Home Turismo Prome di October ta bay tuma lugar e di 23 edicion di...

Prome di October ta bay tuma lugar e di 23 edicion di Aruba Reef Care Project

124
0
SHARE
- Advertisement -

ORANJESTAD   (AAN): Diadomingo, 1 di October Aruba Reef Care Foundation ta organiza e proyecto anual Aruba Reef Care Project 2017.

Esaki ta di 23 aña consecutivo cu e evento ta tuma lugar.

Durante un conferencia di prensa, presidente di Aruba Reef Care Foundation Castro a trece dilanti cu ya ta conoci e proyecto su objetivo principal ta pa concientiza publico tocante e importancia di cuida y proteha nos lama y beachnan.

E grupo di voluntario nan ta cla pa otro grandioso accion di limpieza y un biaha mas un y tur ta invita pa yuda mantene nos beach y den lama limpi y bunita.

Manera ya ta custumber, durante henter aña e comision di Aruba Reef Care ta ofrece un serie di presentacion na schoolnan di Aruba.

Perez a indica cu e aña aki Aruba Reef Care Foundation a expande su serie di presentación educativo pa publico general cu e popularismo ‘Aruba Marine Life Lecture Series’.

Durante lunanan di Maart, April y Mei, lecturanan publico a wordo duna na Biblioteca Nacional tocante Lionfish, Tribon, Manta Raya y Turtuganan rond di Aruba, cu entrada completamente gratis.

Durante e presentacionnan di Aruba Reef Care na school, ta invita e school pa adopta un pida beach of area cu den futuro nan por mantene limpi periodicamente y di e forma aki contribui activamente como ehempel na comunidad pa cuido di nos medio ambiente.

Perez a sigui  bisa cu otro organisacion of hasta empresanan por pidi pa un presentacion special y asina pro-activamente yuda na concientiza y tene Aruba limpi.

Desde Juni 1994 Aruba Reef Care Project, iniciativa di Sr. Castro Perez y conhuntamente cu Sr. Byron Boekhoudt, Biologo Marino cu ta e co-fundador cu tin como meta pa contribui pa concientiza Aruba di e necesidad di cuida lama y beachnan.

E idea a wordo ricibi cu tur apoyo necesario for di oficina di turismo (Aruba Tourism Authority), Santa Rosa (LVV) y tambe otro instancianan.

Durante di e añanan e proyecto a sa di uni varios operador di buceo, compania di deporte aquatico y instancianan particular y publico pa contribui na yuda proteha costanan como tambe sitionan bou di lama, no solamente cu haci limpieza pero tambe cu combati lionfish y mas.

Progreso di Aruba Reef Care Project Por a mira un adelanto grandi y principalmente cu menos sushi bou di lama, principalmente ariba e rifnan di coral y tambe na e sitionan di sambuya. Ainda falta hopi trabou pa haci riba e tereno di proteccion y conservacion di costa, beach, rif y otro flora y fauna di nos isla.

Den transcurso di e añanan, e cantidad di participante tambe a aumenta cu mas di 800, mientras cu por bisa cu orguyo cu e cantidad di sushi colecta si a baha, un indicacion di e exito di e esfuerzo.

Segun e presidente di Aruba Reef Care Foundation, esnan envolvi ra raportando cu nan tambe ta mira e progreso di concientizacion y accion continuo.

Tin sitionan popular di buceo, unda door di esfuerzo conhunto e cantidad di desperdicio visible awendia ta mucho menos cu loke e tabata na comienzo.

Di otro banda tin preocupacionnan ainda pa e echo cu

sushedad for di fuentenan for di tera, sea accidentalmente of a proposito, ta keda yega lama cu e biento fuerte di nos isla. Sitionan unda hopi hende ta bay beach pa recreo of unda hende sa pisca for di tera, hopi biaha ta haya desperdicio regularmente ainda. Esakinan mester bira enfoke di futuro concientisazion y cual e organisacion lo aporta a largo plaso.

- Advertisement -

DUNA COMENTARIO

Please enter your comment!
Please enter your name here