Home Tempo Horcan Irma ta un tormenta potente pero ainda no sa unda e...

Horcan Irma ta un tormenta potente pero ainda no sa unda e ta bayendo

319
0
SHARE
- Advertisement -

ORANJESTAD (AAN): Tempo lo bay tin algun awacero breve awe Diasabra.

Pronostico di tempo pa awe ta mustra cu tempo lo ta parcialmente nubla cu localmente un awacero breve.

Temperatura maximo na Aruba lo ta 34º Celsius y temperatura minimo ta 28º Celsius.

Biento lo ta modera te basta fuerte for di direccionan entre oost y oost- zuidoost entre 20 te 39 km/h.  Durante di dia fuerte te posiblemente duro den rafaga entre 40 te 61 km/h.

Pa awe, humedad disponible den atmosfera regional lo percura pa mas formamento di nubia temporalmente. Principalmente den oranan di marduga y mainta esaki por produci localmente algo di awacero riba Aruba.

Mas leu por bisa cu un Ola Tropical lo bay pasa den Caribe durante di fin di siman, aumentando e posibilidadnan di awacero den region local.

Olanan di Lama lo ta for di direccion oost cu haltura di 4 te localmente 6 pia na costa nort te noordwest.

Horcan Irma a intensifica rapidamente y a bira un Horcan Categoria 3.  E tabata situa Diabierna atardi 5:00 pm na 18.8ºN y 39.1º West.   Esaki ta como 2.400 kilometer pariba e islanan mas Oost di Caribe.

Irma ta moviendo direccion pabao.  Bientonan sosteni mas cerca di e centro ta di 193 km/h.  Te ainda Irma ta solamente un molester pa nabegacion maritimo.

Horcan Irma a converti su mes e tormenta di mas trempan den historia cu a bira un Horcan grandi pariba di longtitud 35º.

Irma ta e di dos horcan grandi di e aña aki, y hunto cu Horcan Harvey, el a hasta nace mas di 1 luna prome cu e fecha regular di 3 di October unda hopi biaha e di dos tormenta grandi sa nace.

Kizas Irma potencialmente por impacta e islanan di Caribe e siman venidero, como tambe Merca of Canada e siman despues.  Pero inseguridad den su forma di movimento, awor cu ainda e ta mey-mey di Atlantico, ta pone cu bo no por bisa sigur ainda unda e ta moviendo.

Tanto Harvey y Irma tabata tormentanan cu a intensifica rapidamente, pues a crece di un Tormenta Tropical te na Horcan grandi den menos di 36 ora.  Irma a logra esaki den apenas 12 ora di tempo, cual ta un di e cambionan mas rapido den historia.

 

- Advertisement -

DUNA COMENTARIO

Please enter your comment!
Please enter your name here