Home Politica Mike Eman ta gradici pueblo pa su sosten den parada

Mike Eman ta gradici pueblo pa su sosten den parada

11
0
SHARE
- Advertisement -

ORANJESTAD   (AAN) – Dialuna merdia lider di Partido di Pueblo Arubano (AVP) a bay radio pa expresa su sentimento inmenso di danki despues di manifestacion tambe inmenso di apoyo cu a ricibi diadomingo durante e Parada Rumbo pa Victoria. “Nos ta hopi contento cu esaki y mi kier a usa e momento aki pa expresa un palabra di gratitud pa miles di auto cu a core cu nos ayera pa duna nan sosten pa duna nan apoyo.”

Pa Eman e hecho cu asina tanto persona, riba propio forsa y riba propio gasto, a bay core un parada, tabata manifestacion di un deseo pa expresa na AVP y na e Gobierno actual cu loke a bin ta haci ta wordo aprecia y nan ta consider’e importante pa e futuro di e pais aki. Pueblo di Aruba a subi caya diadomingo ultimo sea tabata den auto, of banda di caminda pa bisa cu nan kier pa e trabounan aki continua.

Aruba a mira cu AVP atrobe a hinca un ekipo den otro y cu atrobe a bin cu un plan pa percura pa hopi di e progreso continua y pa progreso nobo bin tambe. Un progreso cu ta bin renoba y modernisa atrabes di caranan nobo riba e lista, pero cu e conocemento y experiencia di candidatonan di eleccionnan anterior. Pueblo ta aprecia cu AVP a tuma iniciativa y tempo pa tende directamente for di nan atrabes di tur aña cu a keda bishita, pero tambe di e evento 1000Voz.

“Necesidad ta cambia. Locual awe ta un prioridad, mañan ta menos un prioridad; bo mester keda den contacto cu pueblo pa bo sa kico ta su prioridad, pa bo por lag’e refleha den bo trabou y den bo esfuerso y den e prioridad cu bo ta pone pa bo gobernacion,” asina Eman a duna di conoce. “AVP den ‘Aruba Padilanti: 2017-2021’ tin e miho plan atrobe pa e futuro di e pais aki.”

Partido di Pueblo Aruba AVP tin e miho plan y e miho ekipo pa bay e eleccion aki. Eman ta kere cu pueblo ta ripara esey y tin aprecio grandi pa e empeño cu a bin ta haci durante ocho aña. Eman: “Diadomingo esey a keda refleha y awe mi kier a gradici e miles y miles di persona.” E lider politico a recorda con ora el  a yega na Pos Chikito, un hende cu a laga busca a base di su confiansa y neutralidad a inform’e cu a conta te cu e momento ey 3.967 auto, y ainda tabatin un caravana su tras. “Mi sa cu esaki ta un cifra record pa un parada di auto y esey sigur ta algo cu ta duna un indicacion.”

Despues di a gana gobernacion, eleccion di 2013 hopi a considera cu lo tabata dificil pa bay dilanti, pero AVP a bay di 27 mil pa 33 mil voto cu a nifica un asiento adicional den Parlamento. Awe atrobe hopi ta pensa cu historicamente un gobierno di 8 aña no por ripiti, pero Eman ta bisa cu e eleccion aki ta hopi diferente di tur otro eleccion. Den e eleccion aki tur hende, pueblo henter por mira y sinti kico ta den discusion.

“Bo no por gaña ningun hende cu no tin mehoracion den nan bario, den nan scolnan of den nan centronan deportivo; bo no por gaña ningun hende cu bijstand no a subi, cu no tin un schoolkinderentetoeslag, of aumento di salario minimo; bo no por gaña empleadonan publico cu nan no a haya indexering y aumento di diferente uitkering. Nan ta mira cu e gobernacion aki a haci hopi mas pa nan,” asina Eman a finalisa bisando.

- Advertisement -

DUNA COMENTARIO

Please enter your comment!
Please enter your name here