Home Politica Ministernan di DAS, Enseñanza y Husticia mester traha hunto

Ministernan di DAS, Enseñanza y Husticia mester traha hunto

16
0
SHARE
- Advertisement -

Pa drecha nos problema social for di raiz:

Pero ningun gobierno ta haci esey!

ORANJESTAD (AAN) — E Terapista di Famia y Pareha, sra. Enid de Kort,  a menciona durante nos entrevista, cu otro problema cu tin riba nos Isla ta cu hopi di nos hendenan no ta hayando trabao.

Un asunto cu nos tambe ta yega cu frecuencia na nos mesa di redaccion, por cierto.

Nos a puntra Enid Kico Enid ta mira como posible solucion? Na locual el a contesta:

“Nos mester bay traha hunto cu Departamento di Labor, por ehemplo, pa wak con ta bin proyectonan pa hinca nos hendenan den e mercado laboral. E grupo aki tambe ta grandi. Tin hende cu kier traha, mi ta topa nan, pero nan no ta hayando trabao. Un peliger cu nos ta papia di dje ta si hopi ilegal ta hayando trabao na Aruba, e circuito ey ta keda cu mas e grupo di local cu kier traha lo no haya trabao”, sra. De Kort ta señala.

“Y kico esey kiermen pa nos economia, belasting, AZV, etc? Den mi 28 aña trahando loke mi por bisa ta cu na Aruba e ministernan no ta traha suficiente uni cu otro. Si bo kier pa yuda Aruba e ministernan di Asunto Social, Husticia y Enseñanza mester traha hunto. Pasobra hopi biaha e problemanan no ta un area sino un combinacion di areanan”, e dama a remarca.

Bao impresion cu den nos comunidad hopi cos ta mara na un mentalidad politico, e pregunta pa sra. De Kort ta si esaki por ta un di e factornan cu mester cambia den nos pais.

“Manera sr. Capriles a yega di bisa: ‘Aruba ta verziekte politiek’ a mi ta kere den esey. Mi ta un Arubiano cu ta stima mi pais, nos muchanan y pesey mi tin tanto aña riba e tereno aki. Hasta como ambtenaar no ta facil pa bo haya bo promocion, vooral si bo ta un hende critico. Por ta un campañador si por haya un salario hopi mas halto, y esey ta e realidad di Aruba. Y mi ta bise pa e cantidad di añanan cu mi tin trahando, kiermen, e ta bay pa e diferente gobiernonan cu cualnan mi a traha; laga mi bisa esaki bon cla. Por ta un hende mas cerca di e gobierno na turno ta haya mas privilegio cu un hende cu ta critico. Pero ora bo ta stima bo pais, ora bo wak cu e muchanan no ta haya e debido atencion, cu e famianan mester sosten, mi ta un hende cu a vocifera tur e añanan aki esaki”, Enid de Kort a expresa.

E dama a acentua cu mester stop di critica e mayornan. “Mayornan ta haci nan esfuerzo, tin cu mester haci dos trabao pa sobrebibi. Nan tampoco no tin famia pa wak pa nan muchanan; no tin institucionnan pa yuda guia nan yiunan. Kiermen, e problema ta bira complica.

“Esaki ta cosnan cu mi ta desea di mira cambia den nos pais. Y por fabor, no bisa mi cu mi ta un partido politico, pasobra mi a traha cu hopi gobierno. Mi a wak cu no ta un gobierno; durante tur e añanan aki mi a mira cu nos tereno social no a haya e debido atencion; e tereno di famia no a haya e debido atencion, y teynan nos ta forma como hende. Tur e demas cosnan ta bin despues. Despues ta bin enseñanza e di dos area importante. Pero e prome ta e famia. Eynan bo ta lanta, eynan bo ta forma y si bo no ta yuda traha riba e base ey, e otro problemanan ta continua”, e Terapista Enid de Kort a remarca.

 

- Advertisement -

DUNA COMENTARIO

Please enter your comment!
Please enter your name here