Home General TOPA ta rechaza totalmente kitamento di derecho di pensionadonan di Gobierno

TOPA ta rechaza totalmente kitamento di derecho di pensionadonan di Gobierno

67
0
SHARE
- Advertisement -

Rene Bernabela:

ORANJESTAD (AAN) — Rene Bernabela, lider di Sindicato TOPA a tuma palabra, dilanti Bestuurskantoor,  y a splica e pakico e tey hunto cu e “Grupo di Pensionado di Gobierno Pro Nan Derecho”, pa entrega e manifiesto na Prome Minister Mike Eman.

Bernabela a subraya cu nan ta para eynan den un ambiente no mucho agradable, pa protesta pa e manera nada nechi sino denigrante, cu gobierno ta tratando su pensionadonan.

El a trece dilanti cu un par di aña pasa ora cu e pensionadonan a bay cobra nan “gelijkbedrag” y nan “bashi premie” nan a haya e sorpresa desagradable cu, arbitrariamente, gobierno a kita esakinan for di nan for di entrante 1 Januari 2015.

Esaki a conduci cu nan a acerca e sindicatonan concerni, di cual TOPA ta un di nan. Mirando e hecho cu TOPA tambe tin pensionado cu ta nan miembro nan a tuma nota di e preocupacion aki. Bernabela a subraya cu pa nan sorpresa, nan a wak un corespondencia entre gobieno y APFA den cual, gobierno, na aña 2015 a dicidi riba su mes di kita e gelijkbedrag y e bashi premie for di su pensionadonan.

Ora cu TOPA a tuma nota di e corespondencia aki, nan a bin realiza cu no solamente e pensionadonan a keda perhudica pero tur ambtenaar cu na e momentonan aki ta trahando den gobierno, pasobra dia cu nan baha cu pension nan tampoco ta bay cobra e dos beneficionan menciona.

Pa TOPA esaki a bira un asunto inaceptable, a bati alarma y conhuntamente cu algun pensionado preocupa, cu na e momento ey a acerca TOPA, a cuminza pone en marcha e protesta aki y a busca manera di sinta na mesa cu gobierno.

Bernabela a splica cu ora nan a sinta e prome tanda, gobierno a trece dilanti e motibo bisando cu tempo cu Juan David Yrausquin tabata minister, nan a negocia cu e sindicatonan riba e punto 12, cu tin di haber cu e aspecto di “Duurte Toeslag”.

E lider sindical a subraya cu Duurte Toeslag tin di haber solamente ora tin negociacion riba asunto di pension, y na e momento aki, mirando cu gobierno a kita e Gelijkbedrag y Bashi Premie no tin nada di haci cu e Duurte Toeslag. Gelijkbedrag tin di haber cu e poder di compra cu a wordo perdi. Kiermen, ta dos asunto, y no tin motibo pa bruha un cu otro.

Bernabela a reitera cu enfasis cu Gelijkbedrag y Bashi Premie ta un derecho di e pensionadonan, di ambtenaarnan cu a traha pa gobierno y a paga nan prima y cu awor cu nan ta gozando di nan pension gobierno a kita esakinan na un forma descabeya, sin laga nan sa di adelanta y sin consulta cu sindicato y ningun hende.

TOPA no ta acepta esaki y pesey nan a bay dilanti Bestuurskantoor Diaranzon mainta, hunto cu e pensionadonan pa entrega e manifiesto den man di Prome Minister sr. Mike Eman pa mustre e forma inhusto cu el a trata e pensionadonan y cu nan ta rechaza esaki den su totalidad.

El a remarca tambe cu e tin entendi cu OPPA a ricibi un carta di gobierno avisando riba e kitamento di e dos derechonan menciona, pero e Organizacion a neglisha esaki y no a lanta un caso contra Gobierno y ora nan kier a haci algo ya tabata mucho laat y nada por wordo haci.

 

 

 

- Advertisement -

DUNA COMENTARIO

Please enter your comment!
Please enter your name here