Home General NV Elmar ta lamenta cu Sindicato STA no a presenta na reunion...

NV Elmar ta lamenta cu Sindicato STA no a presenta na reunion cu nan mes a pidi

119
0
SHARE
- Advertisement -

E sindicato ta menaza awo pa pone e compania plat

ORANJESTAD (AAN): Algun siman pasa e sindicato STA a gana un referendum pa e tambe representa trahadonan di nos compania nacional distribuido di coriente, esta N.V. Elmar. Esaki awor ta bira e di 3 sindicato den e compania, banda di UEA y ALVAST. Nan a pidi un reunion cu gerencia pa introduci nan mes, pero no a presenta. Parce cu awor nan ta disgusta y ta purba forsa un welga sin cu tin ningun sorto di problema laboral.

Gerencia di NV Elmar ta lamenta e forma aki di procede di e sindicato, cu a solicita pa un reunion, a haya un reunion pa diabierna 15 di september pa 3:00pm, pero no tabata por na e ora ey y asina a opta pa keda sin presenta na e luga indica.

Ta parce cu e sindicato nobo tin intencion pa habri e contract colectivo di trabao for di otro, aunke cu e ultimo CAO firma pa e sindicato UEA, ta vence te na aña 2020. Un paro laboral cu consecuencia pa e funcionamento di e compania of strobando suministro normal di coriente na clientenan, sin duda lo conduci na casonan legal den Corte y cu consecuencia financiero tanto pa e sindicato como tambe pa e empleadonan.

Gerencia di NV Elmar a haci tur lo posibel pa cera un bon CAO pa su trahadonan un aña pasa, cu e acuerdo cu e tin un duracion di 4 aña. Den caso cu e empleadonan a opta pa cambia di sindicato of afilia na un otro sindicato, no por cambia e acuerdo firma entre e partidonan.

Cu STA kier presenta su mes na gerencia di NV Elmar ta un bon comienso. Pero, cu e reunion mester tuma luga na e orario cu nan ta stipula y na e luga cu nan ta desea, no ta posibel. NV Elmar ta sigui habri pa reuni cu e sindicato y pa tin un bon relacion laboral cu nan, den representacion di un grupo di e trahadonan di e compania. Pero cu menaza pa “pone Elmar plat” no ta e miho forma pa drenta un compania como sindicato nobo eyden.

E sindicato ta mencionando como reto cu NV Elmar ta pensa di haci un “herinrichting” y ta specula cu lo kita hende for di trabao. Esaki ta un informacion eroneo, al contrario, e restructuracion y procesonan nobo den e compania lo rekeri mas trabao. NV Elmar tin un acuerdo firma cu ta trata e caso aki completamente, den cual ya a garantisa e trahadonan cu lo no kita ningun hende for di trabao den un forma no boluntario.

NV Elmar ta garantisa su clientenan cu lo haci tur locual ta na nan alcance pa sigura un suministro stabiel y operacion sin interupcion di coriente na Aruba y na tur su tres oficinanan, situa den Wilhelminastraat, na San Nicolas y na Hato, pero lamentablemente STA ta pensa otro.

- Advertisement -

DUNA COMENTARIO

Please enter your comment!
Please enter your name here