Home General Evento pa yuda damnificadonan di Sint Maarten a bay exitoso

Evento pa yuda damnificadonan di Sint Maarten a bay exitoso

111
0
SHARE
- Advertisement -

ORANJESTAD   (AAN): Durante dia di diasabra, 9 di September, tabata tin un recoleccion di productonan di prome necesidad, paña, etc. na Theresita Center, caminda cu un grupo di voluntario, consistiendo di personanan kende ta for di St. Maarten, biba na Aruba ya pa varios aña.

Ya for di 7’or di mainta tabata tin hendenan na e sitio, pa asina ricibi e prome articulonan, cual nan a sortia y pone den caha pa despues na final di dia pone nan hunto den un container, pa manera cu nan haya green light, nan manda nan pa nos isla ruman St. Maarten.

Segun un di e voluntarionan, tabata tin mas paña cu comestibles mes. E hendenan aki sa kico ta un horcan, pasobra nan a yega di pasa aden den pasado, entre otro door di Horcan Louis, cual despues cu nan a bin Aruba, nan no a bay mas.

E evento a dura te den oranan di anochi, caminda cu un serie di informacion a wordo duna na tur esnan cu a duna un man den coleccion di articulonan di prome necesidad, caminda cu nan ta keda pendiente pa update for di famianan. tur cos cu por wordo acumula ta mas cu bon bini na e causa aki. tur cos awor aki por yuda, cuminda, remedi, fondo, pero nan lo wordo reparti, na momento cu haya e OK cu por manda e cosnan pa st. Maarten, asina cu nan mes ta cla.

Un cos ta di remarca si cu entre e pañanan cu a wordo haya, nan a haya varios paña sushi y kibra y cu hopi sigur, no lo yuda den e causa y ta lamentabel cu tin hendenan cu ta uza tipo di eventonan asina pa deshaci di paña cu no ta sirbi mas. Shonnan, esaki ta un causa noble. Bo mester haci’e di curason y no uz’e como un motibo pa tira paña afo. Si bo tin paña cu no ta sirbibo mas y cu ta den bon condicion, tuma un esfuerso, laba nan, sortianan y na manera un oportunidad asina yega, entrega nan, pasobra ta un otro hende cu tin hopi mas mester dibo, lo bay haci uzo di nan, y naturalmente cu e gradicimento, pasobra bo a aporta na su bienestar. Esey ta conta pa sapato tambe. No manda sapato uza, completamente gasta pa hende uza. Nan no ta hendenan ambulante pasobra cu nan kier, sino cu forsa di naturalesa a haci cu nan mester a bandona nan cas, pasobra esaki a wordo distrui y nan a perde tur nan pertenencianan. Manda bon sapato cu hende por cana drechi riba dje.

E evento aki sigur lo bay sigui, cual lo bay wordo anuncia despues. Loke si e voluntarionan kier a remarca tambe ta cu tin hopi mester di alimento, den e caso aki, den bleki cu e renchi pa habri’e mas facil. Pasobra tin cu tene na cuenta cu por ta hendenan aki no tin un cos di habri bleki y mester facilita pa nan por yega na nan alimento mas rapido posibel.

E comunidad di St. Maarten na Aruba, sigur ta gradicido na tur esnan cu a duna un man den e causa aki y lo bay sigui cu e esfuerso pa haya mas tanto donacion cu ta posibel pa asina yuda nan sernan stima na St. Maarten.

 

- Advertisement -

DUNA COMENTARIO

Please enter your comment!
Please enter your name here