Otmar Oduber:
ORANJESTAD (AAN): Partido POR a logra 2 asiento den Parlamento! Un di e lidernan, Otmar Oduber a splica cu e ta contento y ta gradici pueblo pa e confianza. Un partido di 8 luna di existencia y e resultado ta mustra cu pueblo a rechaza corupcion den Gobierno.
Pueblo a dicidi, y e resultado Diabierna anochi tabata tenso di comienzo te final. Despues di eleccion, ta bay cuminza awor cu otro etapa. El a mustra e lamento con durante campaña, principalmente esnan di AVP a ataca POR y e miembronan tur siman, tur dia. Pero awor, Pueblo a rechaza y mustra Gobierno riba e hecho cu nan kier cambio, pueblo kier un politica nobo cu un programa, cu team bon balanza, y e ta contento cu su team di 29 lider di Partido POR.
Oduber a mustra cu e 2 partidonan grandi MEP y AVP, esnan cu a saca 9 asiento, nan tin di busca manera pa sinta cu otro pa resolve e problema cu e dos partidonan aki a ocasiona ultimo 16 añanan.
Si acaso Partido POR wordo yama pa forma parti pa carga responsabilidad? Oduber a bisa cu nan ta cla pa goberna, pa drecha e pais aki pa bienestar di cada famia. E ta mustra cu MEP y AVP tin di papia cu otro pa wak si nan ta traha cu otro.
Mike Eman probablemente lo haya e funcion di “Informador”, pa check si por forma Gobierno. POR lo para un banda un rato pa wak si MEP y AVP lo uni y carga nan responsabilidad.
Si acaso MEP y AVP no cera paz, e ora kizas AVP lo check cu POR? Pero Otmar Oduber a bisa cu el a tende lider di AVP bisa cu e no kier traha cu POR. Pues e ora AVP lo no por forma Gobierno di Coalicion.
“Pues pueblo lo a mande pa oposicion tambe,” Oduber a bisa. Aki e ta referi cu e votamento di Diabierna a manda Gobierno di AVP pa cas.
Di 13 asiento cay te 9. Un di e derotanan mas grandi cu AVP a haya den su historia. Probecha di felicita lider di MEP cu a bay dilanti pa yega 9 asiento. Felicita Ricardo Croes cu tambe a logra su prome asiento.
