Home Politica Partido POR lo haci denuncia oficial y cu prueba contra ministernan cu...

Partido POR lo haci denuncia oficial y cu prueba contra ministernan cu a cumpra voto

1065
0
SHARE
- Advertisement -

Otmar Oduber a anuncia:

ORANJESTAD (AAN) – Varios pregunta di prensa a wordo lanza durante e conferencia di prensa extraordinario di Partido Pueblo Orguyoso y Respeta, POR Plataforma e Forza Nobo, relaciona cu formacion di Gobierno.

E prome pregunta cu e lider di POR a haya, ta si no tin ningun forma pa nan por forma gobierno cu AVP.

Otmar Oduber a contesta cu absolutamente cu no tin forma. “Mi ta kere cu esaki lo tabata un falta di respet pa e comunidad di Aruba. Un eleccion y un proceso democratico ta wordo determina pa e voto popular di nos comunidad.

Y aki nos por papia di partido grandi, nos por papia di partido chikito, nos por papia di partido cu a crece mas of a crece menos, realidad ta cu tin un rechazo rotundo cu a tuma lugar pa partido AVP di mas di diez mil voto, manera mi a bisa; un caida di 4 asiento cu si bo tin intencion so di forma un gobierno cu un partido cu a wordo rechaza na e forma aki, kiermen cu bo no ta acepta ni respeta e resultado di e eleccion cu tabata tin Diabierna ultimo”, Otmar Oduber a señala.

E pregunta a bin tambe tocante POR su disponibilidad pa forma gobierno cu MEP, locual el a reitera cu ta e caso y a menciona cu POR tin un plan di accion cu nan a traha hopi duro riba dje, y por a mira durante e contienda aki cu e programanan di Partido POR y Partido MEP ta hopi similar.

“Lo no tin riba e tereno aki dificultad pa un posible formacion, y nos ta kere cu lo mas logico tambe ta cu pueblo a papia atrobe.

No solamente e pueblo a rechaza partido AVP na e forma con el a wordo rechaza, pero a mustra tambe cu el a duna Partido MEP, Partido POR y Partido RED e reconocimento; e beneficio di duda pa por forma un coalicion, forma un Gobierno y mi ta kere cu pueblo tabata hopi cla den tur encuesta cu a wordo teni, unda opinion a wordo puntra den e mayoria, 80 porciento plus tabata papia di un coalicion pa tin e balansa”, Oduber a señala.

Otmar a sigui bisa cu ta importante den cualkier coalicion, ta pa tin un base fuerte, solido, y esaki ta yama programa di accion, programa di partido cu tin cu bira programa di gobernacion, pa traha na interes di e comunidad di Aruba.

“Y pueblo di Aruba a scoge e dos programanan ey, of en todo caso pa e tres programanan mirando cu tin tres partido cu a bay dilanti den e eleccion ultimo aki, y a rechaza na un forma categorico corupcion, falta di integridad y falta di liderazgo den nos comunidad, den loke ta trata e resultado di eleccion”, Oduber a reitera.

Otmar a wordo puntra tambe si e no ta mira como un rechazo e hecho cu tanto su persona como Andin y Marisol a bay atras den voto e biaha aki. E por ehemplo a baha di mas cu 3 mil voto tempo di AVP na 1800 voto e biaha liderando POR.

“E ta pone bo pensa sigur y den e fin di siman cu a pasa mi a tuma tempo pa reflexiona, y analiza”, Oduber a expresa.

Tambe el a subraya cu el a mira e campaña sumamente baho di nivel y fuerte unda cu cierto medionan a wordo comprometi, hasta paga cu fondonan publico, pa hiba un campaña cu na ultimo tabata e unico enfoke di e partido na mando,  contra partido POR.

Aki el a menciona cumpramento di voto for di figuranan di AVP, entre otro Prome Minister y Minister Mike de Meza, y el a anuncia cu awe, durante e rueda di prensa, e lo anuncia cu nan ta bay entrega un denuncia oficial contra politico y ministernan cu a presta nan mes na cumpra voto.

“Nos tin e pruebanan necesario caminda nos ta bay over na entrega e keho aki. Nos sa cu na Sint Maarten y otro paisnan hendenan a wordo condena pa cosnan asina”, Oduber a subraya.

Na final el a remarca cu for di cuminzamento cu nan a lanta POR nan a bisa cu nan ta cuminza for di cero, y pesey POR no ta sinti cu nan a wordo rechaza pero mas bien pueblo a duna nan  e confianza cu dos asiento.

- Advertisement -

DUNA COMENTARIO

Please enter your comment!
Please enter your name here