Home Gobierno Minister Bermudez satisfecho cu ultimo rapport di CAft

Minister Bermudez satisfecho cu ultimo rapport di CAft

39
0
SHARE
- Advertisement -

ORANJESTAD (AAN): Rapport di CAFT pa loke ta e di dos kwartaal di 2017 ta satisfactorio. Minister Angel Bermudez di Finanzas a splica kico CAFT a analisa y cua ta e aspectonan cu e Colegio di Supervision kier pa gobierno pone atencion na nan. E analisis di CAft ta positivo y Bermudez no tin ningun duda cu ta logra e deficit di 0,5% manera LAFT (Landsverordening Aruba tijdelijk financieel Toezicht) ta stipula. Un di e comentarionan den e rapport di CAFT ta regarda e cantidad di personal den servicio publico.

Aki Bermudez a declara: “Esaki ta un proceso dinamico. Cada kwartaal bo tin of un plus of un min. Den e kwartaal aki tabatin dos luna di VUT y ainda mi no tin cifranan exacto cuanto empleado a haci uzo di e areglo aki. Desde 2013 nos a reduci e cantidad di empleado cu 500 cu ta mas di 12% y e trend aki ta bay worde manteni tambe y asina sigui reduci e cantidad di empleado publico y di e forma aki domina e gastonan di personal.”

Bermudez ta haya hopi positivo e remarca di CAft mes cu ta bisa cu si mantene e maneho aki pa fin di 2017 Aruba lo mira un cambio den e schuld quota. “Esaki ta algo hopi positivo, pasobra si compara esaki cu e decadanan cu a pasa, e debe aki lo bay mengua y esaki naturalmente ta meta di gobierno. Reduci gasto y yega na un momento cu e schuldquota ta dobla y cuminsa baha. Mi ta convenci cu manteniendo e maneho financiero aki, e debe nacional ta reduci gradualmente.”

Minister di Finanzas Publico kier a para un rato keto na algun datos di e ultimo añanan. “Mi kier djis recorda cu na 2014 ora mi a resumi responsabilidad di e cartera aki tabatin un deficit riba e cuenta primario di 260 miyon y nos a dobla esaki den un surplus di 190 miyon Florin di nos cuenta primario. Tambe nos a logra reduci e tasa di interes riba prestamonan nobo di gobierno di 5,5/5,7% na 4,2% e aña aki. Un reduccion di mas di 1%. Nos a logra stabilidad financiero pa e fondo di pensioen APFA . E siman aki ainda mi a reuni cu e directiva cu a trece pa mi e cuenta anual di 2016 cu a worde acorda door di nan accountantnan.

Tur cos ta mustra cu e fondo ta bayendo den bon direccion y nan dekking ta positivo. Pensionadonan di APFA di awe y di futuro ta sigura di nan pensioen. Nos a establece raportahenan regular encuanto nos situacion financiero y ya caba nos a realisa ocho cu nos a publica. Riba cada un nos a haya reaccion di CAft. Nos a logra e ultimo añanan cumpli cu e ley di contabilidad door di tanto bin cu e presupuesto di e aña benidero como e cuenta anual di e aña anterior na tempo.

E cuenta anual 2016 a keda entrega y e prespuesto di 2018 a cay e biaha aki un tiki laat. Tanto pa motibo di eleccion: mester tene cuenta cu e gobierno cu ta bay sinta  y dun’e espacio y tambe door di cambionan cu por bin den cierto ministerionan. Tambe pa motibo cu otro aña e norma pa e presupuesto ta determina den e ley di LAFT. Mi a informa Parlamento cu dentro di poco mi ta entrega presupuesto 2018”, Bermudez a bisa.

Otro logronan riba tereno financiero ta cu a formalisa e structura di prestamo di estudio pa hobennan. Mescos tambe a inclui henter e sistema di supervision hunto cu e Colegio Ehecutivo di CAft cu ta supervisa ehecucion di presupuestonan di Aruba. “Esaki a contribui cu nos ta mantene nos mes na cuadronan di presupuestonan manera cu nan a worde formalisa y aprobra door di Parlamento.” Na final Minister Bermudez a bisa cu e efectonan di VUT ta bira visibel otro aña pasobra e ta dura tres aña y a cuminsa ofrece esaki na 2015.

 

 

- Advertisement -

DUNA COMENTARIO

Please enter your comment!
Please enter your name here