Home Enseñanza Sindicato SIMAR ta cuestiona con Gobierno a neglisha EPI Sector economico.

Sindicato SIMAR ta cuestiona con Gobierno a neglisha EPI Sector economico.

54
0
SHARE
- Advertisement -

ORANJESTAD (AAN): Sindicato Simar ta confirma, cu e docentenan di Sector Economia a cansa. Esaki ta comprendibel ya cu pa añas e docentenan di gym ta traha den un situacion laboral inacceptabel.

Despues di a purba pa medio di diferente carta y combersacion cu tanto management, como directie y DPS, e docentenan no tabata tin exito. Studiantenan tambe a “walk out” na 2015 pa diferente di e mesun puntonan di atencion cu nan ta trata awe. Mientrastanto un otro aña escolar a habri e organizacion den e mesun situacion.

Pesey riba Diabierna, docentenan di EPI sector Economia a dicidi di pone trabao abou pa motibo di disgusto ya cu nan ta celebrando 20 aña di existencia, mientras cu docentenan di gym y studiantenan ta sin un sala di gym. Na luna di november 2015 e docentenan a sali for di school y a bay entrega un carta na minister Hooyboer-Winklaar  den cual a mustra nan disgusto.

Segun Simar, tambe a entrega e mapanan di e gymzaal cu lo mester ser construi pa EPI. E splicacion duna door di minister tabata ta cu EPI mes a dicidi di duna otro proyectonan prioridad. Minister na su turno a laga sondea e posibilidad di construi un gymzaal mas grandi cu esun planea na Princes Amalia basisschool y a purba bin na un areglo pa EPI haci uso di esaki mientras cu a construi un pa EPI. Mientrastanto e school nobo a ser inaugura y e docentenan a haya notificacion cu uso di e gymzaal pa EPI no lo ta posibel.

Otro promesa cu a bin dilanti door di directie di EPI/ DPS tabata cu a construi un “overdekte” como solucion riba termino corto y cu esaki a ser cera despues di tempo. Nada di e “overdekte” aki a bira realidad. SIMAR ta di opinion cu traha den e condicionnan aki absolutamente no ta acceptabel, specialmente sabiendo cu ley ta protehe tanto e docente como e studiante cu articulonan cu ta papia di entre otro temperatura maximo, grandura di localidad, sombra y seguridad. E situacion aki ta contra di tur norma describi den nos leynan.

Peor aun sabiendo cu awendia, cu “global warming” y tur efecto di cambio riba clima, docentenan den clas sin airco mes ta traha den un temperatura entre 32 cu 38 grado cu ta sinti mane 40. E docentenan aki, huntu cu studiantenan, ta haci gym den e higra di solo cu temperatura mas halto ainda.

SIMAR ta enfatisa cu e accion aki no tabata tin nada di haci cu politica, sino mas bien cu frustracion cu a acumula y a culmina den expresa malcontento na inicio di otro aña escolar. Expresion den un manifestacion cortico cu ta derecho di nos ciudadanonan. SIMAR tabata presente na e accion pa sostene e causa y lo sigui e desaroyo di e asunto aki di cerca.

Nan ta spera cu e docentenan aki haya oido y cu pronto lo bin solucion na e problema aki.

- Advertisement -

DUNA COMENTARIO

Please enter your comment!
Please enter your name here