Home Suceso Juffrouw di scol y su casa trahando na CEA a agredi Docter...

Juffrouw di scol y su casa trahando na CEA a agredi Docter di SVb

3311
0
SHARE
- Advertisement -

Caso serio lo bay conta cu medida disciplinario

 

ORANJESTAD(AAN): Agresion a yega su limite!  Con por tin hende cu ainda ta biba cu e mentalidad cu nan no ta acepta diferencia di opinion, y ta kere cu maltrato ta e solucion mihor riba e mundo aki.

E siman aki un caso serio a keda registra na Sucursal di SVb na San Nicolas. Agresion mahos contra un dokter door di hendenan cu a bin tuma servicio na SVb.

Den un entrevista cu Director di SVb, ing. Edwin Jacobs, el a splica cu Diaranson mainta, e dokter di control na San Nicolas (kende ta controla empleadonan publico) a wordo confronta cu un situacion hopi lamentable y mas cu tur cos hopi condenabel.

E Docter di Control tabata atende un Juffrouw di Scol (riba payroll di Gobierno), y e Docter a mustra e docente aki cu su comportacion durante periodo di AO no ta contribui na su recuperacion.  E no tabata di acuerdo, y e docente a haya necesario di bay di SVb, y bin bek cu su esposo, kende tambe ta un empleado publico, y asina agredi e Docter di control.

E muher ta maestra di Scol y e homber ta traha na CEA, esta Cuerpo Especial Arubano.

SVb ta lamenta esaki, pero mas cu tur cos, ta condena e tipo di comportacion agresivo aki contra empleadonan di SVb.

Segun ing. Jacobs, a base di esaki tambe ta tuma di banda di SVb e medidanan mas fuerte cu nan tin contra e dos personanan agresivo aki.

Primeramente, Docter a entrega keho contra e agresor y durante dia ta saliendo un carta pa tur dos, caminda cu ta prohibi nan entrada na SVb y prohibi nan pa bin control na SVb.

Mas leu, ta mandando un carta pa departamento di recurso humano di Gobierno, informa nan di e sucedido y nan expectativa ta cu como bon doño di trabao, pais Aruba, mediante e departamento di recurso humano, ta tuma medidanan disciplinario cu e maximo castigo disciplinario cu por tin. Pasobra no por acepta cu personanan ta bay pia di trabao pa haci nan trabao y pa motibo cu kizas no ta di acuerdo cu locual a wordo menciona na e pashent, ta tuma e derecho den bo man pa agredi e dokter di control.

SVb no ta acepta esaki, no ta tolera esaki bao di ningun circunstancia.

Debi na esaki, awor mes SVb a dicidi na bin cu medida nobo.  Segun ing. Jacobs, nan ta bay implementa entrante e fecha di awe, un maneho di cero tolerancia pa loke ta trata comportacionnan di intimidacion y di agresividad.

Cu regularidad e dokternan ta wordo confronta, principalmente for di sector publico, cu comportacionnan intimidante. Te na e momentonan aki, pa evita conflicto, e dokternan tabata laga esaki pasa. Pero entrante awe tur comportacion y tur insinuacion intimidante den direccion di un dokter di SVb, ta tuma paso contra di dje y ta haya un advertencia. Despues di tres advertencia, lamentablemente SVb no ta permiti e persona aki presenta mas na SVb pa control.

Ta yega un momento cu tin cu para e tipo di comportacionnan aki for di awo y pa semper. Tin cu menciona cu tin un grupo di empleado publico cu constantemente tin un actitud pa e docternan, como si fuera cu e docternan no tin e autoridad pa controla si realmente nan ta AO, pero tin un actitud di mas bien drenta consultorio di e docternan, informa docternan, cu nan ta AO y te ki dia nan ta AO.

Antes SVb su docternan tabata hopi tolerante pa esaki, pero entrante awe, SVb ta implimenta un maneho di 0 tolerancia. No ta acepta esaki mas, ta pone tambe na altura pais Aruba, como un doño di trabao y ta spera cu como bon doño di trabao, pais Aruba tambe lo sa di atende empleadonan publico riba e actitud aki.

E absentismo laboral y notificacion di AO den sector publico ta hopi halto y ta haya cu regularmente personanan cu tin frecuencianan hopi halto ta presenta y principalmente nan tin e actitud aki di bin informa y bin impone locual segun nan, ta nan pensamento riba e docternan di control.  SVb no ta acepta esaki.

Na mes momento, SVb ta fortifica e seguridad na nan salanan di control y cu autoridad pa mantene ordo tur momento den e salanan unda pacientnan ta sinta warda nan turno.

Jacobs ta lamenta esaki profundamente, pasobra e ta kere cu dokter di control y cliente, por sali afo cu otro den un bon forma. Docternan tey pa controla, pa asisti trahadonan, pa percura cu ora nan ta apto pa traha, den ningun momento e dokternan no merece y no ta acepta tampoco cu nan trato ta bay den e forma aki.

Agresividad ni verbal, ni fisico, intimidacion den ningun otro forma tampoco ta wordo acepta. 0 tolerancia.

- Advertisement -

DUNA COMENTARIO

Please enter your comment!
Please enter your name here