Home Comentario Pobreza ta genera delincuencia y e costo di bida exagera den nos...

Pobreza ta genera delincuencia y e costo di bida exagera den nos Isla ta fomenta esaki

40
0
SHARE
- Advertisement -

Na Aruba tambe ta e caso:

ORANJESTAD (AAN) – Estudionan realiza na diferente pais, no solamente na America Latina y Caribe, pero tambe na Merca y Europa, ta demostra cu e pobreza ta intimamente relaciona cu delincuencia.

Claro, no por generaliza, pero e margen ta amplio. No ta kita afo si, cu hopi famia a perde nan base riba cual mester lanta yiunan cu un moral solido, yiunan cu no ta wordo siña cu educacion ta e mihor arma cu nan por tin den bida.

Matutino DIARIO a ricibi diferente opinion, tocante e caso di e dos menornan di edad cu a wordo gara cu arma y capuchon cu intencion di haci algo menos bon.

Y e tema di pobreza mara na delincuencia bin dilanti. Un di e aspectonan cu a wordo señala ta e costo di bida extremadamente halto na Aruba. E hecho cu un segmento diki di nos pueblo ta biba di salario minimo cu ta menos cu 1800 florin, otro porcentahe ta biba di bijstand, y di asina tiki placa sea un mama soltero, of un pareha unda un so ta traha, tin cu paga tur nan gastonan di huurmento di vivienda, awa, luz, telefon, cuminda, zakgeld escolar, articulonan di scol, transportacion, etc. etc.

No ta tur hogar na Aruba ta biba den pobreza pa motibo di negligencia. Por ehemplo, no tur tin un entrada di 4 mil florin bay ariba, kizas di cada mayor, y cu nan nivel di bida mes ta haci cu nan placa no ta yega: pago di hipoteca, auto, celular, airco, fuera di alimentacion, awa, coriente, gasoline etc., y plus actividadnan di nan yiunan y e bida social cu e famia ta custumbra na dje.

  1. Ta hopi e famianan cu no por duna nan mes ningun tipo di luho, y cu tin biaha nan tin hasta cu corta den gastonan di coriente, por ehemplo (ainda tin famianan ta biba sin luz), pa por come of “medio come”.

Na dado momento e mucha cu kizas a kita for di scol pasobra placa no ta yega pa nan transportacion (podise hasta e famia ta biba di bijstand so) y nan ta harta asina tanto di e situacion cu nan ta dicidi di busca algo mas facil pa trece placa na cas, y esey ta horta.

Ta dificil pa bisa cu esey no ta hustificacion, pasobra tin hopi hende cu a lanta den pobreza tambe den pasado, y tog ta hende drechi cu a studia, a haya un profesion, y ta hende drechi den nos comunidad, pasobra tambe mester tene cuenta cu no tur hende tin un actitud y caracter fuerte pa bringa tur reto den bida.

Pero logicamente, tambe ta dificil pa hustifica cu muchanan asina jong ya caba ta drenta den e mundo di delincuencia.

Tanten cu no tin un gobierno na Aruba cu por frena e aumento di costo di bida constantemente, unda practicamente e clase medio ta den disparce na Aruba (si no ta asina cu disparce caba); tanten cu no bin un gobierno cu na lugar di regala e famianan pober un “cachi cachi” tur luna ta busca solucionnan concreto, manera profundiza den e raiz di e problema y envez di duna e pisca ta siña esnan mas vulnerable con pa pisca y habri e posibilidadnan pa nan hacie, e situacion lo no drecha; tanten no bin un gobierno cu no busca fama sino husticia social real, e situacion lo no drecha. Paternalismo politico y populismo ta stroba e desaroyo sano y positivo di un comunidad y esaki ta locual hopi hende den nos pueblo ta mira ta sosode aña aden aña afo, aki na Aruba, y nan ta sinti cu si kier combati pobreza, delincuencia y criminalidad, mester cuminza pa eradica e sistemanan aki di gobernacion, laga interes personal un banda y busca un balansa entre costo di bida y e necesidadnan cu e mayoria di nos hogarnan tin.

- Advertisement -

DUNA COMENTARIO

Please enter your comment!
Please enter your name here