Home Deporte Resultado Campeonato Mundial Juvenil 2017 Di Landamento

Resultado Campeonato Mundial Juvenil 2017 Di Landamento

41
0
SHARE
- Advertisement -

ORANJESTAD (AAN): Siman pasa e di 6 edicion di FINA su Campeonato Juvenil di landamento a conclui na Indianapolis, Indiana, USA. Arubaanse Zwembond a participa cu 3 landado Juvenil, Flory Kock, Keeley Maduro y Patrick Groters. E landado nan a wordo acompaña pa Head Coach Ismael Santiesteban . AZB ta hopi satisfecho cu e logronan di su atletanan, cu un biaha mas a demostra cu e desaroyo di e deporte di landamento ta bayendo den bon direccion. Patrick Groters a landa 2 Record Nacional nobo den 50 m (26.66) y 100 m (57.02) Lomba. Na mes momento den 3 di su 5 eventonan Patrick a termina den Top 20 di mundo Juvenil. Su mihor representacion tabata den 200 m estilo combina, na unda Patrick a finaliza como number 14 cu 2:04.73, mehorando su mihor tempo cu 0.04.

Keeley Maduro y Flory Kock ambos a participa na e Campeonato pa obtene mas experiencia den Competencianan di nivel halto. Keeley ta den training pa Juegos SURAMERICANOS de la Juventud, locual lo tuma lugar fin di September na Chile.  Keeley a competi den 50 m (29.04) y 100 m Vlinder (1:05.66) y 400 Liber (4:32.64). Den tur 3 evento Keeley a mehora su mihor temponan un poco, mustrando cu pa Chile, despues di pasa den su periodo di preparacion final, Keeley lo ta cla pa mehora su temponan personal. Flory Kock a competi den 100 m (1:00.31), 200 m (2:13.32) y 400 m (4:44.52) Liber, y ta cla pa continua su training awor cu hopi motivacion, despues di e experiencia aki.

AZB lo tin su promer competencia local dia 16 di September na Piscina Olimpico Roly Bisslik, e competencia ta e Sprintnight anual, piscina cortico (25M), pa tur categoria di edad, incluyendo Masters. Pa e seleccion di landamento, Juegos SURAMERICANOS de la Juventud na Chile ta dilanti porta. Aruba lo wordo representa pa Keeley Maduro, Anahi Schreuders, Brandon Cheong y Daniel Jacobs.  Despues di esaki, preparacionnan lo cuminsa pa e Promer COPA UANA di landamento locual lo tuma lugar na Coral Springs, Florida, USA. Copa UANA lo inclui tur federacion di Caribe, Centro y Sur America, y 40 pais en total lo participa.

- Advertisement -

DUNA COMENTARIO

Please enter your comment!
Please enter your name here