Home Deporte Kudawecha Redskin a titula campeon Copa Noord 2017

Kudawecha Redskin a titula campeon Copa Noord 2017

51
0
SHARE
- Advertisement -

ORANJESTAD (AAN): Ayera a cera Copa Noord cu broche de oro cu e partido nan di semi-final y final cu tabata tremendo. Mainta a cuminsa cu un partido amistoso pero di revancha entre e guysnan di Salo Park y Happy Family. Aki e partido a termina cu e score di 6-1 pa e team di Salo Park. Pabien Salo Park y tambe danki na ambos team pa aporta na e torneo.

Pa 12:00 pm cos a bira hot ora cu Calabas Blue Jays a enfrenta e muchanan di Kudawecha Indians. Aki Calabas a demostra cu el a bin pa bay final y a dal e Indian nan cu e score di 11 – 3 y asina clasifica pa e final. Pitcher ganador pa Calabas tabata Clemente Garcia y pitcher perdedor Oslin Tromp. Pa Calabas Joshua Ramada a bati di 3-3, Ryan Richardson 2-2, Bernardo Maduro 3-2 y Randy Cordero 4-2. Pa Kudawecha Indians Filbert Thiel a bati di 4-2, Ozzi Webb 2-1 y Mario Kock 2-1.

Pa 2:00 Pm e toronan di TL giants a topa mano a mano cu e muchanan di Nacho Webb esta Kudawecha Redskin. Aki si tabata mustra manera cu ta un wega final mes e tabata. Pues ambos team a duna bon bataya y e wega tabata empata den bom di 7 inning na 0-0. E wega mester a bay 8 inning usando e tie-break rule unda cu Kudawecha Redskin a pica bay dilanti cu 1 careda lagando asina TL Giants cu tabata campeon di aña pasa den tereno y asina pues sigura nan wega den final.  E pitcher ganador Arjen Mathilda y e pitcher perdedor Franklin Danies. Ambos a luci tremendo ariba monticulo. Pa Kudawecha Redskin Jair Thompson a bati di 4-1, Micheal Fingal 3-1, Derward Ruiz 3-1, Angelo Laurant 2-1, Richenell Matos 3-1 y Jason Kootes 3-1. Pa TL Giants Jason Orman a bati 4-3, Jourick Blanco 4-1 y Andy Figaroa 3-1.

Pa 4:00 pm e reactor atomico a activa pa e wega final entre Calabas Blue Jays y Kudawecha Redskin. Aki tabatin batazo tras di batazo. Den di dos inning wega tabata bastante preta na 8-7 pero e muchanan di Redskin e aña aki a bin cu un solo meta y asina den inning 3 ta pica bay dilanti cu 5 careda. Den di 4 inning Calabas Blue Jays ta logra piki dos careda mas mientras Redskin  ta avanza cu 4 careda. Pero despues di 4 inning Redskin a mustra Calabas cu ta te ey boso ta yega pasobra den di 5 inning ta dal Calabas cu 3 careda mas y asina knockout Calabas Blue Jays cu e score di 20-9. Pues nan meta a keda cumpli y Copa Noord a conoce un campeon nobo “Kudawecha Redskin”. Calabas Blue Jays ta termina Sub Campeon di e torneo. Pitcher ganador Arjen Mathilda y pitcher perdedor Rodney Kelly.
Pa Redskin Micheal Fingal e guy cu a bati manera grandes ligas den e wega final a bai di 4-4 ,  Chris Williams a bati di 5-3, Richenell Matos  3-2, Jason Kootes 4-2 y Derward Ruiz 4-2. Pa Calabas Jonathan Ramada a bati di 3-3, Jonathan Tromp 2-2, Jomir Vrolijk 2-2, Jose Baez 3-1, Joshua Ramada 4-1 y Randy Cordero 4-1.

E premio nan obsequio di Balashi di nos e ta a keda como lo siguiente:
Campeon CN2017: Kudawecha Redskin
Sub campeon CN2017: Calabas Blue Jays
Champion Pitcher: Arjen Marhilda (Redskin)
Champion homerun: Ryan Richardson (Calabas)
Champion batter: Joshua Ramada (Calabas)
MVP: Micheal Fingal (Redskin)
Richenell Matos tambe a ricibi un plakaat pa a wanta e wega y no laga Calabas score mas careda na momento cu el a drenta pitcha. Pabien na ambos team y tur e hungador nan cu a sobresali y logra bay cu un premio.

Y asina tambe Super Plus SBT ta sera un Copa Noord cu broche di oro ora cu Tsunami a deleita un y tur cu bon musica.

Nos ta manda un danki special na: Brouwerij Balashi, Divi Resorts, Banco di Caribe, Healing Massage, Tempo Flexible Manpower, Blue FM y Top FM pa transmiti e wega, DJ Mariano Webb, na sr. Felix Stamper pa e houseband di copa Noord “Rene and friends”. Danki na tur e teamnan amistoso y e 9 teamnan cu a participa y aporta na e torneo. Na ASB pa su umpires y scorers. Naturalmente danki na e fans nan cu a yega veld y pone bon ambiente y last but not least danki na commission crew di Super Plus cu a traha 6 siman hopi duro pa hasi e torneo uno exitoso. Nos meta a wordo logra. Hopi exito for di awor caba na TL Giants cu lo ta e team organizador di Copa Noord 2018.

- Advertisement -

DUNA COMENTARIO

Please enter your comment!
Please enter your name here