Home Hudicial Dama a spierta y mira un homber drumi banda di dje

Dama a spierta y mira un homber drumi banda di dje

377
0
SHARE
- Advertisement -

Fiscal a exigi 2 aña di prison pa e sospechoso

ORANJESTAD (AAN): Diabierna  mainta e homber N. a presenta dilanti Hues pa duna cuenta pa e delito cu ta sospech’e di dje. Fiscal ta haya N. culpable di a haci actonan inmoral cu e dama, door di a mishi cu su pechonan durante un luchamento cu tabatin y a exigi 3 aña di prison di cual 1 aña ta condicional. Abogado mr. Illes ta haya cu Fiscal ta exagera den castigo.

E abogado a remarca cu casonan mucho mas serio cu simplemente mishi cu pecho, a condena sospechoso na castigo mucho mas abao.

DAMA A HAYA HOMBER DRUMI BANDA DI DJE:

E acusacion di Fiscal contra N. ta cu dia 27 Februari 2017, e a haci actonan inmoral cu un dama cu no tabata burachi drumi.

Hues a bisa cu segun e procesverbaal di Polis, e dama Hulandes a declara cu e homber N. tabata su mecanico. Dia 27 Februari 2017 anochi el a topa N. y a bis’e cu tin problema atrobe cu e auto. N. a bise pa check e auto e ora ey. E dama a bis’e cu e ora ey no y el a bay cas y drumi. Segun e dama, ora el a lanta el a haya N. banda di dje ariba cama. El a cuminsa grita y N. a choke pa e calma. Den e cas tabata kedando un otro persona cu hunto cu e dama ta kedando di pasantia. E compañante a purba habri e porta pero esaki tabata na lock. E dama a bisa su acompañante pa yama Polis. N. a purba sali for di bentana pero no logra. El a core Sali for di e cas cu un paña ta tapa su cabez.

E acompañante a bisa cu anochi el a scucha e porta habri y sera pero no a mira nada. Na dado momento el a scucha e dama ta grita y el a ripara cu e porta ta na slot. Despues el a mira un homber cu cabez tapa sali bay. E dama tabata den shock.

    SOSPECHOSO A BAY HORTA:

  1. a bisa cu el a bay na e apartamento pa horta y no tabatin relacion cu e dama. El a bisa Hues cu el a bay na e apartamento pa drecha e porta di e auto cu e dama a bis’e cu ta daña. El a ripara cu e porta di e apartamento tabata habri. El a drenta y a coy algun cos. Segun N. na dado momento su pia a dal contra un mesa y e dama a lanta. El a tapa e dama su boca y a sera e porta di camber. El a purba sali for di e bentana pero esaki tin trali di hero su dilanti. E ora ey el a tapa su cara cu un paña y a sali for di e apartamento.

Segun N. el a haci un fout pa bay horta. Hues a puntra pakico el a gara e dama. Segun N. el a haci esey pa e dama no grita y lanta hende.

Hues a puntra con mester wak e declaracion di e dama cu el a haya N. drumi den cama cun’e. Segun N. esey no ta berdad. El a bisa cu e tabatin un short bisti y no tabata sunu manera e dama ta pretende. El a coy e cartera di e dama y despues a tir’e den e auto.

EXIGENCIA DI FISCAL:

Fiscal a bisa Hues cu promer ta papia di actonan inmoral pero despues N. a bisa cu el a bay pa horta y tabatin violencia. Fiscal a bisa cu e no a persigui N. pa e ladronicia sino actonan inmoral. E declaracion di e victima, un dama Hulandes cu tabata pasando pasantia na Aruba, ta bisa cu el a spierta y haya N. sunu banda di dje riba cama. Fiscal a bisa Hues cu e ta kere mas e declaracion di e victima cu esun di N. Fiscal a bisa cu aki ta trata di actonan inmoral. E otro cos cu a sosode ta cu ora e dama a cuminsa grita, N. a choke. E otro persona kedando den e cas no por a drenta e camber pasobra e porta tabata sera na yabi.

Na opinion di Fiscal, e hecho cu N. a drenta e camber y sera e porta na yabi ta mustra cu e tabata kier a haci actonan inmoral. Un ladron lo laga e porta habri pa asina e sali mas liher posible.

Pa cu castigo, Fiscal a bisa cu e ta tene cuenta cu ta promer biaha cu N. ta haci algo asina. Sinembargo, e hecho cu a bay den e cas di e dama Hulandes cu tabata di pasantia na Aruba, esaki lo keda un experencia masha malo di su estadia na Aruba.

Fiscal a sigui bisa cu esaki a sosode den e cas di e dama, den su camber. Den e cas caminda e mester sinti su mes sigur. Fiscal a exigi 3 aña di prison di cual 1 aña ta condicional y un tempo di prueba di 3 aña.

    DEFENSA:

Abogado mr. Illes a cuestiona e forma con Fiscal ta papia di kico e sospechoso a haci. Na opinion di mr. Illes, of ta ladronicia of ta caso inmoral. El a remarca cu awor Fiscal kier pusha e asunto den scochi di Hues.

Fiscal ta acusa N. di a haci actonan inmoral cu e dama door di a mishi cu su pechonan. E abogado a remarca cu e dama a bisa cu e tabata burachi pasobra nan tabata fiesta. E dama mes ta bisa cu N. no a haci actonan sexual

E dama ta kere cu N. tabata mitar sin paña. E dama no ta bisa cu despues cu N. a lag’e los, a bisti su paña back. E abogado a bisa cu e sospechoso tabatin boxer bisti y facilmente e dama lo por a sinti su parti intimo pero esey no por papia di actonan inmoral.

E mishimento na pecho ta ora cu tabatin luchamento cu e dama pa e keda keto. E sospechoso a splica cu el a bay pa horta y ora su pia a dal na mesa, e dama a spierta. E ora ey, el a sera e porta. Na opinion di mr. Illes, esaki ta mustra logico. E ta haya cu mester declara N. liber di actonan inmoral. E abogado a remarca cu e castigo exigi ta absurdo halto. El a bisa Hues cu tabatin casonan hopi mas serio caminda tabatin penetracion y e castigo tabata menos. El a remarca, cu pa solamente di a mishi na pechonan di e dama durante un luchamento, Fiscal ta bay exigi 3 aña, ta absurdo.

Hues a sera tratamento di e caso y a bisa cu e ta bay studia e caso y dia 10 November 2017 lo por spera sentencia.

 

- Advertisement -

DUNA COMENTARIO

Please enter your comment!
Please enter your name here