Home Politica Voto di Cristiannan Por Haci E Diferencia

Voto di Cristiannan Por Haci E Diferencia

30
0
SHARE
- Advertisement -

ORANJESTAD     (AAN):   Un biaha mas pueblo di Aruba tin oportunidad di vota pa su representantenan den Parlamento den un eleccion cu mester ta liber y husto.

Pastornan di Iglesianan Cristian di Aruba ta agradecido na Dios cu varios Cristian a pone nan disponibel pa sirbi nan pais como representante di pueblo.

Tin algun punto cu mester ta di sumo importancia pa Cristiannan considera prome cu vota. Den e proximo cuatro añanan nos por ta sigur cu un of mas di e puntonan aki mester haya atencion di Parlamento y Cristiannan por haci e diferencia den e proximo eleccion.

Puntonan di Atencion

Na prome luga tin votamento pa nos Codigo Civil nobo drenta na vigor cu, banda di tur cambio positivo den dje, tin tambe reconcimento di privilegionan casi igual na matrimonio pa parehanan cu ta compaña, incluso parehanan di mesun sexo. Hulanda sigur lo preshona Aruba pa sigui riba e caminda aki pa finalmente yega na matrimonio di parehanan di mesun sexo.

Ta importante pa Cristian vota pa personanan cu lo mantene definicion di matrimonio na esun cu Dios a stablece, pues entre un homber y un muhe. Un otro punto ta dignidad di bida humano caminda hende mester respeta Dios como e Unico pa dicidi riba morto di un persona, sea un feto den matris of un anciano riba cama. Un otro punto ta educacion sexual na scol basa riba aceptacion di un lifestyle alternativo.

Contenido di educacion sexual na scol mester por carga aprobacion di mayornan prome cu laga expertonan di afo contamina mente di nos muchanan y hobennan cu imoralidad. Aki tambe Parlamento tin un rol importante di controla y guia. Importante tambe ta e cantidad di dropout na Aruba cu ta pone cu hopi hoben no ta yega nan potencial den bida.

Finalmente ta bon pa considera kico ta bay haci cu nos debe nacional cu a sali for di tur proporcion di normalidad. Debe na necesario pero debe inecesario ta hiba un pais na decadencia social y hudicial. Parlamento nobo mester asumi su responsabilidad di controla Gobierno na un manera estricto pa logra frena crecemento di nos debe nacional y yega na areglo pa cuminsa paga bek nos debe.

Conseho di Voto

Pastornan di Iglesianan Cristian di Aruba ta haci un yamada na tur Cristian pa considera nan voto un previlegio y un responsabilidad. Pesey Cristiannan mester haci uso di nan derecho di voto. Confia solamente esnan cu bo sa lo defende norma y balornan di decencia den Parlamento.

Corda tambe cu Parlamento por vota pa manda un minister cas, pero solamente pueblo por manda un Parlamentario cas. Cu un cantidad di mas of menos 1400 voto un candidato riba lista por drenta Parlamento apesar si e ta hopi abou riba un lista. Bo voto ta importante, haci bon uso di dje.

Comision di Pastornan di Iglesianan Cristian.

- Advertisement -

DUNA COMENTARIO

Please enter your comment!
Please enter your name here