Home Parlamento Andin Bikker a pidi Parlamento nobo pa uza tur herment Constitucional cu...

Andin Bikker a pidi Parlamento nobo pa uza tur herment Constitucional cu nan tin den man

149
0
SHARE
- Advertisement -

ORANJESTAD (AAN) – Parlamentario mr. Andin Bikker a hiba palabra durante e ceremonia di presentacion y aceptacion di credencialnan, di e Parlamento nobo den Sala di Staten.

Andin Bikker a desea e Parlamentarionan cu lo drenta Staten hopi forza y sabiduria pa nan realiza nan trabao, y a gradici esnan saliente, pasobra hunto nan a logra hopi via di Parlamento.

Bikker a expresa cu Aruba ta un democracia hoben y cu hopi hende ta lubida esey. Nos ta un pais cu apenas 107 mil habitante, pero tog nos tin tur e caracteristicanan di un pais: Colegislador como Parlamento, Legislador como Gobierno, y Aruba ta un perla cu ta briya den mundo, loke ta trece tog su retonan cune.

El a subraya cu semper el a purba di mehora e producto cu yama Parlamento for di momento cu el a drenta den Staten, y cu apenas un par di luna den Parlamento el a presenta un concepto pa un ordenanza nobo y el a pidi e constelacion nobo di Staten pa sigui riba dje, pasobra el a scucha hopi biaha den Parlamento expresionnan tocante nivel pero despues e nivel ta bolbe descende. E ta kere cu un ordenanza nobo den Parlamento lo hisa su nivel te unda cu esaki por.

El trece dilanti tambe cu durante su ocho añanan den Parlamento nan a impulsa hopi proyecto grandi, por ehemplo independiza Parlamento conhuntamente cu otro organonan halto, manera Algemene Rekenkamer y Raad van Advies, cu ta proyectonan di ley cu ainda ta andando y cu el a pidi e constelacion nobo pa sigui cune, pasobra na final di dia pa un Parlamento controla gobierno, mester ta independiente di berdad.

Otro proyecto cu el a menciona ta Ombudsman cu tambe ta un ley di iniciativa cu a wordo carga door di diferente parlamentario den diferente Parlamento, y cu aworaki ta den su fase final, pero tambe un cambio di Constitucion cu ta algo cu sigur, tur fraccion, tabata tin consenso riba dje. Tin mas proyecto cu a wordo impulsa via Parlamento, entre otro e ley di apelacion te na Casacion, no solamente pa Aruba pero tambe a logre pa e Islanan ruman Curacao y Sint Maarten.

Ademas via esfuerzonan na nivel di Reino, tambe hopi logro grandi a tuma lugar, y tambe a pidi e constelacion di parlamento nobo pa tuma e dimension ey y braze. Por ehemplo cu e leynan federal por logra hopi no solamente pa nos isla pero tambe pa nos rumannan cu ta biba na Curacao y Sint Maarten.

Un proyecto pendiente ta esun di fast ferry cu lo uni Aruba, Curacao, Bonaire y Sint Maarten cu sigur ta algo di aplaudi. Bikker a subraya cu amiendanan tambe ta un instrument hopi poderoso, cu como parlamentario nan por eherce y ehecuta, controla gobierno y duna direccion na e maneho cu gobierno cual cu e por ta, ta hiba sea for di oposicion of cu ta sostene gobierno. Via mocion tambe por expresa y efectua un empuhe positivo pa nos pais, cu na final di dia ta resulta positivo pa e pueblo. El a reitera pa nan uza tur e instrumentnan constitucional cu Parlamento tin den su man pa bienestar di nos pais y nos futuro generacionnan y a expresa palabranan di bendicion pa e parlamento nobo, nos comunidad y Aruba en general, pasobra nos tur kier e mihor pa nos pais.

- Advertisement -

DUNA COMENTARIO

Please enter your comment!
Please enter your name here