Home Politica Pueblo votador ningun momento so a duna mandato pa MEP y AVP...

Pueblo votador ningun momento so a duna mandato pa MEP y AVP traha hunto!

1096
0
SHARE
- Advertisement -

Malinterpretacion di gremionan:

ORANJESTAD(AAN)— Relaciona cu e resultado di e eleccion di 22 di September y despues di e reunionnan di Gobernador cu tur partido politico y gremio den e proceso pa yega na formacion di un gobierno nobo pa Aruba, partido MEP a tuma nota di declaracionnan di cierto instancianan, manera entre otro Camara di Comercio y Conseho Social Economico (SER), caminda nan a trece padilanti cu e resultado di eleccion ta indica cu pueblo a duna mandato na e dos partidonan di mas grandi, esta MEP y AVP pa bay forma gobierno di Aruba.

Voto di castigo pa AVP

Sinembargo tur hende cu sano huicio mes por a mira cu na ningun momento so esaki tabata e mandato y deseo di pueblo mirando e echo con den forma determinante e pueblo a duna su voto di castigo na AVP y nan gobernacion corupto di e ultimo 8 añanan caminda e partido aki a bay atras cu 10 mil voto y 4 asiento. Pues mas cu claro cu MEP no tin nada di busca den un coalicion cu un partido inconfiabel y corupto  manera AVP y esaki a ser vocifera caba na varios ocasion pa nos partido, tanto prome como despues di e fecha di eleccion.

Un partido inconfiabel

Alabez ta bon pa bay den historia y demostra con den pasado na dos ocasion MEP a yega di extende un man na AVP pa hunto forma un gobierno na bienestar di e pais aki, pero cu cada biaha AVP a nenga e man aki.

  1. Na 1984 despues cu Lago a anuncia ciere di su refineria, Betico Croes, mirando cu e ciere aki lo resulta sumamente devastador pa nos economia, finansa y empleo, a dicidi di reforma e Bestuurscollege di MEP, a extende un man na tur partido politico y gremionan pa forma un gobierno nacional y p’asina conhuntamente traha na bienestar di e pais aki, mirando cu un pilar economico importante a cay afo. Sinembargo pa oportunismo politico AVP a nenga e man cu Betico a extende na nan. Mirando cu AVP redondamente no kier a forma parti di e gobierno nacional aki, Betico Croes a haya su mes obliga di reforma e Bestuurscollege y a trece aden dos diputado experto, sr. M. Kuiperi y sr. M. Henriquez (dfm), kendenan a keda encarga cu dos cartera hopi importante, esta turismo y finansas. Finalmente e ultimo Bestuurscollege aki na 1985 den forma diligente a percura pa Aruba por a drenta su Status Aparte den un forma responsabel, sin ningun ayudo di AVP.
  2. Na 1994 tabata un otro ocasion cu AVP a mustra con inconfiabel nan ta ora cu nan a nenga e man cu Nel Oduber a saca pa nan, caminda e pensamento di MEP tabata cu Aruba mester ser goberna cu un base amplio y p’asina dos partido grandi por traha na e desaroyo y progreso di e pais aki. E tempo ey MEP a pidi su dos partnernan den coalicion, esta PPA y ADN pa nan cooperacion y p’asina MEP por forma cu AVP e gobierno cu base amplio aki. Pero kico nos por a mira atrobe? AVP un biaha mas pa oportunismo politico a nenga e man cu MEP a saca pa nan, no kier bay den coalicion cu MEP y a prefera di bay pa un eleccion.

Oportunismo politico

Fuera di e dos puntonan menciona, no mester lubida con den e lucha pa nos Status Aparte, nunca AVP a coopera cu MEP pa concretisa e logro aki, pero alcontrario a pone trampa den nos caminda, a boicotia y vota contra nos himno, bandera, referendum y moneda Arubano. Alavez na 1985 AVP a cera tur porta pa MEP por a drenta den e prome gobierno di pais Aruba, caminda nan a declara cu nan lo no traha cu MEP, siendo cu den e eleccion di 1985, MEP a resulta e partido di mas grandi di Aruba cu 8 asiento y Betico e votegetter cu 8879 voto.

Pues por conclui cu durante e ultimo tres decadanan semper AVP a traha y actua a base di  oportunismo politico y nunca kier a traha hunto cu MEP pa bienestar  general di e pais aki. E pregunta retorico ta cu si awor na 2017, esaki si lo ta e caso?

- Advertisement -

DUNA COMENTARIO

Please enter your comment!
Please enter your name here