Home Politica Gobierno ta pintando eyfo un escenario ficticio y no realistico

Gobierno ta pintando eyfo un escenario ficticio y no realistico

86
0
SHARE
- Advertisement -

Drs. Marisol Lopez-Tromp:

ORANJESTAD (AAN) — Den conferencia di prensa di Partido Pueblo Orguyoso y Respeta (POR), Plataforma e forza nobo, drs. Marisol Lopez- Tromp a hiba palabra.

Parlamentario Lopez-Tromp a referi na e tema di e refineria y a menciona cu bishitando hopi lugar y papiando cu hopi persona, nan a indica na dje cu sea den e mundo di refineria of den e mundo di construccion, nan no tin, of a perde trabao.

E dama a subraya cu e personanan aki ta wardando esaki of pa bin actividad den e refineria, y hopi esnan cu a indica cu nan no a wordo invita, yama ni envolvi den e trabaonan cu supuestamente ta bay inicia den e refineria.

Drs. Lopez Tromp a referi na personanan cu a yega di traha den e refineria of personanan cu cierto grado di profesionalismo, cu a yega di haci e trabao aki y cu na ningun momento so a wordo inclui ni a wordo pidi, ni mas cu nan a solicita y manda nan papel. Nan ta bisa y señala cu nan ta wak cu ta hendenan di afo ta haya e prome opcion, y nan mes cu ta biba na Aruba no a wordo envolvi den esaki.

“Naturalmente, aki na Aruba aunke cualkier proyecto of compania por haya hende for di exterior pa traha, ta keda na prome lugar nos hendenan local cu ta esnan prome yama na haya un trabao” drs. Marisol Lopez-Tromp a indica.

El a agrega cu esaki ta conta, naturalmente, pa corda bek e momento cu Gobierno a bin Parlamento cu e asunto di refineria y con lihe nan kier a pasa e ley aki, sin duna e transparencia necesario na Parlamentarionan pa por tuma nan tempo necesario pa studia hopi bon, kico realmente e deal aki ta encera.

“Loke nos por wak aworaki ta cu no tin, den e fase di tempo aki, e actividadnan economico, e trabaonan cu mester ta tumando lugar manera cu gobierno a priminti of mester ta den e ‘time line’ di secuencia di trabao na e momentonan aki.

“Consecuentemente, e placa cu gobierno a kere cu ta bay drenta den fondonan na caha di gobierno no a drenta of no ta drentando na momento cu esaki mester a sosode”, e dama a remarca y a añadi cu consecuentemente por wak e consecuencianan.

“Dos tin: 1. Cu gobierno ta bay cu paso acelera na recuri na cobra hendenan, cobra e comerciantenan extra belasting, purba saca placa mas cu por na comunidad, pasobra no tin entrada, no tin e placa, no tin loke a premira. Es mas, nada no ta pasando. 2. Consecuentemente, hopi hende cu enberdad no tin trabao, pero no solamente nan pero tambe den e mundo di construccion, pasobra na momento cu tin un gobierno cu no ta stimulando e economia manera mester ta, areanan tambe manera proyectonan di construccion, ta dunando trabaonan primordialmente na companianan di afo, y hopi biaha tambe sin e destaho publico cu mester tin y ta necesario, envez di bay na prome lugar pa nos companianan y hendenan local, ki mishi den e fase aki, gobierno ta haya su mes den un situacion asina aki, y  nos pueblo, nos trahadornan, nos companianan ta haya nan mes hasta cu retira hende di trabao, y tin di nan cu nan porta ta casi cera”, drs. Marisol Lopez-Tromp a señala.

E parlamentario a sigui bisa cu esaki ta imposible, pensando y mirando con hopi gobierno ta gaba cu proyectonan miyonario, proyectonan grandi, supuestamente yen di trabao tumando lugar, pero nos mesun hendenan den e sector aki tin menos trabao cu den e añanan cu a pasa.

“Mi ta kere cu gobierno ta pintando un escenario afo cu ta ficticio, cu no ta realistico y haciendo propaganda cu un brug cu supuestamente ta conectando dos parti aisla di Aruba cu otro, no ta yuda tampoco drecha e credibilidad di gobierno”, drs. Marisol Lopez-Tromp a conclui.

 

 

 

 

- Advertisement -

DUNA COMENTARIO

Please enter your comment!
Please enter your name here