Home Enseñanza Minister Demisionario Hooyboer-Winklaar mustrando riba inversion miyonario na metodonan nobo pa schoolnan...

Minister Demisionario Hooyboer-Winklaar mustrando riba inversion miyonario na metodonan nobo pa schoolnan MAVO

21
0
SHARE
- Advertisement -

ORANJESTAD (AAN): Recientemente Minister Demisionario Michelle Hooyboer-Winklaar a confirma cu a logra aloca y inverti mas cu 1.5 miyon Florin adicional na buki y material nobo pa tur school MAVO di Aruba. E fondonan adicional aki a worde aloca na comienso di aña door di Minister di Enseñansa den e Onderwijsfonds y a keda aproba na luna di mei ultimo door di Parlamento di Aruba.

Ta trata di un suma total di Afl. 1.557.879,20 cu a worde poni disponibel pa bestel buki y material nobo pa e directivanan di school di MAVO. Esaki ta fondonan adicional apart di e presupuesto anual di cada directiva di school y ta conta pa tur e schoolnan di MAVO di Aruba cu ta resorta bou di SKOA, DPS y SPCOA.

E inversion ta inclui metodonan nobo pa diferente materia, material adicional pa maestronan y materialnan di sosten. Cada directiva di school a indica un prioridad diferente y Ministerio di Enseñansa a duna e espacio pa esaki.

Pa e diferente metodonan a scoge pa inverti den buki nobo pa henter e school di klas 1 te klas 4, esta di ciclo basico 1 te cu ciclo avansa 2. Mayoria di e schoolnan a scoge pa bestel metodonan nobo of e ultimo edicion di un metodo existente pa e diferente materianan.

Por ehempel e metodo “Nieuw Nederlands” pa Hulandes, “Gente Joven” pa e materia Spaño, “Go for it” pa e materia Ingles, e ultimo edicion di “Moderne Wiskunde” pa e materia Wiskunde, “Geschiedenis Werkplaats” pa e materia Geschiedenis, “NOVA NaSk” pa Natuurkunde y Scheikunde y e metodo “Biologie voor jou” pa e materia di Biologie.

Tin schoolnan cu a pone nan prioridad diferente na otro metodonan y materia y tambe na material di sosten manera materialnan di ilustracion pa e materia Wiskunde, Atlas pa e materia Aardrijkskunde y Prisma pocket woordenboeken pa e diferente idiomanan. Mientras tanto a manda pidi tur e materialnan via di e diferente agencianan local y ta den proceso di worde entrega na e diferente schoolnan MAVO.

- Advertisement -

DUNA COMENTARIO

Please enter your comment!
Please enter your name here