Home Gobierno Nos turismo ta un ehempel evidente di un expertisio unico cu calidad...

Nos turismo ta un ehempel evidente di un expertisio unico cu calidad di exportacion.

125
0
SHARE
- Advertisement -

Gobernador J.A. Boekhoudt den su prome apertura oficial di Aña parlamentario

ORANJESTAD(AAN)– Gobrnador J. A. Boekhoudt ayera pa prome vez a efectua apertura di Aña parlamentario di Aruba y manera ta tradicion a tene su discurso tambe relaciona cu e dia aki.

“Ayera mainta e tabatin e honor di efectua pa prome bes como Gobernador di Aruba, e apertura di e Aña Parlamentario 2017-2018.

Como representante di Su Mahestad Rey Willem-Alexander y como cabez di gobierno di Aruba,” el a cuminza splica y  na final el a declara, manera nos Constitucion ta prescribi, e aña parlamentario 2017-2018 habri.

El a cuminza na mustra cu esaki ta un aña parlamentario cu ta coincidi cu un contienda electoral aki 10 dia y cu esaki sin duda  ta duna e aña parlamentario aki un toke special.

E no por keda ayera mainta sin corda riba nos rumanan di Islanan Ariba cu a wordo azota horiblemente pa horcan Irma cu forzanan feros destruyendo casnan, bidanan y tambe soñonan di hopi. Hechonan asina ta pone nos para keto riba nos vulnerabilidad como islanan chikito y e consecuencianan di cambio climatico pa nos, el a la sa ente otro..

Segun Gobernador Boekhoud, pareu cu e forza destructivo a surgi un forza genuino di hermandad y convivencia. Irespecto di e distancia ayudo a y ta sali di tur skina di nos Reino pa brinda sosten y asistencia na e damnificadonan.

E cambionan grandi y desaroyo acelera di Aruba den e ultimo decada ta haci cu Gobierno y Parlamento mester balansa awor mas y den forma mas concreto, e crecemento economico di nos pais, cu e cuido di medio ambiente y e deseo pa mehoracion social cu ta biba den comunidad.

E balansa aki ta forma e base di un desaroyo sostenibel. Cu e fin aki, Nacionan Uni a defini 17 meta pa asina garantisa un desaroyo duradero y un prosperidad comparti. Gobierno di Aruba a compromete su mes completamente na realisacion di e Metanan di Desaroyo Sostenible aki na Aruba.

 

El a laga sa cu di un manera excepcional, Gobierno di Aruba a presenta un concepto di presupuesto pa aña 2017 cu un deficit di 0.5% di GDP. Esaki ta di acuerdo cu e normanan acorda den e ley di supervision financiero temporal. E ta nifica e continuacion di e proceso di reduccion di e deficit riba presupuesto di Gobierno di Aruba y e caminda directo pa reduccion di e cuota di debe.

Esaki ta resultado di e esfuerzo grandi di hopi hende pa presenta un perspectiva real pa reduccion di e debe nacional di ultimo 31 aña. Nos ta bibando den un era di transicion riba tereno economico, financiero y di energia, di cambionan social y tecnologico, di necesidad di desaroyo urbano cu enfoke pa preservacion di naturaleza, cu tin un impacto grandi riba tur loke nos planea pa haci y haci. Den e contexto di e cambionan continuo y profundo aki, un maneho di Gobierno basa riba e metanan di desaroyo sostenible, ta e miho compas pa hasi e transicion aki.

Pa por cumpli cu e compromiso di ehecuta e metanan di desaroyo sostenible, Gobierno di Aruba a elabora e metanan aki den diferente area di e maneho pa nos pais, pa e añanan nos dilanti.

Entre otro gobernador Boekhoudt a trece dilanti cu elimina pobresa ta un di e metanan pa desaroyo sostenibel. E introducion di transferencianan social pa esnan mas vulnerable manera reparatie- y kindertoeslag, como tambe aumento di onderstand y introduccion di e tarifa social di coriente, a hasi pa hopi hende e diferencia entre permanece den pobreza of hiba un bida digno. Di es manera aki Gobierno di Aruba a scoge pa cuminsa realisa e meta di eradica pobresa den tur forma. Pero Gobierno kier hasi mas. Cu e mesun determinacion, Gobierno lo sigui duna un man na esnan mas vulnerable y famianan di menos recurso pa asina sigui mehora nan poder adkisitivo y nan calidad di bida. Diversificacion di economia y creacion di cuponan di trabou nobo, hunto cu renobacion di barionan cu tur facilidad di recreo, ta complementa e accionnan pa eradica pobresa.

E metanan di desaroyo sostenibel ta bay mas leu cu e areanan di energia, economia y entrada. Sostenibilidad tambe ta rekeri autosuficiencia di un pais o sea e posibilidad pa percura mas tanto posibel pa su propio cuminda.

Gobierno di Aruba ta promove un modelo di agricultura sostenibel cu uso di e tecnologia y eficiencia disponibel awe.

Enseñansa ta e miho forma pa mehora bida di un persona y di un comunidad den forma duradero. Inversionan cu a y ta wordo hasi den enseñansa, sea cu ta den e infrastructura, den profesionalisacion di maestronan of den renobacion di e curriculo, ta inversionan pa generacionan nos dilanti. Mientras cu e plan pa inversionnan den renobacion di scol y den crea facilidadnan lo continua, lo intensiva e inversionnan den renobacion di nos sistema di enseñansa, cu e meta primordial pa aumenta significantemente e grado di exito di nos hoben y adultonan na tur nivel di enseñansa.

Den cooperacion estrecho cu sector empresarial y sindical, lo pone atencion special riba formacion continuo di adultonan y introduccion di e concepto di “educacion permanente” den area laboral, como un di e metanan principal pa desaroyo sostenible.

Gobierno di Aruba ta keda haci tur esfuerso pa yega na 100% produccion di awa y energia pa consumo di fuentenan di energia renovabel den e proximo añanan. Esaki no solamente lo contribui na e autosuficiencia energetico di nos pais, pero lo contribui tambe na e poder di compra di famianan, door di crea stabilidad di prijs a largo plazo. Esaki lo duna espacio financiero pa empresanan tambe. Den liña cu e metanan den ambito energetico di Nacionan Uni, e maneho aki ta sigura accesibilidad na energia pa tur hende, na un bon prijs, confiabel, sostenibel y limpi.

E abilidad di adaptacion di nos turismo hunto cu e seguridad di inversionan pa aumenta calidad y sostenibilidad, a resulta di ta un formula exitoso pa e sector principal di nos economia. Pa nos turismo ta keda e fuente principal di trabou y entrada pa empresanan, famianan y pa gobierno. Den exterior Aruba ta wordo mira como un pais cu a desaroya un maneho di turismo profesional y exitoso. Nos turismo ta un ehempel evidente di un expertisio unico cu calidad di exportacion.

 

 

 

- Advertisement -

DUNA COMENTARIO

Please enter your comment!
Please enter your name here