Home Gobierno Ex-Gobernador Fredis Refunjol a bishita Gobernador Boekhoudt

Ex-Gobernador Fredis Refunjol a bishita Gobernador Boekhoudt

159
0
SHARE
- Advertisement -

ORANJESTAD (AAN)—Ex-Gobernador Sr. Fredis Refunjol, tambe a wordo invita pa Gobernador sr. Alfonso Boekhoudt, relaciona cu intercambio di idea y pensamento, dentro di e proceso di informacion y formacion cu a cuminza Dialuna di e siman aki.

Prensa, logicamente, a aborda ex-Gobernador cu diferente pregunta. Na prome lugar a puntre kico tin di berdad cu e lo bira e Formador, mirando cu e tabata tin experiencia den pasado cu esaki.

Sr. Refunjol a subraya cu berdad el a pasa den e proceso ey, na 1989 como informador, na 2004 como formador, y como Gobernador el a woedo apunta como informador y formador, pero aworaki e tin e honor di ta un invitado y tur loke ta wordo bisa den e sentido ey ta rumor.

Prerogative di Gobernador ta cu e por invita mas tanto hende posible, pa orienta su mes, pasobra e reunionnan aki ta di orientacion prome cu nombra un formador.

El a menciona cu nan a papia tocante diferente tema, cu logicamente e no por divulga.

Sr. Gobernador a acentua cu tabata tin un eleccion pa scoge un gobierno y pueblo a papia basta bon cla: dos partido cu 9 asiento, un cu dos, y otro cu un asiento y tin diferente alternativa y formanan no convencional si por wordo yama asina.

Na Hulanda y Scandinavia, por ehemplo, el a subraya, tin gobiernonan cu ta wordo tolera y tin Zakenkabinet. Kiermen, tin cantidad di variacion. Na Aruba nan ta compara e programanan poniendo Aruba na prome lugar, interes di nos pais ta mas principal cu tur otro cos. Nos tin hopi reto grandi cu ta warda nos y tur hende sa cual nan ta.

Refunjol a felicita e hobennan politico hopi prominente e biaha aki, cu a participa den eleccion, y el a subraya cu mester atende e topiconan aki na un manera hopi racional. Laga emocion un rato un banda, eleccion a pasa, y ta ora pa pone man na obra.

E ex-politico y ex-gobernador a wordo puntra si e ta kere cu e formacion di e gobierno nobo por bira dificil. El a indica cu e por ta dificil pero si pone tur e puntonan riba un programa y despues yega na palabracion cual partido a hacie, y despues nombra e personanan cu ta bay ehecuta e accionnan, e por ta posible.

El a splica tambe cu durante e sesionnan cu Gobernador ta papia cu tur e politiconan y actornan principal na Aruba, e ta haya sugerencianan y a base di esey e ta tuma e siguiente pasonan. E ta bolbe papia cu esnan cu tin e puntonan y esun cu ta bay bira informador y/of formador ta haya e sugerencianan.

El a subraya cu no necesariamente e informador-formador mester ta un persona sali for di politica, pero un persona cu tin un bista general, y nos tin hopi hende aki na Aruba cu e capacidad ey y cu hopi experiencia riba diferente tema, pero lamentablemente, na Aruba no ta haci uso di nan.

El a pone como ehemplo na Curacao unda cu ex-gobernador sr. Jaime Sale, minister di estado, ta wordo envolvi, entre otro, den e mision di forma un gobierno. Pero tur tema cu ta di interes e ministernan ta yame pa papia cune door di e experiencia cu e tin.

Na Aruba den nos mas cu 30 aña di Status Aparte tin hopi hende cu experiencia y mester haci uso di nan, segun ex-gobernador sr. Refunjol.

- Advertisement -

DUNA COMENTARIO

Please enter your comment!
Please enter your name here