Home Politica Ex-Gobernador Freddis Refunjol den proceso di formacion

Ex-Gobernador Freddis Refunjol den proceso di formacion

79
0
SHARE
- Advertisement -

ORANJESTAD(AAN):  Manera DIARIO a anuncia Dialuna caba, ex-Goberador Fredis Refunjol tambe a wordo yama pa reuni cu Gobernador Boekhoudt.

Ta pa prome bes den historia politico di Aruba, cu Gobernador ta envolvi un ex-Gobernador den e proceso di formacion di e siguiente Gobierno. Na Corsou nan ta duna ex-Gobernadornan e funcion di Minister van Staat y ta un consehero pa tanto e Gobernador mes como pa Conseho di ministronan.

Na Aruba nos nunca a procesa e funcion aki, pero awor por nota claramente cu Gobernador Boekhoudt ta decidido pa no laga e experencia di Freddis Refunjol bay perdi.

Gabinete di Gobernador a informa desde fin di siman caba cu riba e prome 3 dianan di e siman aki e lo ta masha ocupa cu e prome rond di reunionnan cu lidernan, colegionan halto di estado y entidadnan importante di nos pais. Asina riba dialuna e ta topa cu Presidente di Parlamento, Presidente di Raad van Advies pa despues topa cu lider di AVP, MEP, POR y RED.

Riba diamars e ta topa cu lidernan di RAIZ, UPP/PPA, CURPA y MAS. Despues di merdia e ta topa cu Presidente di Banco Central, Director di Departamento di Finansa, Director di Fondo General di Pensioen (APFA), Director di AZV y Director di SVb.

Riba diaranson mainta e lo topa tambe cu e Presidente di organizacion di comerciantenan, ATIA y despues ta topa cu Mediador di Gobierno, Anselmo Pontilius.

Locual a hala hopi atencion ta e hecho cu su ultimo reunion den e prome rond di encuentronan ta cu Freddis Refunjol, como ex-Gobernador di Aruba. E reunion aki ta hala hopi atencion y por intepret’e di hopi forma, manera cu e kier djis scucha di su experencia den pasado, pero tambe e por ta cu e representante di Corona Hulandes ta pensa di nombra e ex-Gobernador como sea Informador of hasta Formador di Gobierno, cu e meta principal pa forma un gobierno di base mas amplio posibel.

Ta conoci cu e deseo di Hulanda semper ta un Gobierno di base amplio, pa por garantisa continuidad y trankilidad den gobernacion. Stabilidad politico ta por lo menos un di e basenan den Reino Hulandes, pa cual mester pensa den un persona neutral y cu ta conta cu respet di tur organizacion politico, pa haci un intento asina.

Ministerio di Asuntonan di Reino Hulandes algun luna pasa caba a haci uzo di e mesun conocemento di Freddis Refunjol den un esfuerso pa intermedia den e relacionnan polarisa entre Gobierno di Hulanda y Gobierno di St. Eustatius.

Hunto cu un otro experto di Hulanda, a formula un comision di “hombernan sabi” pa busca un acercamento y pa por crea un base pa un relacion mas habri y duradero entre ambos Gobierno. Statia ta parti di e islanan BES cu ta resorta awendia directamente bao di Hulanda.

Freddis Refunjol a traha 13 aña como docente di school. Despues el a integra den politica, den partido MEP, pa 22 aña largo. Den e temporada ey el a sirbi nos pais pa 10 aña como Minister y 9 aña como Parlamentario.

E ta e unico Arubiano cu a atende 30 apertura di Aña Parlamentario consecutivamente, sea como Parlamentario, Minister of Gobernador.

Freddis Refunjol a ocupa e puesto di Gobernador pa mas di 12 aña, desde dia 1 di mei 2004 pa 1 di januari 2017. E ta condecora tambe como “Commandeur in de Orde van Oranje Nassau”, cu ta e funcion mas halto den e ordo aki, despues di “Lid”, “Ridder” y “Officier”. Na Aruba e ta di 3 ciudadano cu dicho condecoracion, despues di defunto Watty Vos y e politico Benny Nisbet.

- Advertisement -

DUNA COMENTARIO

Please enter your comment!
Please enter your name here