Home Turismo Mirando cu nos producto di turismo a yega un estado di...

Mirando cu nos producto di turismo a yega un estado di madurez mester cuminza mir’e na un manera diferente

58
0
SHARE
- Advertisement -

Segun CEO di ATA,  durante celebracion Dia Mundial di Turismo

ORANJESTAD   (AAN): Diamars a celebra Dia Mundial di Turismo y durante un conferencia na Hyatt Regency Aruba Resort, Spa & Casino, CEO di Aruba Tourism Authority (ATA), Ronella Tjin Asjoe-Croes a hiba palabra.

Señora Tjin Asjoe-Croes a splica entre otro cu nos ta biba den temponan emocionante pero, compleho.

“Industria di Turismo a yega un frontera nobo, unda cu globalizacion y avancenan tecnologico ta trece un cambio den pensamento y den necesidadnan di e consumidor”.

“Ta hopi importante pa na cada momento tuma na cuenta e dinamica di e industria di turismo, mientras cu e exigencianan di viaheronan ta sigui den un evolucion rapido”.

“Na ATA continuamente nos ta keda monitor e trend-nan global di viahe, cu ta impacta e industria di turismo”.

Esaki segun e CEO di AHATA a pasa un video tambe cu ta mustra varios di e trend-nan cu ta tumando lugar.

El a splica cu mirando cu  nos producto di turismo a yega un estado di madurez, nos tin cu cuminza wak e na un manera diferente.

“E turismo di Aruba ta conoci pa ta uno cu semper ta mantene su mes fuerte, pero e hecho cu nos ta depende hopi riba turismo, ta pone presion riba nos recursonan”.

“Nos mester tuma accionnan consistente, pa conservacion y proteccion di dje”.

“Mi ta sigur cu nos tur ta di acuerdo cu e manera con nos ta traha riba nos turismo pa cu futuro, no por ta basa riba nos exito di pasado, pasobra esaki lo no garantiza mesun resultadonan pa futuro”, segun Tjin Asjoe-Croes.

El a sigui bisa cu pesey sigui busca camindanan inovativo pa desaroyo di turismo sostenible, ta fundamental pa logra un crecemento balanza.
“Pesey na comienzo di Juli di e aña aki nos a completa un plan strategico pa desaroyo inovativo y sostenible di destinacion”, segun e CEO.

Durante su presentacion, Tjin Asjoe-Croes a mustra tambe riba e hecho cu na aeropuerto semper ta laga bishitantenan yena un encuesta riba con nan experiencia ma Aruba tabata y for di esaki a Sali entre otro cu 87% di e turistanan a indica cu nan lo recomenda Aruba como bon destinacion turistico, 70% a bisa cu e chens ta grandi cu nan lo bolbe Aruba dentro di 5 aña, mientras cu 91% a mustra cu nan a keda satisfecho cu Aruba como destinacion.

- Advertisement -

DUNA COMENTARIO

Please enter your comment!
Please enter your name here