Home Hudicial 2 aña y 6 luna di prison pa muher na estado haya...

2 aña y 6 luna di prison pa muher na estado haya cu droga y arma di candela

203
0
SHARE
- Advertisement -

ORANJESTAD (AAN)—- Ayera mainta e muher Dominicano biba na Aruba C.R.P. (34) a scucha Hues bisa cu e ta hay’e culpable di posesion di mas cu 2.5 kilo di marihuana y mas cu 2.3 kilo di cocaina. Ademas e tabatin un arma Caliber 38 special cu bala. Hues a conden’e na 3 aña di prison di cual 6 luna ta condicional cu un tempo di prueba di 2 aña.

SOSPECHOSO NA ESTADO

E muher C.P.R. a presenta den Corte na estado. Ora el a wordo deteni dia 17 di Juli 2017 na e cas na Alto Vista, e tabata cu su dos yiunan menor di edad. Aparentemente e momento ey caba e tabata na estado pero no tabatin barica ainda.

CANTIDAD DI DROGA Y ARMA

Hues a bisa cu e ta haya legalmente proba e acusacionnan esta posesion di droga y arma di candela. El a mustra cu dia 17 di Juli 2017, Polis a bay na un cas na Alto Vista pasobra un mucha a bira malo. E patruya di Polis a yega na e cas y a topa den cura cu e mucha homber di 14 aña kende tabata sinti batimento di curazon. Un agente di Polis a yama ambulance mientras cu a constata tambe cu den e cura patras tabatin 3 mata di marihuana.

Un rato despues e muher C.R.P. a presenta na porta di e cas y e agentenan a bay papia cun’e. E agentenan a sinti holor fuerte di marihuana den e cas y e bisa C.R.P. di e matanan di marihuana den cura. E agentenan a pidi permiso pa investiga den e cas y nan a ripara cu C.R.P. a bira nervioso. Ora Polis a drenta, nan a mira cu C.R.P. a cana bay pura den un camber. E agentenan a sigui su tras y a mira con el a purba di sconde algun boter cu marihuana.

Polis a cuminsa cu un investigacion y a constata cu na diferente parti den e camber y tambe den e cas tabatin marihuana, cocaina, bolitanan di cocaina cla pa guli y otro articulonan cu ta wordo usa pa empaketa droga.

Den un cashi den camber a haya un arma di candela Caliber 38 special cu balanan aden.

En total a confisca 2541,2 gram di marihuana, 2340 gram di cocaina, 197 bolitanan di cocaina cla pa guli. Tambe a haya 4013 dollar den un tas mientras cu den un baki di hero a haya 1240 florin y 430 dollar.

C.R.P. lo a bisa Polis cu e ta gana 1800 florin pa luna trahando na un beauty salon. Investigacion a mustra cu esey no ta cuadra y cu doño di e beauty salon a bisa cu e ta pagando C.R.P. 850 florin pa luna. Pa loke ta e cantidad di dollars den e tas, C.R.P. a bisa cu esaki ta placa cu el a haya di su retiro for di Hyatt.

Hues a bisa cu e no ta kere esaki pasobra C.R.P. no tin ningun prueba pa demostra esey.

Ademas a bin haya tres ticket pa viaha pa Florida pa 20 di Juli 2017 caminda C.R.P. cu su dos yiunan lo a bay Disney World.

Hues ta kere cu tur e placanan cu a haya C.R.P. cun’e lo ta producto di bendemento di droga.

CASTIGO

Hues a bisa cu teniendo cuenta cu e cantidad di marihuana y cocaina y mas ainda un arma di candela, e ta condena C.R.P. na 3 aña di prison di cual 6 luna ta condicional cu un tempo di prueba di 2 aña. Esey ta nifica cu en realidad, C.R.P. lo mester sinta 2 aña y 6 luna di prison. Hues a duna orden pa destrui e droganan y e arma. E placanan lo keda confisca.

Cu e castigo aki ta bisto cu C.R.P. lo haya su baby durante su detencion den KIA.

 

- Advertisement -

DUNA COMENTARIO

Please enter your comment!
Please enter your name here