Home arte y espectaculo Actriz di Aruba Nathalie Biermanns briyando internacionalmente cu proyectonan nobo na Hollywood

Actriz di Aruba Nathalie Biermanns briyando internacionalmente cu proyectonan nobo na Hollywood

1227
0
SHARE
— Nathalie a yega di participa pa Miss Mundo pa Aruba.
- Advertisement -

ORANJESTAD (AAN): Bon noticia a drenta, esta cu e bunita y talentoso actriz local Nathalie Biermanns lo ta hayando participacion y reconocemento internacional den su proximo proyectonan.

Biermanns a graba reciente e película “1st Born”, un comedia cu ta conta cu e award winning, blockbuster director Ali Atshani, y den papel protagonico ta conta cu actuacion di Val Kilmer (Batman Forever), Denise Richards (Starship Troopers), Robert Knepper (The Hunger Games: Mockingjay Part 1 & 2), y e actor Tom Berenger (ganador di Golden Globe & un premio Emmy pa e pelicula Inception).

E produccion di “1st Born” ta cay bao di LA Independent Film & Entertainment un productora situa na Hollywood y e team ta conta cu e guia di Sam Khoze, dos biaha ganador di e Euro Film Award.

Prome cu “1st Born”, Nathalie a finaliza e grabacion di “Father”, un pelicula cu ta conta un drama familiar basa den eventonan real, unda e’la protagonisa huntu cu Robert Scott Wilson (Days of our Lives), Paul Sorvino (Goodfellas), Daryll Hannah (Kill Bill), Micheal Madsen (Sin City) y Misha Barton (The Sixth Sense). “Father” a ser dirihi pa Dan Israely y produci pa e award winner Emilio Roso di Knesset Pictures.

Nathalie Biermanns ta di decendencia Hulandes, Austriaco y Arubiano, y a cruza varios oceano prome cu el a yega na Los Angeles.

E ex-Miss Aruba a representa su isla durante e eleccion di Miss World Pageant 2003 cu a tuma lugar na China.

Na Aruba, Biermanns a produci y presenta su propio programa di televisión yama SBU, cu tabata pasa semanalmente na Telearuba. Banda di su programa, e tambe a presenta un sorteo di loteria en bibo na ATV.

Cu 23 aña, Natalie a bay biba na Hulanda unda el a studia actuacion y a presenta programanan di wega en bibo pa Talpa Network, cu ta conoci pa produci progrmanan manera The Voice y Utopia. E tambe a protagonisa e reality show “Herken de Homo” produci pa Endemol Network un joint venture entre 21st Century Fox y Apollo Global Management, conoci pa produci shownan manera “Big Brother” y “Deal or No Deal”.

Actualmente residencia na Los Angeles, Biermanns a logra labra su caminda pa drenta e mundo di spectaculo na Hollywood cu dos pelicula (“1st Born” y “Father”) cu lo ser strena den diferente sala di teatro rond di mundo na summer di 2018.

Tambe DIARIO a haya e bon noticia, cu despues di un colaboracion exitoso entre Nathalie Biermanns y Sam Khoze den 1st Born, e award winning producer Sam Khoze ta considerando Nathalie Biermanns como su siguiente actriz protagonico den su siguiente produccion na Hollywood. For di aki DIARIO ta desea Nathalie tur clase di exito!

 

- Advertisement -

DUNA COMENTARIO

Please enter your comment!
Please enter your name here