Home Hudicial 15 luna di prison pa Venezolano ilegal haya cu arma y a...

15 luna di prison pa Venezolano ilegal haya cu arma y a menaza Polis cu morto

64
0
SHARE
- Advertisement -

El a huy for di prison di Dakota hunto cu otro tres

ORANJESTAD   (AAN) – E Venezolano A.S.D.R. ayera mainta a scucha Fiscal exigi 20 luna di prison pasobra Polis a gar’e despues cu el a huy como ilegal, cu un arma di candela y el a menaza Polis cu e lo mat’e. Hues a tene cuenta cu e hecho cu segun e sospechoso, Polis a bati’e formal y a conden’e na 15 luna di prison.

E sospechoso A.S.D.R. a presenta den sala di Corte caminda Fiscal a acus’e cu dia 11 Augustus 2017, el a menaza un agente di Polis cu morto. El a menaza: “Mi ta bay mata bo”. Tambe Fiscal ta acusa e sospechoso di tabatin un arma di candela cu bala.

Den sala di Corte tabata presente e agente di Polis, R. Hues a informa e sospechoso A.S.D.R. cu diaranzon atardi laat a haya carta di mr. Mohamed cu e ta desisti di ta abogado di e sospechoso. E sospechoso a keda asombra y a bisa Hues cu ta awor el a tende esaki. Hues a puntr’e cu si e kier pa pospone e caso pa e busca un abogado. El a bisa Hues pa sigui numa cu e caso.

MENAZA POLIS CU MORTO

Hues a bisa cu A.S.D.R. tabata deteni como ilegal, na prison na Dakota pa wordo saca pero durante control e miembronan di Warda Nos Costa a constata cu cuater ilegal a huy.

Hende a yama Polis y bisa cu a mira un di nan cu un arma banda di un bar den Driemasterstraat. Polis a bay y a surgi persecusion na pia caminda hasta Polis a los un tiro di advertence y a logra detene. A haya A.S.D.R. cu droga y placa. Segun e relato di Polis, na momento cu tabata hiba A.S.D.R. pa e patruya pa hib’e warda di Polis, el a menaza un agente cu e lo mat’e. E momento ey no a haya e arma pero despues a bay investiga y haya e arma.

AGENTE SCUCHA DEN CORTE

Hues a mustra cu A.S.D.R. a bisa na Polis cu el a haya arma benta abou y el a spanta ora el a mira Polis. Ta asina cu A.S.D.R. tabata kier pa scucha e agente R. como testigo. E agente tabata presente den sala di Corte. E sospechoso tabata kier sa ki ora el a menaza e agente. E agente a bisa Hues cu door cu e sospechoso no kier a cana bay den e auto, nan a bay cun’e y e momento ey dilanti hendenan di prensa el a bisa cu e lo bay mata.

Fiscal a bisa Hues cu mirando e actitud di A.S.D.R. e ta haya cu lo ta mihor e haya asistencia di un abogado. Hues a bisa e sospechoso cu esey por ta posibel pero lo mester pospone e caso y lo mester busca un abogado pa atende. Esey lo bay tuma tempo. E sospechoso a insisti cu e kier pa e caso caba awor. El a bisa tambe cu e no tin e conocemento di un abogado y no sa con pa haci preguntanan y cuestiona cosnan.

ILEGAL ACUSA POLIS DI MALTRAT’E

Hues a remarca cu A.S.D.R. tin carchi di castigo caminda tin varios castigo di prison. Tin castigo pa ladronicia, droga. Hues a puntra kico e kier haci cu su bida.

A.S.D.R. a bisa Hues cu Polis a bati’e formal y mand’e for di tino. Nan a hib’e hospital. Pesey e ta kere cu e agente ta bisa cu el a menaza nan. Segun e sospechoso door cu nan a coy su placa for di dje, el a grita nan cu nan ta abusador. El a puntra Hues pakico Landsrecherche no a bay serca dje pa atende e abuso di Polis.

Fiscal a bisa Hues cu el a mira den e procesverbaal un agente a bisa cu el a mira e sospechoso saca un arma for di carson y el a sali core su tras. El a bisa e sospechoso pa bay vloer. El a mira e sospechoso dirigi e arma den su direccion y el a los un tiro di advertencia.

E sospechoso a remarca, si Hues ta kere cu e lo bay tira riba asina hopi agente di Polis.

Hues a bolbe puntr’e kico e kier haci cu su bida. E sospechoso a bisa Hues cu e kier pa nan mande bek Venezuela. El a bisa cu e no kier bin bek Aruba.

EXIGENCIA DI FISCAL

Fiscal a bisa cu e no ta kere declaracion di A.S.D.R. cu el a mira dos hende sconde e arma den mondi y despues a bay coy esaki. Fiscal ta haya legalmente proba cu A.S.D.R. tabatin un arma di candela y a menaza un agente di lo mat’e.

Fiscal a bisa Hues cu e ta kere cu e sospechoso a bira pa tira riba Polis pa evita cu nan lo gar’e. Pesey e agente a los un tiro. E no ta kere cu e sospechoso no a resisti contra su detencion.

Pa loke ta e acusacion di maltrato formal di Polis, Fiscal a remarca cu si su colega Fiscal a mira A.S.D.R. durante e procedura di detencion cu e tabata maltrata, lo a cuminsa un investigacion.

Fiscal ta haya e caso aki hopi serio pasobra e sospechoso A.S.D.R. a menaza cu morto un agente di Polis cu tabata haciendo su trabou. Arma di candela ta sumamente peligroso. Na opinion di Fiscal, no por permiti cu hende ta cana rond cu arma sin tin permiso.

Fiscal a remarca cu e sospechoso a wordo saca un biaha caba for di Aruba y ta riba blacklist. Apesar di ta riba blacklist pa 8 aña, atrobe el a bin Aruba y tabata ilegal. El a huy ora el a wordo denteni pa wordo saca for di Aruba y el a bay busca un arma di candela. Fiscal a enfatisa cu no por permiti esey.

Fiscal a bisa Hues cu segun maneho di Ministerio Publico, e castigo pa hende cu arma di candela ilegal riba lugar publico, ta 15 luna di prison. Acerca mester bin e amenaza di morto contra un agente di Polis. Fiscal a exigi 20 luna di prison, kitando e tempo cu A.S.D.R. ta sera den KIA.

PIDI DISCULPA NA POLIS

E sospechoso na momento di ultimo palabra, a pidi e agente di Polis disculpa dilanti Hues y a duna e agente di Polis un man. El a bisa Hues cu por ta el a actua robez. El a pidi pa e wordo saca for di Aruba.

SENTENCIA

Hues a sera tratamento di e caso y a dicta sentencia di biaha. Hues a bisa cu e ta haya e sospechoso culpable di a menaza e agente di Polis y tabatin un arma di candela. Hues a bisa cu esaki no por. Hues a mustra cu segun e sospechoso, Polis a bati’e formal. Na opinion di Hues, Hues Comisario a evalua e grabacion cu a haci na momento di detencion di e sospechoso pero no por a conclui cu el a wordo maltrata formal. Hues a bisa cu e ta tene cuenta cu e parti aki. El a condena e sospechoso na 15 luna di prison, kitando e tempo cu e ta sera den KIA.

- Advertisement -

DUNA COMENTARIO

Please enter your comment!
Please enter your name here