tambe organizacionnan di deporte no a para keto tampoco. Tur a pensa con nan lo por yuda cu algo y kico pa haci pa gana placa pa Hulanda.

    Na Caribe Club a cuminza cu recaudacion deportivo, cu wega di basketball entre e rivalnan mas grandi e tempo ey, RCA contra Caribe y esaki a conduci cu  Aruba Basketball Bond a dedica tur fondo recauda di su weganan e tempo ey na e fondo pa Yuda Hulanda.

    Arubaanse Voetbalbond tambe a cay aden y hunto cu Stichting Sport Stadion a hinca man den nan tesoreria y contribui en efectivo.

    Wega di futbol di un torneo di 4 pais cu tabata tuma lugar, a wordo dedica na Hulanda. Recaudacion di e wega entre Aruba y Suriname, cual a ser gana pa Aruba, a bay pa e fondo.

    Directiva y miembronan di clubnan social riba nos isla a cuminza reuni y planea  y clubnan social tambe a cuminza tuma accion pa yuda. Suriname Club mes a tene actividadnan cu a logra mil florin na recaudacion .

    Agencia di cervez Heineken a pone 100 caha di cerbez disponibel den stadion pa wordo bendi durante wega di futbol y cu e recaudacion lo bay pa ARHEN. Esaki lo a trece aden 1800 florin.

    Aruba Tivoli Club a organisa un fiesta bailable publico. Tabata un di e prome actividadnan di e club, caminda tur hende tabata bon bini, pa bin balia cu musica di Sonora del Caribe. Aruba Tivoli Club tabata conoci como un club social unda solamente miembronan y nan invitadonan por a drenta y participa na nan actividadnan. Pero pa e operacion di yuda Hulanda, nan a haci excepcion pa e fiesta bailable, cu porta habri pa tur hende.

    Esaki a habri caminda pa clubnan priva tambe organisa fiestanan bailable cu recaudacion special pa victimanan di e desaster na Madre Patria. Den tur distrito clubnan a cuminza tene fiesta y e bandanan local a contribui tocando sin cobra pa e recaudacion di e accion.

    Lago Club cu tabatin e fama di bingo cu mihor premionan na Aruba, a tene un anochi special di bingo den cual cada premio converti den efectivo, a bai pa e fondo.

    Den comercio a lanta un sub comision y a wordo organisa tambe un autosterrit, mientras a bira conoci cu comercio na Corsow bao direccion di Chumaceiro a haci un coleccion y sigura un miyon florin pa Hulanda. Un suma cu pa e tempo ey tabata di balor inmenso.

    Pa muchanan e tempo ey, e placer tabata e stampianan menciona,  cu nan a cumpra na scol, y despues a bini tambe bendemento di cinta oranje y cinta rood wit blauw na feneta y banderinnan cu por a cumpra pa pone na auto.

     

    CADA HABITANTE A TRAHA PA HULANDA

     

    Mescos cu awendia impresarionan a trata na yega na tur clase di actividad pa gana placa, den e simannan di preocupacion aki, tur organizacion tabata pensa kico nan lo por haci como actividad pa logra recaudacion di placa.

    Anochinan di pelicula a wordo organiza den barionan y den teatronan di cine cu recuadacion special pa Hulanda. Meneer van Zijl di Commandeur Pieterboer School a tene anochinan di pelicula y na Playa Juliana School a organisa Bazaar.

    Don Bosco School y St. Augustinus College na San Nicolas tambe a tene anochinan di pelicula logrando algun cien florin.

    Padvindernan a subi caya pa recauda loke familianan kier duna como contribucion. Muchanan den welpen y pavinderij, tambe kabouternan y e padvindsternan a recauda riba caya 4000 florin.

    Recaudacion special a bin tambe di propietario di Trocadero, ora cu a cambia nomber di Flamingo Room pa Trocadero, banda di Teatro de Veer.

    Refineria Lago a dicidi di rifa un auto, mientras cu den Esso Club a ser teni bingo special y Marine Club a tene fiesta bailable.

    Empleadonan di Lago pa medio di un asina yama “Employee Committee for Holland Disaster Relief” a bai di acuerdo pa den dos luna kita cierto suma di nan salario. E localnan so, e arubianonan trahando cu Lago, a entrega mas di 33 mil florin. E asina yama “Foreign Staff” a haci nan recaudacion apart.

    Gobierno di Aruba no a keda afo tampoco pasobra Bestuurscollege a dicidi di haci donacion di 55 mil florin basa riba un florin pa cada habitante di Aruba.

    Organisacionnan di damanan den Sero Colorado a tene un exhibicion di flor y a recauda 500 florin pa e fondo pa Yuda Hulanda.  E agencia di biahe KNSM a dicidi di organisa un rifa y a ofrece varios biahe den barco di turista, eerste klas como premio pa e ganadornan di e diferente biahenan.

    Aruba tabata riba abao den e prome simannan despues di e prome impacto di e tormento na Europa y cu a asota Hulanda severamente cu su bientonan y su inundacionnan masal. Tabata parce cu cada habitante di Aruba tabata traha pa Hulanda y cu 24 ora pa dia e pensamento di tur hende tabata “Hulanda, Hulanda y Hulanda”.

