Home Politica Melvin Tromp mustrando cu un vision politico nobo no por ta nunca...

Melvin Tromp mustrando cu un vision politico nobo no por ta nunca un mentira fabrica pa frustracion

27
0
SHARE
- Advertisement -

ORANJESTAD (AAN): Parlamentario pa fraccion di AVP, sr Melvin Tromp ta kere cu na momento c’un politico scoge pa un rumbo politico nobo cu esun cu el a forma parti di dje pa 27 aña largo,  pueblo ta spera un vision politico nobo, limpi y sincero.

Sinembargo ya caba pa algun siman por mira tanto lider como miembronan di un partido nobo, uzando medionan social pa plama mentira, haci nan mes culpabel na loke ta ser yama ‘fake news’ y trata di mal informa pueblo den e forma mas baho cu por tin.

“Ta increibel loke nos ta mirando den ultimo simannan y loke pueblo ta informa candidatonan di partido AVP ora cu nos bishita nos pueblo, esta cu politiconan di e partido nobo aki, ta trece mensahenan incorecto contra di politiconan di AVP, y hasta ta bay over na fabrica cosnan cu simplemente no ta existi y mas cu tur cos, no por ta posibel.

For di siman pasa e lider politico aki ta emiti un pamfleta  caminda ta insinua cu Gobierno di AVP a cuminsa nombra candidatonan riba su lista, den posicion di director den diferente departamento di gobierno.

Un mentira grandi, un falta di respet grandi no solamente pa nos gobierno pero tambe pa e departamentonan di cual nan ta papia di dje y hasta na e trahadonan di e departamentonan aki, cu no ta na altura di e cosnan aki.

Ta di lamenta c’un politico cu a bandona fila di AVP ta presta su mes pa e tipo di cosnan aki y ta bay asina leu na laga publica esaki tambe den un medio di comunicacion, sabiendo cu e cosnan aki no ta cuadra cu realidad.

Si esey ta e vision rumbo nobo cu e partido nobo aki kier brinda pueblo, anto tin cu conclui cu e vision mentiroso aki nunca lo guia na exito ya cu nos pueblo ta bon informa di tur loke ta pasando y semper ta den contacto directo cu tanto lider di AVP, sr Mike Eman y otro candidatonan di e partido berde.

Pero aki ta bon pa pueblo analisa e tipo di mentalidad aki cu e vision politico nobo aki ta cana plama rond, na luga di convence pueblo cu argumentonan politico realistico, ta trata di ataca su contrincante den un forma asina ridiculo cu produccion di un lista cu salario cu hamas por ta realidad.

Lo ta bon pa menciona aki tambe pa pueblo sa for di ki menta e tipo di informacionnan aki ta sali, ya cu pueblo mes por constata cu e tipo di cosnan aki cu e kier insinua cu gobierno di AVP ta haciendo, ya a worde haci caba pa su persona ora cu e tabata den posicion pa haci esaki.

Pueblo ta bon na altura tur e departamentonan aki cu el a dirigi y caminda el a nombra cantidad di hende y a exigi despues pa nan tur sostene su vision nobo y  pueblo por mira autonan cu sticker di e vision nobo aki na tur e departamentonan aki cu a yega di resorta bou di su persona.

Tin algun decision cu a ser tuma pa e lider politico aki cu despues mester a worde coregi sigur uno caminda a brinda un persona un salario di 7000 Florin pa maneha Face Book Page pa un departamento, algun nunca antes bisto pero cu ta mustra atrobe e mentalidad di e politico aki riba e tipo di e acusacionnan cu awor e kier insinua cu partido AVP.

Nos gobierno semper a hiba un maneho transparente, semper tabata habri cu pueblo y semper lo keda goberna den contacto y cu participacion di pueblo, caminda pueblo ta bon na altura di tur loke ta tumando luga,” Parlamentario Melvin Tromp a mustra.

- Advertisement -

DUNA COMENTARIO

Please enter your comment!
Please enter your name here