Home Comentario Pueblo ta gana nada cu pleito entre bisiña, amigo y famia pa...

Pueblo ta gana nada cu pleito entre bisiña, amigo y famia pa color politico

17
0
SHARE
- Advertisement -

Diferente observador:

ORANJESTAD (AAN) – Aunke tin biaha e argumentonan ta “fofo” por ripara un tendencia den nos pueblo, y basta fuerte e momentonan aki, unda cierto ciudadanonan ta agredi otro pa color politico.

Algun observador cu simplemente ta keda neutral encuanto color politico, a trece e punto aki dilanti na nos redaccion.

Green Corridor:

E fin di siman hopi por a ripara cu tabata tin un polemica formal rond di e cabamento di e trabaonan di Green Corridor. Varios persona a keda masha contento cu e caminda aki, cu berdaderamente a deriva di un proyecto cu ta data di alomenos 1990, cu DOW a cuminza cumpra terenonan cu tabata necesario pa traha e caminda en cuestion, y ta gobierno a bin gobierno a bay papiando riba e mesun proyecto, te cu awor el a bira realidad, no manera e tabata originalmente ni cu e mesun nomber, pero el a keda cla y a drenta den uso.

Otro grupo di persona, kizas independiente di politica kizas como issue politico, a dedica na cuestiona e proyecto. Cu e lo costa pueblo un platal, cu e debe di gobierno a aumenta barbaramente, cu ta nos nietonan lo tin cu carga e debe, etc., etc., etc. Logicamente cada persona tin derecho di expresa nan opinion, loke pa un hende ta pinta blanco pa otro ta pinta preto y esey ni un hende por cambia. Pero e situacion fastioso ta ora cu hendenan ta hinca e proyecto aki y cualkier otro pa lanta polemica unda hasta amigonan, hasta famianan ta pleita. Kico ta sirbi pueblo e tipo di discusionnan aki? Nos ta na porta di un eleccion, mayoria di hende tin nan criteria bon forma y esnan cu ainda no sa pa ken lo vota, no ta bay wordo “conkista” pa tuma e caminda berde, geel, blou, etc., a base di pleitamento entre nos mes ciudadanonan. Y esnan cu lo forma e segmento di abstencion dificilmente nan lo wordo convenci pa bay urna electoral of pa no busca manera di anula nan voto.

Den circulo social:

Un ciudadano a conta nos kico el a mira den un bar, unda dos amigo a topa y a cuminza papia nice, pero ora e toca e tema politico un di nan a rabia pasobra su amigo ta simpatiza cu un partido cu no ta esun di dje.

Poco a falta pa nan yega na golpi, cu otro clientenan mester a lanta interveni meymey di nan dos, te ora esun cu no a cuminza e discusion a dicidi di mihor abandona e lugar. Kico un comunidad ta gana cu actitudnan asina? Un solo pueblo nos ta! Aruba ta e meta, e centro di eleccion, nos democracia cu riba su mes ta consisti di diversidad, entre otro, di color politico!

Klinkers, asfalt y stof:

Otro persona a comenta cu den su bario a surgi un discusion entre algun bisiña pa e hecho cu gobierno a laga pone asfalt riba un caya cu pa decadanan largo tabata un caos di stof. No solamente a traha un caminda nobo pero a pone klinkers riba un bon parti di e acera. Anto un par di habitante a sinti fastioso cu nan a kibra cant’I caminda pa pone klinkers, y a bisa e otronan cu asfalt no ta bay caba cu stof, pasobra e asfalt tambe ta yena cu stof. Non sense! Asina e lector a expresa. E otro habitantenan si ta contento cu por fin a drecha e caminda. Nan sa cu ta obligacion di gobierno y cu nan tin añanan pagando impuesto y cu no mester dobla rudia pa gobierno pa a cumpli cu un derecho cu pueblo tin, cu ta un bon infrastructura. Pero esaki no ta nifica cu nan, cu ta contento, tin cu sinta discuti cu otro djis pa motibo politico cu ta loke otronan ta busca pa hinca un discusion non sense den dje.

E yamada:

Personanan cu a reacciona asina aki ta pidi comunidad pa e dianan cu falta pa eleccion bira calmo y trankil. Pa no busca boca di otro djis pa start cualkier pelea, pasobra e mal contento di un rato por caba mal, y kizas amigonan di hopi tempo por para den enemigo sin nodi, y famianan mes por lesiona nan lazo di sanger, siendo na final, despues di eleccion, TUR POLITICO ta haci bon cu otro y ta sigui bon cu otro!

- Advertisement -

DUNA COMENTARIO

Please enter your comment!
Please enter your name here