Home Comentario Prome aña cu nos ta conmemora sin presencia di Jossy Mansur pero...

Prome aña cu nos ta conmemora sin presencia di Jossy Mansur pero e ta sigui ta nos guia!

18
0
SHARE
- Advertisement -

Pabien na tur colega celebrando nos Dia di Prensa:

Pa Mercedes Monge

Un di e trabaonan di mas comprometi cu un pueblo, ta e trabao di un periodista. E periodista dia pa dia, simplemente ta yuda skirbi e historia di e pais den cada noticia, den cada suceso cu e ta relata, den cada informacion cu e ta duna.

No solamente nos tin e funcion di duna di conoce locual e pueblo por a scucha of tende aki aya, sino di constata, confirma, pa trece dilanti nos relatonan cu e maximo di veracidad.

Nos tambe tin e mision di educa y denuncia locual cosnan cu ta nos ciudadanonan, tambe di haci criticanan constructivo riba diferente aspecto cu nos mes ta mira y cu pa medio di un comentario, por ehemplo, nos por trece dilanti.

Nos ta eherce un trabao sumamente humano. Di hecho tin cosnan ta sosode den nos pais cu hopi biaha ta toca profundamente nos fibranan, nos curazon.

Nunca nos mester lubida cu e trabao aki ta rekeri di etica y moral como parti esencial di nos profesion y profesionalismo.

Awe nos ta celebrando Dia di Prensa, y e aña aki hopi envolvi den e desaroyonan politico di nos pais como cu nos ta den un aña di campaña y aki 21 dia mas, un eleccion parlamentario pa e siguiente cuater añanan.

Nos no por keda afo di locual ta sosode rond di nos, incluyendo politica, cual cu sea nos opinion personal y nos gusto of no pa politica, cu al fin y al cabo ta un ciencia cu ta wordo aplica, kizas sin nos mes pensa riba dje, hasta den nos bida diario como ciudadano.

Nos como periodista tambe ta un ciudadano di e pais aki y como tal, tur tereno ta concerni nos: economia, finanzas, salud, educacion, asuntonan social, husticia, turismo, imigracion, vivienda, costo di bida, etc., etc., y plus e desaroyonan di indole internacional cu ta tumando lugar no solamente na Hulanda cu ta nos Madre Patria, pero rond mundo, y un ehemplo cu tin nos atento tur dia ta e situacion na nos pais bisiña Venezuela.

Pues, por mira con hopi y con amplio e temanan cu ta regarda nos trabao ta. Ta cantidad di informacion nos ta busca of ta yega na nos redaccion di diferente manera, y sin duda via e rednan social cu awendia ta imprescindible. Pesey no ta exagera pa bisa cu nos trabao ta un di 24/7. Tur esaki ta referi di hopi esfuerzo, tempo, energia, boluntad di trabao y specialmente un quote inmenso di amor pa nos trabao y pa nos pais. Lastima cu no tur hende ta compronde esaki ya cu lamentablemente, tin hende cu no ta duna nos trabao su merecedo balor, siendo cu un y tur incluyendo nos mes, no por pasa un dia sin wordo informa.

Pues, palabranan di pabien, forza y sabiduria pa cada un miembro di prensa y muy specialmente pa coleganan di Matutino DIARIO.

Esaki ta e prome aña den nos 36 aña bayendo pa 37 di existencia di nos corant, cu nos ta conmemora nos Dia di Prensa sin presencia di Jossy Mansur pero su recuerdo ta y lo keda pa semper den nos mente y curazon y e ta sigui ta nos guia.

 

 

- Advertisement -

DUNA COMENTARIO

Please enter your comment!
Please enter your name here