    Den individuonan por menciona e conocido Jan Meelis kende como hulandes hoben na Aruba tabata tin un di e prome motocicletanan Harley Davidson cumpra na Aruba Trading y cu el a dicidi di bende esaki y haci donacion di e placa pa yuda e fondo pa Hulanda.

    Hende tabata papia solamente di esaki como topico y di locual ta tumando lugar y kico nan por a lesa den corantnan Amigoe di Corsow y Beurs en Nieuwsberichten na Hulandes tambe Arubaanse Corant na Papiamento, y scucha na Radio Curom of Radio Hoyer di Corsow. Ta na 1954 Aruba a haya su prome dos emisoranan.

     

    ARUBA SU DONACION A BAY PA ALEMANIA

     

    Na scolnan e topico “Hulanda” tabata topico di dia y den cada les; “Hulanda ta bao di awa; yen di hende a hoga; nos a duna esaki, nos a duna esaya, y kico nos lo sigui haci”.

    Specialmente e presentacion di pelicula den barionan tabata di interes grandi cerca mucha y bendemento di stampia, streki, banderin; bini scol cu blekinan di cuminda etc.

    Na Santa Cruz sr. Silvester Vrolijk a presidi un comision cu actividadnan special. Un di nan tabata anochi di obranan teatral den Club di Pastoor , mientras cu  Trappers Club cu tabata e club di deporte special, tambe tabatin bendemento di streki oranje y streki rood wit blauw.

    POVA Club y Suriname Club a colecta centenares di florin tambe di actividadnan special, mientras cu Arend Colony Club tambe a entrega mil florin di placa recauda cerca su miembronan cual a bai den e fondo di Comunidad Britanico cu a ser yama “Flood Relief Fund”.

    E pregunta aki lo ta: kico e mariniernan hulandes na Aruba a haci e tempo ey? E contesta ta cu trucknan di Marinierskazerne a bira vehiculonan mira diariamente riba camindanan rond di nos isla buscando cahanan di paña y di comestible cu tabata ser manda Hulanda. Dia y anochi por a mira e trucknan aki ta move riba careteranan. Tabata parce cu e camindanan di Aruba a wordo construi specialmente pa trucknan di mariniernan ya cu e vehiculonan tabata domina e camindanan.

    Vliegveld Schiphol no a cai bao di e luganan di desaster y tabata habri durante tur e simannan di tragedia hulandes pa ricibi e yudansa cu tabata yega pa Hulanda.

    Un informe cu no a cay mucho na agrado e tempo ey tabata ora cu rumor a core cu donacionnan di Aruba a bai pa Alemania. Na Aruba no tabata conoci cu parti di Alemania tambe a sufri cu e tormento cu a asota Hulanda tambe, y cu hasta Hulanda a delega parti di yudansa cu a haya, pa yuda na Alemania. E informe aki a crea e rumor, cu locual Aruba a manda pa Hulanda a bai Alemania.

    E instancia tras di e yudansa na Aruba tabata carga nomber di ARHEN cu tabata di “ARuba HElpt Nederland”.

    Un instancia di gobierno cu a traha hopi duro dia y anochi tabata polisnan di tanto Playa como San Nicolas. E polisnan di San Nicolas tabata pasa cu truck den tur bario di San Nicolas recauda loke e pueblo kier duna y na warda di polis e señoranan tabata empakete cahanan den cantine. Nan tabata traha cu dos warda pa dia. E prome cargamento di polis di San Nicolas pa vliegveld, pa KLM hiba Hulanda, tabata consisti di 5 truck yen y despues a manda dos tonelada di articulo mas.

     

    RUFO WEVER, PADU LAMPE Y EDWIN ZICHEM

     

    Musicalmente tambe Aruba a contribui ya cu Aruba Recording Company a graba un disco cu tumba, cu musica di Sonora Antillana. E cantante tabata Edwin Zichem, pianista Padu “del Caribe” Lampe y cu Rufo Wever como areglista. E cancionnan graba tabata “P’arib’i Ponton” y “Elenita”, cual disco den tempo masha cortico a wordo bendi por completo.

    Un disco graba cu discurso di Reina Juliana relaciona cu e tragedia na Hulanda tambe a keda bon bendi na Aruba y como obheto di recuerdo.

    Aruba tabata bao di gara di e tragedia aki, y pa muchanan e placer di por a yuda tabata grandi. Cada bleki di corned beef, soseishi, of otro sorto di bleki di cuminda tabata manera oro pa muchanan hiba scol pa contribui y sinti nan mes orguyoso. Orguyoso tabata pa cana tambe cu feneta cu cinta oranje of rood wit blauw na camisa of blusa.

    Esaki tabata prome biaha cu henter e isla y por bisa, “cada cas of cada familia” a duna y duna pa yuda Hulanda. Nunca mas despues di e dianan aki a mira un movilisacion asina grandi pa yuda nos prohimonan riba e isla aki.

    Ta hopi mas organisacion, gruponan y instancianan tin cu a contribui y a traha duro na Aruba, pero tur tabata cu e mes meta: “Yuda Hulanda cu ta sufriendo”.

    Henny Eman e tempo ey a manda telegram di condolencia pa La Reina y no a dura mucho tampoco cu el a ricibi un telegram di contesta cu masha masha gratitud di parti Hulanda pa e contribucion y e yudansa grandi cu Aruba a duna Hulanda.

     

     

     

     

    - Advertisement -

    DUNA COMENTARIO

    Please enter your comment!
    Please enter your name here