Home Politica Joselin Croes cu mensahe pa esnan dudando ainda pa bay vota of...

Joselin Croes cu mensahe pa esnan dudando ainda pa bay vota of pa ken pa vota

21
0
SHARE
- Advertisement -

ORANJESTAD (AAN): Segun Joselin Croes di Partido POR, e jornada aki tabata uno unico pe.  El a siña hopi, a scucha hopi, a cana hopi y a siña conoce hopi hende.

Nos hendenan ta unico. Cordial, alegre, orguyoso y cu amor pa otro. Esaki ta loke a haci Aruba loke e ta awe. Pero e realidad tambe ta cu nos tin hopi problema social, problema bou hubentud, hopi drop-outs, costo di bida haltisimo y falta di confianza pa cu nos gobernantenan.

Si bo ta stima Aruba, bo lo scoge e partido y persona cu ta bay traha na bienestar di su pais y no pa su propio cartera, ta trahado, ta sincero y cu tin amor pa su isla y su hendenan y ta capaz pa tuma decisionan no popular pero nesesario pa nos enfrenta e retonan di 2020.

POR a nace pa duna abo e opcion pa kibra cu e tradicion di vota pa e dos partidonan tradicional. Nos ta nobo, pero grandi den forsa. Mi ta contento y orguyoso cu mi partido a logra haci e trabao cu nos mester a haci, cual ta informa pueblo di e problemanan actual di nos pais y cu nos tin solucion pa nan. Tambe nos a demostra cu nos tin un bon team di persona, un bon plan y vision pa por soluciona e problemanan aki di un forma pragmatico, progresivo, transparente, comunitario y participativo.

Esaki ta un eleccion decisivo, Aruba tin un debe di 4 biyon Florin pa bay paga, problemanan di criminalidad halto, problemanan social, di salubridad y enseñansa. E ta keda na bo persona pa duna nos bo confianza pa asina nos por implementa nos Vision 2017-2021

Mi ta suplica cada persona cu ta bay vota dia 22, no laga ningun politico, ni partido bisa bo bo debe nan un fabor. Bo voto no tin placa na mundo cu por cumpre. E ta un derecho sagrado cu nos antepasadonan a bringa pa awe nos tine. Ban honra nan door di vota di un forma, priva, consciente y cu curason.

Mi ta pidi cada un di nos pa ban respeta cada ken nan decision y nan derecho di voto. Mañan nos tur ta keda ruman, prima, tanta, mayor of amiga di e otro persona y nos ta bay tin mester un union grandi pa nos logra enfrenta e retonan grandi nos dilanti.

Por ultimo, ami ta compromete mi mes cu mi pais y mi hendenan, mi lealtad na mi himno y bandera y no na ningun partido politico. Mi lo entrega mi alma y curpa pa traha pa yuda nos hubentud y esnan di menos recurso. Como mama, mi ta preocupa cu e rumbo cu nos pais ta bayendo. Mi kier un Aruba safe, un Aruba limpi, un Aruba cu un calidad di bida y enseñansa moderno y halto pa mi yiunan y pa boso yiunan.

Dia 22 di september e ta keda na abo pa sa si bo kier mas di mesun cos cu Aruba a conoce e ultimo 30 añanan aki of bo kier duna un partido nobo cu sanger nobo y cu experiencia e chens pa demostra cu nos por goberna y traha di un forma diferente. Tur loke nos ta pidi ta bo voto di confianza pa nos mustra boso cu hunto nos por logra e cambio cu Aruba tanto tin mester y ta anhela.

Manera cu ami yama Joselin Croes, mi ta sigura bo cu si bo deposita bo voto di confianza den mi persona, cu bo voto no lo bay perdi, mi lo  representa bo voto dignamante y cu dedicacion den Parlamento of Gobierno pa sigura un bon futuro pa nos yiunan.

 

 

- Advertisement -

DUNA COMENTARIO

Please enter your comment!
Please enter your name here