Home Gobierno Minister mustrando cu mas di 1.5 miyon Florin inverti na buki y...

Minister mustrando cu mas di 1.5 miyon Florin inverti na buki y material nobo pa tur school Mavo

63
0
SHARE
- Advertisement -

ORANJESTAD (AAN): Despues di varios luna di preparacion Minister Hooyboer-Winklaar ta confirma cu recientemente a logra aloca y inverti mas cu 1.5 miyon Florin na buki y material nobo pa tur school MAVO di Aruba.

A aloca e fondonan aki na comienso di aña door di Minister di Enseñansa den e Onderwijsfonds y a keda aproba na luna di mei ultimo door di Parlamento di Aruba. Ta trata aki di un suma total di Afl. 1.557.879,20 y a pone disponibel pa bestel buki y material nobo pa e directivanan di school di MAVO. Esaki ta inclui tur e 10 schoolnan di MAVO di Aruba cu ta resorta bou di SKOA, DPS y SPCOA.

Mester menciona cu e suma total aki ta un inversion adicional na loke e directivanan di school ta haya caba tur aña riba nan presupuesto pa inversion den material y metodonan nobo. Cu e inversion adicional aki e titular di enseñansa kier a garantisa un impulso mas grandi den e renobacion di e metonan y material na Mavo unda cu a constata un necesidad grandi.

E suma total di mas cu 1.5 miyon Florin a keda reparti bou di e directivanan di school a base di e cantidad di school y cantidad di alumno. Unabes cu e fondonan a keda aproba Ministerio di Enseñansa a start cu e proceso di inventarisacion hunto cu e directivanan di school.

Cada directiva di school mester a indica nan necesidad y prioridadnan pa determina hunto cu nan schoolnan y a base di esey por a cuminsa cu e proceso di pidi oferta. E inversion ta inclui metodonan nobo pa diferente materia, material adicional pa maestronan y materialnan di sosten. Cada directiva di school a indica un prioridad diferente y Ministerio di Enseñansa a duna e espacio pa esaki.

Mayoria di school a scoge pa bestel metodonan nobo of e ultimo edicion di un metodo existente pa e diferente materianan manera e metodo “Nieuw Nederlands” pa Hulandes, “Gente Joven” pa e materia Spaño, e ultimo edicion di “Moderne Wiskunde” pa e materia Wiskunde, “NOVA NaSk” pa Natuurkunde y Scheikunde y e metodo “Biologie voor jou” pa e materia di Biologie.

Tin schoolnan cu a pone nan prioridad diferente na otro metodonan y materia y tambe na material di sosten manera materialnan di ilustracion pa e materia Wiskunde, Atlassen pa e materia Aardrijkskunde y woordenboeken pa e idiomanan. Mientras tanto a bestel tur e materialnan via di e diferente agencianan local y ta den proceso pa entrega nan na diferente school di MAVO.

E titular di enseñansa ta indica cu e inversion aki no ta encera un solo inversion pa ekipa e schoolnan cu buki y material nobo sin mas, pero ta forma parti di un proceso mas sostenibel unda cu Departamento di Enseñansa ta encarga cu revision di e normanan di subsidio pa e directivanan di school.

E normanan aki ta encera e suma cu cada school ta ricibi pa cada alumno y pa cada klas y ta encera tambe fondo aloca pa material pa school. Minister Hooyboer ta indica cu a aplica e normanan aki pa hopi aña, pero ta constata cu mester actualisa e normanan aki pa asina refleha e necesidad real di nos schoolnan y nos muchanan.

Minister di Enseñansa ta contento di por a inicia e proceso importante aki y ta spera cu hunto cu e inversion inicial y e ahustacion di normanan di subsidio, unda lo ekipa structuralmente e schoolnan cu tur loke nan mester pa duna enseñansa di calidad nan nos hobennan.

- Advertisement -

DUNA COMENTARIO

Please enter your comment!
Please enter your name here