ORANJESTAD (AAN): Central di polis diahuebs despues di merdia a dirigi patruya Oranjestad na un scol den Van Leeuwen Hoekstraat debi cu un grupo di hoben di EPB tabata sinta agrupa bao di palo banda di e scol encuestion.
Nan ta agrupa bao palo cu intencion pa despues di scol bringa cu alumnonan di Maria College.
Na yegada di e patruya policial, e agentenan a topa berdad un grupo di mas o menos ocho mucha homber procedente di scol EPB.
E patruya di polis a core cu e grupo di ocho mucha homber.
Algun minuut despues un docente di Maria College a presenta cerca e polisnan cu un di su alumnonan cu a splica cu nan ta sinti nan mes menaza pa e grupo mucha hobennan di EPB.
Polis a papia cu e alumno cual su inicial ta K. y el a declara cu un luna pasa el a wordo menaza pa un mucha muher di inicial S. na Seaport Cinema.
Segun K. , S. a menase di lo hink’e den barica y pa mata su baby (K. ta na estado). Tambe K. a sigui declara na polis di a wordo poni na altura pa un amiga cu S. (diahuebs e dia encuestion) lo pasa na Maria College pa hink’e y e baby den barica, pa mat’e.
E version di polis ta menciona cu S. ta conoci cerca polis. Polis a wak’e algun minuut prome y a cor’e hunto cu e grupo di hobennan di EPB cu a agrupa bao di palo.
- tabata bisti cu uniform berde di EPB. Pa 20 pa 3 mama di K. a presenta. Nan a wordo indica pa nan bay Jeugd Zeden Politie pa entrega keho di menaza.
Patruya di polis seccion Oranjestad a remarca cu cada biaha tin e sorto di informe relaciona cu e hobennan di EPB School cu ta bay na Maria College pa busca problema.
