Home Gobierno Premier Eman mustrando cu Aruba ta cla pa yuda St. Maarten

Premier Eman mustrando cu Aruba ta cla pa yuda St. Maarten

89
0
SHARE
- Advertisement -

ORANJESTAD (AAN): E preocupacion pa Sint Maarten ta grandi, no solamente den Reino Hulandes. “E prome informenan ta sumamente preocupante y e dañonan ta enorme,” Prome Minister Mike Eman a bisa den su prome declaracion riba e situacion di Sint Maarten, despues di pasada di horcan Irma.

E mandatario a bisa cu e informacion ricibi ta indica cu e daño na e infrastructura ta inmenso, entre otro na aeropuerto. Pero tambe ta papia cu hopi cas y edificio mes a sufri daño, y loke cu no tin informacion te cu ayera tardi ta e daño humano. For di diamars caba Prome Minister Eman a reuni cu Comision di Calamidad como preparacion pa e atencion cu mester brinda despues di e pasada di horcan Irma na hermana isla Sint Maarten.

For di momento cu Servicio Meteorologico a indica e ruta di Irma, a cuminsa traha riba e papelnan necesario pa Marina Hulandes y Arumil por duna asistencia. Tin un grupo cu a biaha prome cu e horcan mientras cu diamars a cuminsa preparacion p’asina cu e vuelonan por baha riba e isla, e grupo aki lo sali rumbo pa Sint Maarten.

A haci un inventarisacion den Polis, Brandweer, Cuido Medico, y logistica di e asistencia cu por duna. Tin un cantidad di persona cu a inclui den e team cu ta bay brinda ayudo na Sint Maarten. “Mi ta manda palabra di sosten y solidaridad pa Sint Maarten. Mi a combersa cu e prome mandatario di e isla durante mi a expresa nos convivencia cu nan y forsa den loke nan ta bay pasa aden. A informe tambe con nos ta preparando pa brinda ayudo cu cierto cantidad di material y personal.” Sint Maarten, e mandatario a sigui splica, a pasa den mal tempo caba, pero esaki tabata uno cu bientonan hopi pisa y  e imagennan cu ta circula ta mustra e consecuencianan di e bientonan fuerte aki. “Nos ta spera cu e daño keda na solamente daño material, y den esey nos por yuda Sint Maarten recupera di dje. Perdida di bida ta algo cu nos kier evita y nos ta desea cu riba e tereno ey tin menos cos di lamenta. Nos tey pa yuda nan.”

Na Hulanda, debi na loke cu a pasa cu Sint Maarten, a dicidi di cancela un debate den Parlamento. Esaki ta un señal con tur den Reino ta convivi cu otro den momentonan dificil.

 

- Advertisement -

DUNA COMENTARIO

Please enter your comment!
Please enter your name here