ORANJESTAD (AAN): Siman a habri y DIARIO a ricibi bishita di Miss Aruba Universe, esta Alina Mansur.
El a bin splica DIARIO, di un actividad cu e ta preparando e fin di siman aki.
Diasabra 14 di October, lo tin un Premium Cocktail Party pa asina recauda fondo pa e grupo “Crijojo Trappers Aruba”. Nan ta yuda rescata cachonan riba caya, pa asina steriliza nan y despues duna nan un bon cas of laga nan bek riba caya.
E evento ta wordo organiza hunto cu e prestigioso Romar Trading, y e anochi aki lo tin diferente DJ cu ta bay anima e fiesta, incluyendo Joa Salas, NutzBeatz, y Ray4DJ, Reinier, Edson Tromp, y Carlos E.
E ta tuma lugar na Lloyd G. Smith Boulevard 131 den area di Arashi. Esaki for di 8:00 pm te cu 11:00 pm.
E evento aki ta priminti di ta uno yen di bon ambiente, y tur esaki pa un bon causa. Ta bende tickets na Vice Versa. E dress-code ta Caribbean Elegant. Lo bay tin 5 station di bebida Premium, ademas diferente pasaboca.
E grupo crioyo di “Crijojo Trappers”, ta yuda e sobrepoblacion di cacho na Aruba, y ta yuda kita cachonan di caya cu ta slenter tur caminda.
E animalnan aki ta wordo examina y lo bay haya un bon cas pa nan biba aden.
Recien nan a captura 11 cacho, y esey a pone nan total yega na 11 cacho. Nan ta 6 macho y 11 tefi. Nan a descubri 7 puppy tambe den situacion delicado.
Tur e cachonan grandi ta wordo steriliza, y desafortunadamente un di e cachonan tefi tin un tumor vaginal, y e lo tin di bay keda mas hopi pa haya chemo.
E grupo mester di mas yudanza pa logra tur esaki. Pesey Miss Aruba Universe, Alina Mansur ta organiza e fundraising cocktail party aki.
Riba e potret por mira mas di e bishita di Alina Mansur na DIARIO, y a saca potret cu diferente empleado.
