Home Tempo Islanan Ariba preparando pa yegada di Horcan Irma

Islanan Ariba preparando pa yegada di Horcan Irma

65
0
SHARE
- Advertisement -

Lama na Aruba lo ta poco bruto

ORANJESTAD (AAN): Pa Aruba e pronostico di tempo pa awe Dialuna, ta mustra cu cielo ta parcialmente nubla cu localmente un awacero leve.  Temperatura maximo ta 34º Celsius y minimo ta 28º Celsius.

Biento lo ta modera te basta fuerte for di direccion entre oost y oost- zuidoost entre 20 te 39 km/h.  Den dia biento ta fuerte te posiblemente duro den rafaga entre 40 te 61 km/h.

Humedad laga atras pa un ola tropical cu a pasa bay west lo percura pa awe de bez en cuando mas nubia ta pasa riba region local. Pa e motibo aki por spera principalmente mainta localmente un awacero riba Aruba.

Olanan di lama lo ta for di direccion oost cu haltura di 4 te localmente 6 pia na costa nort te noordwest. Labaderanan for di noordoost lo cuminsa yega awanan regional awe y pesey lama lo ta poco bruto e siguiente dianan aki.

Horcan Irma ta menazando Islanan Ariba!  Pesey mes riba Diadomingo, Hurricane Watches ta drenta na vigor pa e sigiente islanan: Antigua, Barbuda, Anguilla, Montserrat, St. Kitts, Nevis Saba, St. Eustatius, Sint Maarten, St. Martin y Saint Barthelemy.

Posibilidad cu lo extende e lista pa awe Dialuna cu e islanan Puerto Rico y Virgin Islands.

Diadomingo anochi 8:00 pm, Horcan Irma tabata na 17.4º Nort y 50.3º West, cu ta como 1.275 km oost di islanan mas oost di area di Caribe.  E ta moviendo direccion pabao, y te ainda ta solamente un molester pa navegacion maritimo.

Bientonan sosteni mas fuerte di su centro ta di como 185 km/h.  Irma ta sigui bruy den Oceano Atlantico, y pa Diaranzon lo yega Islanan Ariba, y kizas Bahamas pa Diabierna.  Cu tiki suerte, e centro di Horcan Irma lo por pasa banda panort di e islanan aki, pues e bientonan di mas pisa cu lama bruto lo keda leu di nan.  Pero Bahamas kizas tin di bay wanta duro.

Parti di costa oriental di Merca lo tin di bay percura pa posibilidad di Irma yega riba Diadomingo of Dialuna.

E actitud di Horcan Irma tabata hopi stabil den ultimo dianan.  Na diferente ocasion el a cambia di Categoria 2 pa Categoria 3 y bay bek.

Mientras tanto, un Ola Tropical situa zuidwest di islanan cabo verde tin un chens grandi pa den proximo 5 dia sigui desaroya y bira un ciclon tropical.

 

- Advertisement -

DUNA COMENTARIO

Please enter your comment!
Please enter your name here