Home Salud Mary Joan Foundation y Bright Bakery a uni pa trece mas concientizacion...

Mary Joan Foundation y Bright Bakery a uni pa trece mas concientizacion riba cancer di pecho

148
0
SHARE
- Advertisement -

ORANJESTAD (AAN): Mary Joan Foundation y Bright Bakery a dicidi di uni nan esfuerzonan pa trece mas concientizacion riba cancer di pecho.

Segun Sra. Arabella Reyes, presidente di Mary Joan Foundation, a bisa cu ayera tabata un dia hopi special pa e fundacion, pa motibo cu nan ta celebra nan di 10 aniversario como fundacion, e kier a gradici comunidad di Aruba di curazon, como tambe nan boluntarionan y sigur tur esnan cu ta aporta pa nan sigui por brinda apoyo na esnan cu ta sufri di cancer di pecho.

Bright Bakery a cuminsa cu un bunita campaña di concientizacion riba luna di October, conoci mundialmente como luna di concientizacion di cancer di pecho, na unda nan a print logo di Mary Joan Foundation riba nan saco di pan y informacionnan con un persona por controla su mes pa cancer di pecho.

Sra. Reyes tambe a splica cu nan a dicidi di lanza nan logo nobo, 10 aña a pasa y a bira tempo pa inovacion, e manera cu nan ta approach nan clientenan y comunidad, tur esaki a cambia den añanan, y nan ta kere cu a yega tempo pa introduci un logo nobo. Esaki ta un logo simpel cu a wordo diseña pa un compania di Corsow.

Sra. Sulienne Croes-Bareño, marketing manager di Bright Bakery, a felicita Mary Joan Foundation cu nan aniversario, y el a splica cu nan a acerca e fundacion pasobra kier ta parti di nan campañanan y nan a bin cu e idea pa lanza nan logo nobo usando e saconan di pan di nan pannan mas popular di Bright Bakery, cu ta kipashi, pan bruin y nan pan rolls y di hot dog.

Sra. Croes-Bareño a splica cu e informacionnan riba e saconan di pan ta pa tur hende na Aruba, y ta hopi importante pa comparti esaki, sea cu hobennan of mama y yiunan, of entre parehanan. Y pa motibo cu nan pan ta yega den hopi cas na Aruba, e informacion lo yega hopi na un cantidad hopi grandi di hogar. Nan ta hopi orguyoso di forma parti di e campaña y na final di esaki, nan lo haci un donacion na Mary Joan Foundation.

Sr. Jose Tromp, vice presidente di Mary Joan Foundation a papia riba e 10 aña di e fundacion. Idea di e fundacion cu a cuminsa na 2000, despues cu Women’s Club of Aruba a organiza pa prome biaha un charla cu oradornan internacional, y nan a invita cuatro dama cu tabata tin hopi curashi pa comparti nan experiencia cu cancer di pecho.

Esaki a bay asina bon, cu nan a sigui cu e lucha di comparti informacionnan durante añanan. Na aña 2002, un di e damanan a fayece, kende tabata Mary Joan Geerman, y na 2007 a dicidi di lanta un fundacion riba su nomber.

Sra. Diana Bikker, un boluntario di Mary Joan Foundation a papia riba collect, cu lo cuminsa den luna di October riba tur diasabra, na unda boluntarionan lo ta presente den diferente parti di Aruba cu collect box, tur loke bo deposita ta pa haci nan clientenan feliz. Dia 28 di October, nan lo ta na Bright Bakery Piedra Plat pa cera nan campaña, y e kier a recorda pa tur hende keda pendiente pa nan caminata.

- Advertisement -

DUNA COMENTARIO

Please enter your comment!
Please enter your name here